الموضوع: نيسان اوتو ايجيبت ترد ثمن نيو صنى لاحد عملائها المتضررين من عيب صناعة التيل والطنابير

ألف ألف ألف مبروك ... ربنا يطمئن قلوبكم على إن فيه أمل إن الحق يرجع لصاحبه ... صحيح أنا مش من ملاك العربية ... لكن للإسف لسه عامل حادثة بعربيتى يوم 10/فبراير/2015 نتيجة إن الفرامل ماأشتغلتش و التوكيل عندنا طبعاً بيرمى المسؤلية عليا كاملة رغم إنى تقدمت ليهم بأكتر من شكوى و رحتلهم أكتر من مرة شاكياً من طريقة عمل الفرامل فى عربيتى و ما أخدتش منهم غير "كل تمام التمام" و لما طلبت كتابة شكوتى - اللى هيا نظام عمل الفرامل و خاصية الإيه بى إس - فى شيت العمل الخاص بدخول العربية للكشف حدث تطاول من احد موظفين الشركة المحترمة و الشركة نفسها مكلفتش نفسها عناء الإعتذار لما بلغتهم, لغاية ماحصلت الحادثة و قاعدين يقولوا أى كلام فاضى متضارب لإلقاء المسؤلية على عاتقى.

شكراً يا استاذ محمد على إستمرارك للنهاية و شكر واجب لموقع نايل موتورز على حياديته و مساندته لقضية الإستاذ محمد, و بالرغم إنى قبل ما أقرأ الموضوع ده كنت مجهز نفسى لمعركة طويلة الأمد و على جوانب مختلفة قصاد التوكيل اللى بيماطل و يسوف و مش عايز يبلغنى بقراره النهائى لنتيجة فحص العربية, لكن خبر زى ده بيزيد الواحد إصرار و قوة فى الخطوات اللى هاتخذها ضدهم.

عربيات فى السعودية بيقل ربع تمنها علشان فانوس مايل عن الشاسيه و التاجر بيعرفك ، انما هنا...ربنا يرحمنا

الف مبروك .....انا متابع موضوع حضرتك من اوله و كنت متأكد انك حاتوصل لنتيجة فى معركتك رغم الردود الغريبة اللى كنت باشوفها و تتميز بشئ غريب عند بعض الناس و هو ان كل واحد بيدافع عن ماركة سيارته كأنها فرد من أسرته مايعرفش ان عيوب التصنيع شئ وارد....دون الدخول فى تفاصيل الف مبروك مرة تانيه

من المؤكد ان متابعة المشكلة من جانب نايل موتورز كان له اكبر الاثر فى انتشار الموضوع على مستوى جعل الاستجابة لطلب محمد يقابل بنوع من الجدية من الشركة شكرا نايل موتورز
والف مبروك ل محمد على عودة حقك واهنيك على تمسكك بالوصول الى حقك كاملا
بالتوفيق

المشاركة الأصلية كتبت بواسطة Samah Mohammad

ما ضاع حق وراءه مطالب
وده اللى عمله محمد مؤمن في مشكلته مع اوتو ايجيبت نيسان
واللى قام بعرضها على صفحات المنتدى والفيس بوك والصحف وهو متمسك بحقه رغم كل الهجوم اللى اتعرضله من ناس كتير
واللى طال نايل موتورز وادارته جزء كبير منه
محمد مؤمن احد ملاك نيو صنى الذين يعانون من مشكلة التيل والطنابير اللى بينكرها ناس كتير واولهم التوكيل وبيرموا المشكلة على العميل ويقولوا ده عيب سواقة وسوء استخدام الخ
تابعنا مع محمد المشكلة يمكن من غير هو ما يعرف اننا متابعينه
واللى بدات بمحاولة التواصل مع التوكيل والتوصل لحل للمشكلة مرورا بالتصعيد لحماية المستهلك
والجلسة ذات الجملة الشهيرة " مش تجيب بوسة قبل ما تمشى " ونهاية ب احالة الشكوى للنيابة العامة
ده لينك الموضوع

http://www.nilemotors.net/Nile/454228-2014-3.html

محمد مؤمن فضل متمسك بحقه للنهاية ومتراجعش عن قراره او طلبه والذى تمثل في

شهادة بسلامة العربية تفيد بمطابقة التيل والطنابير للمواصفات القياسية العالمية، وتحليل للمواد المصنوع منها التيل والطنابير
أو تسترد نيسان سيارتها وترد لمحمد فلوسه

ولان محمد صاحب حق مفرطش في حقه ربنا اكرمه واخد حقه
واليكم المشهد الاخير من " تحدى نيسان "






التفاصيل على لسان محمد مؤمن

قاعد لا بيه ولاعليه، و من حيث لا أدري ولا أحتسب حصل التالي:

