الموضوع: نقل تجربة تركيب شداد خلفى

احد الاصدقاء ادانى هدية الاسبوع اللى فات و هى عبارة عن شداد خلفى

الشداد الراجل عاملة بنفسة و هو مجهود يشكر علية... انا الحقيقة كنت متشكك فى مدى فاعلية الشداد او حجم الاضافة اللى هيضيفها الشداد لاداء العربية خصوصا انى مركب شداد امامى و فارق معايا كتير



الشداد ببساطة هو بار حديد و راكب فى كل طرف من اطرافة خوصة حديد بتوصل بينالبار و بين المساعد و متثبت بمسمارين 17



انا ركبت الشدادا بنفسى و تركيبة سهل جدا جدا بس انا كنت اجازة بعدها بيومين فا مجتش فرصة اجرب... يوم الخميس كنت راجع من الشغل و مشيت على الوصلة اللى بين الدائرى و جامعة القاهرة... الوصلة فيها كذا ملف قوى و بيتاخدوا على سرعات عالية فا كانوا اختبار كويس بالرغم من انى مكنتش عامل حسابى انى اجرب على الطريق دة لان انا دايما بختبر الحاجات دى على طريق المقطم

المهم يعنى خلال الطريق على الوصلة حسيت ان فعلا الشداد عامل فرق كبير فى اتزان العربية فى الملفات و قدرتها على تغيير اتجاها اتحسنت كتير... ميلان جسم العربية داخل الملف قل بشكل ملحوظ و دقة توجية العربية ارتفعت جدا

معتقدش انى هبقى ببالغ لو قولت ان الشداد الخلفى عمل تاثير اكبر من الشداد الامامى فى اللفات... و كل دة ظهر و انا لسة مجربتش البار زى الناس... الكلام دة احساسسى بالعربية و انا راجع من الشغل و مش فى دماغى اصلا تجربة او جرى ولا اختبار... هى جت بظروفها كدة

حساسية الدركسيون ارتفعت جدا و دقة توجية العربية بقت احسن بشكل ملحوظ... اللى انا مستغرب له فعلا هو مقدار الفرق اللى عملة البار فى حساسية التوجيه و الاتزان على الطريق مقارنة بالامامى... واضح ان عربياتنا دى مش متينة من ورا زى قدام و دة فارق فى الhandling بتاع العربية كتير

دى تجربتى المتواضعة... حبيت انقلها ليكم

MMamdouh