استفسار بخصوص كاوتش وجنوط الفيرنا

**mohamedvip** · 22-02-2015 03:34 AM

السلام عليكم ورحمة الله وبركاتة
انا معايا فيرنا 2014
انا مركب الجنوط والكاوتش الاصليين
المهم فى ناس نصحتنى وقالت غير الجنوط والكاوتش وناس تانية نصحتنى وقال غير الكاوتش فقط وناس قالت لا خليك فى الاصليين احسن.
انا بقى عايز اخد رايكم فى الموضوع دا تنصحونى بأية اغير الكاوتش والجنوط ولا الكاوتش فقط ولا اخلينى فى الاصليين بتوع العربية ؟
ولو هتنصحونى بتغيير الجنوط والكاوتش او الكاوتش فقط ياريت تدلونى على نوع كويس ولو امكن السعر التقريبى للجنوط والكاوتش.
ياريت ياجماعة اللى يساعدنى يكون عن تجربة يعنى يكون جرب الاصليين ويكون جرب غير الاصليين عشان اكيد اللى جرب هو الوحيد اللى هيكون لاحظ الفرق.

**elkorany** · 22-02-2015 05:26 PM

وعليكم السلام
انا معايا فيرنا 2013
مشيت على الكاوتش الأصلى 30000 كيلو
الكاوتش الأصلى كان صينى ماركة مش معروفة وكان زبالة الزبالة
ومعرفتش قد ايه وحش الا لما ركبت كاوتش جديد
انا ركبت كاوتش جى تى اندونيسى ب 410 جنيه من حوالى 3 شهور وممكن يكون غلى علشان سعر الدولار

قصة الكاوتش الجديد كبيرة حبتيين

انا دوخت زيك كدا ولفيت وسمعت من ناس كتير

انا فى النهاية ركبت جنوط حديد (الحديد احسن وابرك من الجنوط الأسبور الرخيصة لأن سعر الأسبور الكويس مش هيكون اقل من 3000 جنيه للطقم العدل والكويس اغلى)
بعد لف ودوران ودوخة
ركبت جنوط التويوتا كورولا اللى هى 2007 او يارس الشكل القديم
انا ركبت جنوط 14 بوصة حديد بتاع الكورولا وعرضها خمسة ونص بوصة
ممتازة الحمد لله
وثبات كويس جدا
الحمد لله

الكاوتش بقى

ممكن تركب مقاس
14-60-185
وده المقاس الأصلى
وانا ميال ليه

بس انا ركبت مقاس
14-65-185
وده رفع العربية حوالى 1 سم زيادة ورحمنى من حك المطبات بتاع البلد

انا ركبت المقاس ده علشان المطبات

ولو مفيش مطبات (وده مستحيل فى مصر)
كنت هركب المقاس الأصلى
غيرت الكاوتش والجنوط من حوالى 5000 كيلو
وكله تمام بفضل الله
مفيش اى حكة فى الرفارف حتى لما احمل العربيات بأقصى حمولة سواء اشخاص او حجات فى الشنطة

المقاس ممتازاللى هو 14-65-185
ارتفاع العربية عوضته بتعريض الكاوتش والجنوط

الموضوع متوازن لحد كبير جدا
حتى سرعة 120 كيلو اقصى سرعة مشيت عليها لحد الأن من يوم تغيير الكاوتش
ويومها اتنشيت مخالفة سرعها
الحمد لله

انا ارشحلك تغيير الجنوط بأعرض ومقاس 14
والكاوتش غيره

الكاوتش والجنوط الأصلى كان مبهدلة العربية
وكان فيه هزة جامدة فى الدريكسون على سرعة 30 كيلو
طبعا غير الهزة اللى على سرعة 120 بتع الترصيص

بعد التغيير هزة ال 30 كيلو اختفت بفضل الله

وبعد الترصيص العربية ممتازة

الحمد لله
أسف للاطالة
بس الموضوع يستاهل الشرح الوافى

ربنا معاك

**elkorany** · 22-02-2015 05:30 PM

نسيت
بلاش تركب جنوط 15
هيكون ارتفاع الكاوتش اقل
وهيبهدل العفشة وهتحس بالطريق اوى
ال 14 عملت المطلوب منها وحسنت ارتفاع وثبات اعلربية بشكل كبير جدا

**mohamedvip** · 22-02-2015 09:45 PM

اولا شكرا لحضرتك على الاهتمام والمشاركة
طيب حضرتك الاربع جنوط عملو معاك كام والاربع كاوتشات عملو معاك كام
يعنى كلفوك كام الاربع جنوط والاربع كاوتشات
وفعلا ناس كتير قالتلى غير الاصلى هتحس بفرق كبير وانا قلت اسئل هنا لانى هلاقى الاجابة المفيدة عن استفسارى لان لو سئلت تاجر كل واحد هيشكر فى الحاجة بتعتو وكلو عاي يبيع وخلاص

**elkorany** · 23-02-2015 10:54 AM

الأربع جنوط الحديد
شاريهم استعمال الخارج
بتوع الكورولا 2007 او اى موديل شكلها
تمام مقاسهم يعنى قطر الجنط 14 بوصة عرض الجنط خمسة ونص بوصة
الجنط ب 100 جنيه
الأربعة ب 400
فردة الكاوتش
ب 410 وضيف عليهم بلف حديد وتركيب 15 جنيه كمان
يعنى 425
نوع الكاوتش جى تى اندونيسى
مقاس 14-65-185

الكلام ده من حوالى 3 شهور اى اكتر شوية

بالتوفيق