1- التليفون رن .... اتصال من رئيس مجلس إدارة شركة نيسان وطلب تحديد موعد للوصول لحل للمشكلة، حددنا موعد
وذهبت إلى شركة نيسان وتم عقد اجتماع لمدة 4 ساعات في حضور " رئيس مجلس إدارة الشركة – مدير خدمة مابعد البيع – مدير التسويق – مدير العلاقات العامة) وكانت البداية باعتذارهم جميعا لي عن كل ماحدث معي من سوء تعامل في توكيل أتوإيجيبت وعلى التليفون من خدمة مابعد البيع.
وبعدين قالوا أيه اللي يرضيك؟ (الكلمتين دول حسسوني بشعور المحارب وهو بيتفاوض بعد مكسب أرض)
فلتلهم إن المشكلة مش فردية المشكلة مشكلة 407 واحد غيري، كل واحد يمكن يكون عنده مشكلة غير التاني واللي يرضيه غير التاني، وأنا كلامي واحد من أول يوم ولا أريد زيادة أو نقصان عنه ولا أبتز الشركة بأى شكل من الأشكال " يا الشهادة يا فلوسي"
فكان الرد الذي تقف الكلمات عاجزة عن وصف سعادتي بسماعه، واللي تحس بعده كأنك كنت ماشي في الصحراء بقالك أيام عطشان وجعان وفجأة لقيت الواحة
رد رئيس مجلس الإدارة: سنحل مشاكل العملاء كلهم وأكد لي إن عربيتي آمنة " وإن مفيهاش أى مشاكل لكنه لاتوجد شهادة بذلك" فاحترمت منه شرحه ولكني أخبرته أنني لن يكون باستطاعتي ركوب السيارة بعد ذلك.
وباق الساعات الأربعة كان لوضع خطة لحل مشاكل العملاء، والحقيقة أن الناس كان يسمعون باهتمام وأخذوا كل النقط في الاعتبار، وتم مجازاة الموظفة اللي قفلت السكه فوشي - بالرغم إني والله مكنت شايل منها خالص وبالمناسبة طلعت هيه نفس الشخصية اللي كانت في جهاز حماية المستهلك بتبتسم بسخرية.
2- سلمت الشركة الملف " اللي عملاء نيسان كانوا متضررين فيه بشكواهم " عددهم 407 شخص، وبالفعل تم التواصل مع الكثير منهم من خلال شركة نيسان وانتظرت مدة 14 يوم لم أكتب أى خبر، حتى أتأكد أن ذلك تم بالفعل (طبعا ماتصلتش بـ 407 شخص) بس جربت اكلم ناس بشكل عشوائي ولقتهم بالفعل كلموهم وحددوا مواعيد لحل مشاكلهم – ولو في حد متصلوش بيه أنا معاه للآخر ومش هسيبه (مادام ليه حق).
3- قامت شركة نيسان بتخصيص توكيل نيسان بأبو رواش في الجيزة وتوكيل آخر بالاسكندرية للتعامل مع المشاكل التي سلمتها فقط للتأكد من حسن التعامل مع 407 حالة وحل مشاكلهم وإرضائهم كما يشائون.
4- أكدوا لي إن عربيتي آمنة وأقسم لي مدير خدمة مابعد البيع ان الشهادة التي أطلبها غير موجودة، وبشياكة منهم عرضوا على خدمات الصيانة للسيارة والتعامل ك VIP مدى الحياة أو استبدال السيارة بفئة أخرى أعلى سعرا، و رفضت بشياكه وأخبرتهم اني على موقفي من الشهادة – اللي بالمناسبة القانون المصري ولا وزارة الصناعة معندهمش أى حلول لحاجه زى دي لإني زى مقلتلكم قبل كده لما رحت إدارة الرقابة على الجودة والمواصفات القياسية أخبرني المهندس المختص أن هناك 159 مواصفة عالمية للسيارة مصر تطبق منها 11 فقط – فمدام مفيش شهادة فأنا لن أستطيع أن أقود السيارة.
5- جائني اتصال بعد 3 أيام من توكيل أوتوإيجبت – بالمناسبة نيسان نفسها متبعش ولابتشتري - أعتذروا فيه عن كل ماحدث معي من سوء معامله، وقدروا تضرري النفسي - صحيح قدروا بعد 74 يوم بس مفيش مانع - من ركوب السيارة حتى وإن كانت آمنة ، وأخبروني بأنهم سيستردوا العربية وحددوا موعد لذلك، ومكدبش عليكم طول السكة كنت بقول أكيد في مؤامرة .... ولكن الحمد لله ذهبت في الموعد واستلمت فلوسي كاملة مكملة

6- أنا خت حقي الشخصي ، وهفضل بإذن الله مع أى حد للنهاية بشرط يكون لي حق ويكون عايز ياخد حقه، لحد مياخده بإذن الله وفقاً لاستطاعتي، خصوصا الــ "7" اللي حضروا الاجتماع، وهتفضل صفحة " عايزين حق المصريين من نيسان" زى ماهيه مفتوحه كضامن لكل واحد عنده مشكله " من الناس اللي سجلت" لحد متتحل، وللأنصاف والله على ما أقول شهيد فرئيس مجلس إدارة شركة نيسان يتابع من وقت لآخر ويستفسر إن كان لسه في مشاكل باقية ولا لأ، إنما اللى مش عايز حقه وقاعد بيتفرج علينا ومستنى الفرج فعليه أن يعتمد على نفسه، فالكلام بتاع هنجيب للناس الحقوق حتى لو همه مش عايزنها كلام أثبت فشله فيما هو اكبر من التيل والطنابير، فلن أكرره فيما هو أصغر، وإنما على الناس أن تجتهد للحصول على حقوقها فما يأتي سهلا يذهب أسهل. " ولئن جاء نصر من ربك ليقولن ياليتني كنت معهم" !!!


الف مبروك لمحمد مؤمن ده مش بس نجاح ليك ده نجاح لكل صاحب حق متمسك بحقه
وقوة دفع وباب امل لكل صاحب حق انه يتمسك بحقه ويسعى لتحقيقه

و ايضا شكرا نيسان شكرا أوتو ايجيبت انكم تداركتم الموقف واعترفتم بان فى مشكلة وانها مش عيب استخدام و بدأتم التواصل مع أصحاب المشاكل وحل مشكلاتهم بشكل مرضى
وهو ده كان هدفنا من البداية اننا نوصل صوت الناس ونوضح حجم المشكلة للتوصل لحل يرضى كل العملاء

لو انت صاحب حق اتمسك بحقك واسعى عشان تاخده واحنا معاك طول ما انت صاحب حق لحد ما توصله