عاوز طلب بسيط من خبراء الكومبيوتر :)

**marsguy** · 18-01-2015 01:38 PM

السلام عليكم ورحمة الله وبركاته،،،

عاوز طلب بسيط من خبراء الكومبيوتر :)

أنا حالياً عندي جهاز
Core 2 Due 2.2 GHZ

و Mainboard

MSI P965 Neo (MS-7235)

طبعاً الجهاز دي قديم حبتين بس كان مكفيني جداً عشان أنا كل إحتياجاتي هي الإنترنت وأتفرج على أفلام لكن ماليش في الألعاب خلاص.

أداء الجهاز كان مرضي جدا عشان كان 2 جيجا رام والهارد 7200.

المشكله إن الماذربورد حصل فيها مشكله في فتحات الرامات وغالباً ما بقاش غير في بنك واحد بس هو اللش شغال.

وطبعاً الأداء وحش جداً لما الجهاز بقى 1 جيجا رام

أنا عاوز أشتري جهاز جديد بس مش جهاز كامل عشان أنا عندي هارد جديد 1 تيرا وعندي اcase محترمه وعندي كارت صوت جامد

كل اللي أنا عاوزه هو البروسيسور والماذربورد. وأعتقد إن الرامات اللي عندي مش هاتشتغل مع الحاجات الجديده. ولا إيه؟

أنا عاوزكم ترشحولي ماذربورد نضيفه بس مش حاجه واو يعني عشان أنا زي ما قلت إحتياجاتي مش جباره. أفضل ماركه نضيفه بمواصفات قليله عن ماركه تعبانه بمواصفات عاليه.

وعاوز بروسيسور يقضي الغرض في الإنترنت واليوتيوب والفيديو

ومش عاوز مستعمل طبعاً

يا ترى ترشحولي إيه؟

شكراً

**pepo2011** · 18-01-2015 02:15 PM

مازر بورد Giga Byte H3 -- asus

بروسيسور انتل طبعا كور برضو وزي مانت عاوز كور تو ديو ولا كور اي 3

**abokoko** · 18-01-2015 03:03 PM

ممكن تركب البروسسر على المازر الجديده بس تتاكد من قابليته للتركيب على المازر الجديدة

كمان سؤال

حاليا فى رامات 4 جيجا فهل الكيسة القديمة تقبل رامه 4 جيجا
؟
انا معرفش بس لو تقبل يبقي انت محتاج تبيع الرامة اللى عندك وتشترى رامه 4 جيجا وبس

**marsguy** · 19-01-2015 12:05 AM

المشاركة الأصلية كتبت بواسطة abokoko

ممكن تركب البروسسر على المازر الجديده بس تتاكد من قابليته للتركيب على المازر الجديدة

كمان سؤال

حاليا فى رامات 4 جيجا فهل الكيسة القديمة تقبل رامه 4 جيجا
؟
انا معرفش بس لو تقبل يبقي انت محتاج تبيع الرامة اللى عندك وتشترى رامه 4 جيجا وبس

انا عندي رامات ddr 2 ودي إنقرضت خلاص. وكمان صراحة أنا شاكك بنسبه كبيره إن الماذربورد باظت. عشان أنا إشتريت رامايه مستعمله وجربتها قبل ما اشتريها وبرضه ساعات تشتغل وساعات لأ.

كمان ما أعتقدش إن في رامات ddr2 4 جيجا!

عشان كده شكلي هاجيب مازربورد وبروسيسور ورامات

**marsguy** · 19-01-2015 12:52 AM

المشاركة الأصلية كتبت بواسطة marsguy

انا عندي رامات ddr 2 ودي إنقرضت خلاص. وكمان صراحة أنا شاكك بنسبه كبيره إن الماذربورد باظت. عشان أنا إشتريت رامايه مستعمله وجربتها قبل ما اشتريها وبرضه ساعات تشتغل وساعات لأ.

كمان ما أعتقدش إن في رامات ddr2 4 جيجا!

