إستفسار عن حلول لمشاكل الحك في المطبات

**M.MOUNIR** · 27-12-2014 11:58 AM

السلام عليكم

كل عام وأنتم بخير

إستفساري بخصوص مشكلة الحك في المطبات انا معايا ريو 2015
وشفت مواضيع عن حل المشكلة ناس قالت ان نركب صدادات علي السوست متنزلش قوي مع الحمولة
وحل تاني نغير الكاوتشتين لمقاش اعلي
وناس قالت نركب جنط مثلا
هل فعلا الحلول دي عملية وبتاثر علي العربية ولا لا
شكراً

**shiko85** · 27-12-2014 12:05 PM

المشاركة الأصلية كتبت بواسطة m.mounir

السلام عليكم
كل عام وأنتم بخير
إستفساري بخصوص مشكلة الحك في المطبات انا معايا ريو 2015
وشفت مواضيع عن حل المشكلة ناس قالت ان نركب صدادات علي السوست متنزلش قوي مع الحمولة
وحل تاني نغير الكاوتشتين لمقاش اعلي وناس قالت نركب جنط مثلا هل فعلا الحلول دي عملية وبتاثر علي العربية ولا لا
شكراً

وعليكم السلام ورحمة الله وبركاته
# كتير جربوا الصدادات و النتيجه كانت جيده
# موضوع تغيير مقاس الكاوتش لمقاس اعلى ده مش هيأثر على ارتفاع العربيه او تأثيره هيكون قليل جدا لان المفروض ان المقاس الجيد الأعلى قطره الكلى يساوى القطر الكلى للمقاس الأصلى و الأختلافات هتكون قليله جدا غير ان المقاس الأعلى اوقات بيكون قطره اقل من المقاس الأصلى و لو غيرت المقاس بمقاس اعلى لكن غلط ده هيأثر على الثبات و اداء الفرامل و العفشه و مؤشر السرعه
# تركيب الجنوط مش هيأثر على حاجه لان الجنط هيكون نفس مقاس الجنط العادى

**M.MOUNIR** · 27-12-2014 12:52 PM

شكرا علي ردك انت جربت يعني حكاية الصدادات دي وكانت كويسة وانا عندي طاسات 15 مش فيها جنوط فقلت لو ركبت يعني

**shiko85** · 27-12-2014 01:09 PM

المشاركة الأصلية كتبت بواسطة m.mounir

شكرا علي ردك انت جربت يعني حكاية الصدادات دي وكانت كويسة وانا عندي طاسات 15 مش فيها جنوط فقلت لو ركبت يعني

العفو, الشكر لله وحده
انا مجربتش الصدادت لكن اعرف ناس جربتها و كان الميكانيكى قالى اعملها و هتلاقى مواضيع فالمنتدى عن تركيب الصدادات و فيه افكار تانيه زى تغيير المساعدين و تركيب مساعدين انشف او تغيير السوست و تركيب سوست اطول او انضغاطها اقل
لكن الأسهل و الأرخص تركيب الصدادات

**الطيب الغالي** · 14-01-2015 11:39 AM

فيه طريقة انا مجربها وناجحة معايا ومن غير اي خسائر
بص انته لما بتطلع على المطب احرف السيارة بتاعتك يعني خلي الكوتشات تطلع المطب على واحد واحد
يعني اول الكوتش قدام يمين بعدين كوتش قدام يسار يعني هتلف بالمقود شويه يسار وشويه يمين

**khaledazizeg** · 16-01-2015 08:09 PM

انا معايا سيراتو كوبيه وما ادراك وما الادغال بتاعت شوارعنا فى مصر وزهقت من المطبات وانا كنت جربت العلايات قبل كده فى اللانوس وكانت النتيجه ممتازة فى العلو بس قصاد كده العفشه بتدب والمساعدين باظت لانها مشدوده على الاخر فنصيحه بلاش
انا عملت حل بديل كان مقاس الكاوتش عندي 215/45/r17 بدلته ب مقاس اعلى شويه 225/50/r17 عمل فارق معايا بنسبه 80 % ودا بالنسبالى حل مرضي جدا
يارب اكون افادتك

**prooo** · 17-01-2015 04:06 AM

المشاركة الأصلية كتبت بواسطة shiko85

تغيير المقاس مش هيحل المشكله لان المفروض ان القطر الكلى بتاع مقاس الجديد يساوى القطر الكلى للمقاس الأصلى او اختلاف بسيط
حضرتك غيرت المقاس بس مش بالبديل الصحيح
القطر الكلى (الأرتفاع) مقاس 225/50r17 اكبر من 215/45r17 بـ 32 مم بنسبه 5.11% و النسبه دى خطر و هتأثر على الثبات و اداء الفرامل و العفشه

كلام سليم ميه الميه ..... لازم دايما مهما غيرت في حجم الجنط والكاوتش في الاخر يبقى القطر الخارجي واحد ..... يعني بو كبرت الجنط لازم تصغر الكاوتش ..... ولو هتصغر الكاوتش لازم تكبر الجنط ..... والله اعلم

**khaledazizeg** · 17-01-2015 06:21 AM

انا بصراحه ملاحظتش مشكله فى الثبات او الفرامل والعربيه بسم الله ماشاء الله زى الفل دا بل بقت اهدي فى صوت رزعه المطبات بس عملت فارق فى العداد بس حلتلي مشكله بالنسبالى مهمه