مشكلة في فرامل اليد .. ومشاكل تانية عجييييبة

**msco** · 11-01-2015 08:05 AM

السلام عليكم ورحمة الله وبركاته

منجيلكوش في حاجة وحشة يارجالة .

فرامل اليد بقت ضعيفة فجأة .. واقف على مطلع وشاددها على الاخر ولقيت العربية بتريح لورا

مع العلم ان الفرامل في الرجل مفيهاش اي مشاكل الحمد لله ولا بسمع صوت صفير من التيل ولا أي حاجة ؟؟؟

المشاكل العجيبة التانية . في الكهربا وبقالها الوقتي اكتر من سنة ووكل لما اروح لكهربائي يفتي ومحدش عارف يعمل حاجة

1- لما اقلب نور عالي .. الكاسيت كله يفصل ويشتغل تاني

2- احياناااا مع تقليب النور العالي بردة .. العربية تنتش ولمبة الدينمو تنور والمكيف يفصل ويشتغل

3- نور الصالون والنور الامامي واي نور في العربية بيرعش باستمرار

4- عند ضغط الفرامل يفصل الكاسيت ولكن صوت فقط لمدة ثواني ويشتغل تاني ..

ملحوظة . شيكت على الارضي وشيكت على قواطش البطارية والبطارية لسة جديدة .. وعملت فحص كمبيوتر على الدينمو والعربية كلها ومفيش اي مشاكل طلعت

وكل لما اروح لواحد يقولي سيبهالنا يومين لما نفحص ضفيرة الكهربا وانا مش استحالة اسيب عربيتي يومين عند صنايعي

حد يفيدني يارجالة .. مع العلم اني في السعودية ومعرفش اي كهربائية ولا ميكانيك كويسين

شكرا شكرا

**aymanshebl** · 11-01-2015 09:22 AM

ممكن العيب من الدينامو مش شرط انه فى الكشف سليم ممكن مع التحميل يظهر عيبه اكشف كويس على الدينامو

**swimmer25** · 11-01-2015 09:42 AM

فرامل اليد محتاجة رجلاش عشان ترجع تمسك كويس
ولو الفرامل الخلفية عندك ديسكات يبقى لازم تبص على الواير لا يكون واحد او اتنين مقطوعين او مفكوكين او معلقين وبرده بيتعملهم رجلاش

مشكلة الكهرباء حاسس إنها عيب توصيل..إتأكد إن وصلات البطارية قواطيش وسلوك راكبة كويس جدا ومفهاش أي حركة ومفيش أملاح ولا شحوم على القواطيش
ولو شيكت على ده كله قيس شحن الدينامو والبطارية حتى لو جديدة ممكن يكون فيها مشكلة
والسؤال هنا هل مواضيع الكهرباء كانت موجودة قبل تغيير البطارية؟

غير كدا معرفش بصراحة ومش عايز أفتي بس ممكن كمان تزود الأرضي من البطارية لجسم العربية بسلك أتخن لأن كل الجديد الأرضي بتاعه ضعيف والله أعلم

**hi_nmr** · 11-01-2015 10:35 AM

انت فين في السعودية
لو في الجبيل او الشرقيه ابعتلي واحاول اوجهك علي حد كويس يكشفلك عليها
و من خبرتي اقولك
الفرامل عاوزه رجلاش مفيهاش مشاكل دي وبسيطه
انما مشاكل الكهربا دي ديما اسمع عنها لما تكون مركب زينون

**msco** · 11-01-2015 10:45 AM

المشاركة الأصلية كتبت بواسطة hi_nmr

انت فين في السعودية
لو في الجبيل او الشرقيه ابعتلي واحاول اوجهك علي حد كويس يكشفلك عليها
و من خبرتي اقولك
الفرامل عاوزه رجلاش مفيهاش مشاكل دي وبسيطه
انما مشاكل الكهربا دي ديما اسمع عنها لما تكون مركب زينون

انا في جدة ياباشا .. ومش مركب زينون ولا حتى حاطط دبدوب في العربية

**hi_nmr** · 11-01-2015 10:56 AM

للاسف معرفش حاجه في جده انا في الشرقية
بس موضوع الكهربا ده متسيبوش يطول معاك في عندك حاجه ملمسه او حاجه غلط لازم تكشفها وتصلحها بسرعه
ربنا معاك بس ابقي قولنا عملت ايه