عشان كده شكلي هاجيب مازربورد وبروسيسور ورامات

إيه رأيكم في الحاجات دي؟

Gigabyte GA-B85-HD3 Socket 1150 Motherboard 800 LE

4 GB RAM 320 LE

Intel Core I3-4130 Haswell 3.4GHz LGA 1150 820 LE

**pepo2011** · 19-01-2015 08:50 AM

اتكل علي الله وانت مغمض انت كده معاك طيارة

**Ahmedmiy** · 19-01-2015 09:04 AM

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

أخونا الأستاذ / محمد سعيد

من إمبارح كنت عايز أشارك حضرتك فى الموضوع بالشورى بس كان الموضوع مش محدد قوى بخصوص الميزانية المتاحة

أولا يا أخى الحبيب أنصحك بتغير الباور سبلاى هو أهم قطع الجهاز على الاطلاق وقد يكون السبب فى تلف البوردة

ثانيا عند شراء الهارد وير الماركة للشركة المصنعة أهم من الامكانيات والأفضل على الاطلاق بالنسبة للبوردة شركة أسوس مع سوكت 1150 الأحدث ، وبالنسبة للرامات كورسير ثم ايه داتا ثم جى سكيل ثم كينج ستون وبالنسبة للباور سبلاى سيسونيك ثم كورسير ثم ايه فيجا وبشكل عام تصنيف الباور بيكون برونزى أو فضى أو ذهبى من الأقل للأعلى وديه شهادات الكفاءة والمعالجات إنتل لان مفيش منافسة

كنت إمبارح سأضع لحضرتك ترشيحات بس الأول عايز أأكد على شراء نسخة ويندوز أصلية علشان منكنش سارقين من شركات أساسا بتضرنا مش بتنفعنا ونقف أمام الله نتحاسب على ده
وفى فكرة حلوة موفرة ممكن شراء نسخة ويندوز 8 برو أصلية وبعد التسطيب التحديث لويندوز 8.1 مجانا الان ، الموضوع بياخد وقت ومحتاج سرعة نت معقولة بس ممكن بعد كده ناخد نسخة من النظام على هارد أو فلاشة علشان نستعيد النظام بسرعة وسهولة بدون مشاكل

وموجود دلوقتى شركة عاملة خصم على نسخ 8 برو قديمة عندها بسعر 600 جنيه وطبعا سعر ال8.1 1.700 تقريبا

وبالنسبة لأماكن الشراء فى موقع معروف موجود فيه الاسعار واسماء المحلات ممكن نتاكد قبل النزول وكمان فى شركات كويسة فى المعاملة وشركات لا وده موجود بالتفصيل على مواقع الهارد وير المتخصصة

بالنسبة لترشيحات القطع بس حضرتك لازم تشوف التفاصيل بدقة قبل الشراء

ASUS VANGUARD B85 Socket 1150 Motherboard = 875

بالنسبة للسعر والامكانيات بوردة ممتازة ورائعة جدا جدا

Asus B85M-E Socket 1150 Motherboard = 750

ASUS H81M-A LGA1150 Motherboard = 520

المعالج

Intel Core I3-4150 Haswell 3.5GHz 3M LGA 1150 Dual-Core Desktop Processor = 875 : 925

وده أحدث حاجة فى فئة اى 3 افضل من النسخة 4130

الرامات الافضل طبعا تردد 1600 والعدد والحجم والماركة حسب التفضيل والمتاح وبشكل عام يفضل تشغيل الراكات كلها على البوردة برامات من نفس النوع

بالنسبة للباور سبلاى

SeaSonic S12II Bronze 520W 80 PLUS Certified PSU = 525

CORSAIR CX500M 500w 80 PLUS Bronze Modular PSU =575

الافضل طبعا يكون واخد شهادة اختبار الكفاءة ولكن ايضا اذا كان بدون شهادة بس من شركة ممتازة حيكون ممتاز جدا إن شاء الله

