سيارة معوقين ؟؟؟

**ARKOON** · 31-12-2014 04:46 PM

السلام عليكم ورحمة الله وبركاته :

بصراحة معلوماتي محدودة عن للموضوع دا فقولت استعين بخبارتكم وتجاربكم . : )
تقريبا بتدفع 27 % بس من تمن العربية . بمعنى ان لانسر شارك ب 145 هتدفع 40 بس تقريبا
دا الى انا فهمته .

بس مش مقتنع اوي بالموضوع والترخيص ونقل الملكية يعني لو دي ثغرة والموضوع دا اكيد يبقى الموضوع دا احلى شغل وكان زمان كل معوقين مصر عاملين احلى بزنس
الي عرفته برضو ان كل واحد له سيارة واحدة فقط ولمدة 5 سنوات وتكون معفة من الضرائب خلال هذه المدة دا أولا .
ثانيا بقى موضوع انك تختار اي معرض وتشتري بالورق دا دا بقى الي اوفر اوي يعني كنت اعرف ناس جايبين اسكودا a4 معوقين استيراد خارج ( وارد اسم البلد ) ومش معدلة عشان الناس ما تفتكرش انها مختلفة اصلن بتكون للناس ذوي نصف اعاقة .

يعني عربية زي اي عربية من المعرض بسعر زهيد جدا معفاه من الضرائب لمدة 5 سنوات .
بتكون باسم مالك العربية ( صاحب الاعاقة ) وبعدين بيعمل نقل ملكية وبس كدا بقى معاك يا معلم عربية بربع مليون وانت دفعت فيها 65 الف بس .
ايه رأيكم موضوع جامد صح !! تحياتي . : )

**ARKOON** · 31-12-2014 05:45 PM

دا طلع في حظر معوقين وقضية لو اتمسكت بتسوق عربية معوقين والي راكب مش معوقين موضوع مش زي ما الراجل كان مفهم صاحبي .
الموضوع يا سادة انه معروض عليه ورق سيارة معوقين ب 15 ألف .
بس انا ما اتكلمتش مع الراجل صاحب الورق وفهمت من طرف واحد الى هوا صاحبي الكلام الى كتبته وفي نفس الوقت اكتشفت ان معلوماتي محدودة وما عرفتش افيده بالموضوع دا بالعكس بيقت بحسب لو جاب اسكود هتكون بكام ولو جاب لانسر ولا بي ام .
المهم عملت اتصال وفهمت حاجات بسيطة زي الحظر وزي مشاكل المرور ولازم تعدي مدة 3 سنين تحت قيادة صاحب السيارة الاصلي ( صاحب الاعاقة ) وكمان في حاجة ان العربية ما بتكونش زيرو . ومعلومة كنمان ان احسن ناس شغالين في الموضوع دا في بور سعيد او الي بيشتغلوا في الميناء بشكل عام : )

-----
اي معلومة حول الموضوع ياريت عشان نلحق نقرر الورق دا مفيد ولا اي كلام .

**mhopa2440** · 31-12-2014 06:30 PM

اخي العزيز

كل اللي حضرتك قولته غلط في غلط في غلط مفيش ولا كلمة صح وبكدا حضرتك راح تدبس وينضحك عليك تمام قوي

هحاول اوضح ليك الموضوع في إيجاز

اولا صاحب الاعاقة لازم يكون معاه جواب بنسبة الاعاقة وانه يستحق سيارة معافاة جزئيا من الجمارك (خصم 20ألف جنية من جماركها الطبيعية) ودي هي الورقة اللي معروضة عليك ب 15 الف جنية (النصباية يعني)
حضرتك الجواب دا بيكون باسم الشخص صاحب الاعاقة وبيتم بيعه بمبلغ يتفق عليه بس حاليا المتعارف عليه لو معاه الرخصة وعربية اوتو بيوصل ل 11 الف بالعمولات بتاعت المكتب لو مفيش رخصة بقل المبلغ وممكن يوصل 6 او 7 الاف بس
لما بتشتري الجواب بتاخد على صاحب الجواب ورق ضمان زي ايصال امانة بالبصمة والتوقيع على بياض وعقد بيع وعقد اتفاق ووصية شرعية و.... خلافة على بياض (ضمان لحقك عشان مش يقولك عايز العربية ولا يبلغ بسرقتها وتدخل حضرتك السجن)

