مطلوب استشارة بخصوص صنى الشكل القديم

**siena14** · 12-02-2015 09:32 PM

السلام عليكم

استفسار من خبراء النيسان

سيارة نيسان صنى سوبر صالون موديل 2012 الشكل القديم، 36,000 الف كيلو لسه فى الضمان كمان شهرين. عندى صوت تخبيط قدام فى الارض المكسرة و مع الفرامل بس صوت بسيط .

روحت لواحد بتاع عفشة و ضبط زوايا حبيبى نزل بص قالى كله فله، بس لما لف العجل الى قدام بايده سمع صوت تخبيط و نحره خفيف اوى و بعدين قعد يهز العجلة فى مكانها يمين وشمال و بره و جوه و قالى التيل وحش و عامل النحرة ديه يا و الكليبرات فيها بوش و هاتعوز تتغير . فا يا ترى ايه رأيكم فى التشخيص و يا ترى العيب ده يتعمل فى الضمان و لا لأ.

وجزاكم الله خيرا

**siena14** · 14-02-2015 10:40 AM

ايه‏ ‏يا‏ ‏جدعان‏ ‏محدش‏ ‏معاه‏ ‏صني‏ ‏الشكل‏ ‏القديم‏ ‏و‏ ‏لا‏ ‏ايه

**citadeldeath** · 14-02-2015 01:20 PM

المشاركة الأصلية كتبت بواسطة siena14

ايه‏ ‏يا‏ ‏جدعان‏ ‏محدش‏ ‏معاه‏ ‏صني‏ ‏الشكل‏ ‏القديم‏ ‏و‏ ‏لا‏ ‏ايه

الأخ العزيز،

يفضّل إنك تروح التوكيل تكشف طالما السيارة في الضمان، ولو في مشكلة هيغيروها. أنا مثلاً برضه السيارة موديل 2012 غيرولي المقصات الأمامي مجانًا في الضمان. روح بس وهم إن شاء الله هيقولولك فين المشكلة.

**siena14** · 15-02-2015 12:42 AM

شكراً على الرد يا باشا

مانا هاروح ان شاء الله بس حبيت اعرف اذا حد قابلو المشكلة ديه او يعرف اذا كانت فى الضمان ولا لأ

و بعدين انتا عارف الناس فى التوكيل متخيلين ان الواحد جاى يستلوح عليهم و ياخد حاجات ببلاش مع ان انا مصلحتى ان عربيتى تبقى فبريكا. زى مرة بقول المهندس الاضاءة وحشة و الفوانيس معتمة قالى لأ حلوة سألت واحد تانى قالي اه وحشيين بس مش فى الضمان فا مفيش مصداقية

**acasper3d** · 16-02-2015 11:53 PM

غالبا الموضوع بعيد عن الكاليبر او التيل ... ممكن يكون كوتشة تراب المساعدة مقطوعة جزيئا وده ممكن يسبب صوت ..
او البيض والبطاحات لو الصوت مع لف الدركسيون ,,, او اخيرا المقصات ....

كل العيوب ده لو شرحتها للتوكيل هيقلق ايه الي في العربية ... طالما لسا في الضمان توكيل نسيان عموما محترم ومبيتأخرش ... خليك في التوكيل احسن من عك الصناعية

**احمد فهمى** · 17-02-2015 08:38 AM

انت لسه فى الضمان روح التوكيل افضل واستفيد بالضمان

**هيثم عابدين** · 23-02-2015 05:49 PM

بص علي كاوتشه التراب الإماميه فوق المساعد غالبا حتبقي مقطوعه و تمن الإماميه تقريبا ١٠٠ جنيه و خمسين جنيه مصنعيه تغيير لانه بيفك المساعد غير كده صعب قوي تبقي في حاجه بايظه لان ألعربيه مشيت قليل قوي