إن شاء الله تكون موفق فى الاختيار

وأخيرا اتمنى أن تضع ترجمة توقيعك بالعربية بجانب الانجليزية لأنها جملة جميلة جدا

خالص التقدير والتحية لك ولجميع الاعضاء الكرام

سبحان الله وبحمده سبحان الله العظيم

**Ahmedmiy** · 20-01-2015 09:10 PM

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

ما شاء الله مبروك ما رزقك الله

حضرتك إن شاء الله أدخل صفحة البوردة على الموقع الرسمي بتاع الشركة وفيه موقع أسوس مصر أهم حاجة حضرتك تفهم كل إمكانيات البوردة علشان تقدر تتعامل معها وتستفيد منها إن شاء الله وطبعا بعد تسطيب الوبيندوز حضرتك استخدم اسطوانة التعريفات وحافظ عليها لان بيكون عليها برامج حصرية من الشركة وممكن تنزل البرامج من الموقع

بالنسبة لموضوع كارت الفاكس وكارت الصوت أخوك ما ليش أى خبرة فى موضوع كروت الفاكس بس دخلت سيرش علشان أحاول اساعدك بس مش باين أن فيه كروت جديدة أو حديثة للبيع والموضوعات قديمة وكمان أنا حاسس أن كارت الصوت بالنسبة لك أكثر أهمية على كل حال طبعا فى شريحة صوت على البوردة وبتكون أكثر من ممتازة وتكنولوجيا حديثة ممكن تستخدمها موقتا لغاية موضوع الفاكس ده ما يتحل وكمان ممكن أقول لك إذا كنت ناوى تبحث عن كارت فاكس فممكن تروح مول البستان فيه محلات كتير جدا للمستعمل فى الدور الرابع والثالث والثانى وكمان فى شركة فى الارضي امام المدخل الرئيسى أظن اسمها الامير وكمان فيه محلات باب اللوق خد جولة كويسة هناك ممكن تلاقى كارت كويس بمخرج مناسب للبوردة يكون مركون عند محل من دول بس انا حاسس ان الناس بتستخدم برامج فاكس بس مش عارف حاجه عنها

بالنسبة لسؤالك وكلام بائع مضبوط طبعا بدون كارت شاشة خارجى البورده بتستغل البرسيسور كمعالج رسومى وما شاء الله عندك مخارج عديدة للصورة الفائقة وكمان دعم لخاصية 4k الاعلى دقه من التش دى الكامل وكمان البوردة بتشتغل بفئتين أعلى من اى 3 وهما اى 5 وأى 7 وكمان فئتين أقل من أى 3 وطبعا كل فئة من الخمسة دول جواهم موديلات كتير فإن شاء الله يكون الاداء معاك ممتاز جدا جدا وحاول تفهم كل حاجة بدقة وتوظفها مظبوط من برامج وتعريفات وهارد وير
متنساش إن شاء الله تسجل سيريال البوردة على موقع اسوس علشان الضمان وبيكون فيه برنامج مع التعريفات علشان التسجيل أو أعمل حساب على الموقع مباشرة وسجل قبل 30 يوم من تاريخ الشراء ومش عارف باقى القطع ليهم تسجيل على مواقع الشركات ولا لا أتكد واهتم إن شاء الله

ومبروك إن شاء الله فضل الله عليك

الحمد لله أولا وأخرا
الحمد لله
اللهم لك الحمد كما ينبغى لجلال وجهك وعظيم سلطانك

-

الموضوع: عاوز طلب بسيط من خبراء الكومبيوتر :)

LinkBack

أدوات الموضوع

عرض

عاوز طلب بسيط من خبراء الكومبيوتر :) - انشر الموضوع فى :

-

-

-

المواضيع المتشابهه

انقذوني يا خبراء الكومبيوتر

خبراء الكومبيوتر

الى السادة خبراء الكومبيوتر و السوفت وير.

عاوز حل لسماعات الكومبيوتر

الكلمات الدلالية لهذا الموضوع

المفضلات

المفضلات

ضوابط المشاركة