ثانيا كدا معاك الجواب واصبح ليك الحق استيراد سيارة من الخارج مع نسبة تخفيض الجمارك اللي وضحتها ليك طبعا مش هتقدر تستورد عشان الشحن والشراء من برة وكذا حاجة بتروح بقى على بور سعيد او اسكندرية على حسب توجيه جواب المعاك اللي معاك وهناك بتختار العربية اللي انت عايزها (كورية هيونداي - كيا- دايو) واوكتافيات دي بنسبة 99.5% نادر لو لقيت حاجة غير كدا

الاسعار مثلا النترا 2005 بتعمل 58 الف - دايو لاسيتي من 46 إلى 52 الف - ماتركيس لافيتا 52 55 الف - سبتكرا وينج من 38 42 الف - كيا شوما 30 33 الف وهكذا والاوكتافيات تقريبا زي برة

بس الحوار كله ليه عشان حاجة واحدة بس هي حالة العربيات اللي تقريبا كسر زيرو واوبشن عالي مش موجود ف عربيات مصر

حضرتك بتشتري العربية وترخصها ف المرور اللي تابع ليه محل اقامة المعاق
بيكون عليها حظر 5 سنوات للبيع ولا يقودها اللي مالكها

طيب لو اتمسكت بيها اخره يسحب العربية ويدفع غرامة بتوصل 2500 تقريبا (مش متاكد من الرقم) انما مفيش قضية ولا اي حاجة

بعد 3 سنين من الافراج عن العربية يقدر المعاق يبيعها عادي بس بعد دفع مبلغ 9600 جنية مصالحة للجمارك او يستني الل خمس سنوات

عشان كدا بتكون مفضلة للناس اللي يقدروا يمشوا بالعربية زي الجيش والشرطة والنيابة

انا طولت عليك بس بجد حسيت انك مش فاهم اي حاجة ودخل ف حوار نصباية عليك حبيت اوضح ليك الامور

بالتوفيق ان شاء الله

**mhopa2440** · 31-12-2014 06:35 PM

اه حوار الضرائب عادي يعني

هي قيمة الضريبة اللي بتدفع ف المرور عن كل سنة ترخيص وبتوصل ل 220 جنية سنويا تقريبا يعني مش عربية بربع مليون تدفع فيها 65 الف

التوفير حاجتين
1- حالة العربية
2- مبلغ 20 الف جنية تخفيض جمركي ويسمح للمعاق اسيتراد العربية بدون مالك اول او سنة الموديل (دا قانون اسيتراد العربية بيكون معفى منه)

ارجو اكون وضحت ليك كل شئ

**mhopa2440** · 31-12-2014 06:43 PM

اه الراجل دا بينصب عليك والدليل
--1- هو اولى بعشرات الالوف (فرق سعر العربية) بدل ما ياخد 15 الف بس -- هو مش يقدر يجيب العربية وعايز يستفيد بالجواب بس حق الجواب 10 11 الف لو ورقه كامل
-- 2- روح اي معرض زي ما قالك واسئله تقدر تبيع اي عربية عندك معاقين

مستحيل اي عربية رخصت مستحيل يتم بيعها معاقين

-- على فكرة عربية معاقين وعشان كدا انا عرفت كل الخطوات السابقة

**ARKOON** · 31-12-2014 07:23 PM

تسلم يا م/ محمد عبدالوهاب على ردك وفعلا حضرتك اوضحت ليا الموضوع وانا هوصل النقاط دي كلها لصحابي عشان مكنش عندي الرد في الموضوع دا : ) تحياتي لحضرتك .
انا اصلن بالمنطق كدا ماكنتش مقتنعش بالموضوع دا اساسا وحاسس انه حوار ونصباية زي ما حضرتك قولت
بس طرحت الموضوع زي ما دار بيني وبين صديقي وحضرتك سمعت الحوار وتشكر على توضيحاتك يا فندم .

**mhopa2440** · 01-01-2015 01:00 AM

لو محتاج اي استفسار عن الموضوع ف اي شئ

اتفضل ف اي وقت بس ابقى ارسل ع الخاص يمكن لو رديت مقدرش ادخل الموضوع او مشوفش الرد

وربنا يوفقك انشاء الله ويكتبلك الخير