الموضوع: ●اعطال الجيب والصيانات ( تجارب الأعضاء )●

المشاركة الأصلية كتبت بواسطة 7masa

بس فيه حاجه مش عارف سببها ايه لحد دلوقتى بتحصل معايه :
لاما باجى ادوها الصبح مبتدورش علا طول بتطول سنيتين تلاته كده
بس لامه بديها سنت مرش بسيطه خالص وبعد كده اجى ادورها تانى تدور من اول لقطه علا طول
مش عارف ايه السبب
((( ياريت محدش يخلى اى ميكنيكى او كهربائى مش بتاع جيب يمد ايده ف عربيته ))

شوف البوجيهات الأول ولو مافيش نتيجة يبقى احتمال كبير تكون البوبينة

المشاركة الأصلية كتبت بواسطة م/أحمد عبد الفتاح

بصراحة موضوع اعطال العربيات بصفة عامة حالياً بقى يمثل مشكلة فى مصر والعالم بس فى مصر الموضوع زايد كتير وده نتيجة التقدم المذهل فى صناعة السيارات وصعب دلوقتى إننا نشخص الأعطال عميانى :) دلوقتى بقى فيه كمبيوترات وسكانرات تحدد أرقام وأكواد الاعطال والكلام ده من زمان على فكرة بس احنا فى مصر إضطرينا نسايره من فترة قريبة بس سايرناه بطريقتنا بتاعة الفهلوة اللى مبقتش تنفع مع العربيات دلوقتى .
وأنا هنا حاشارك بموضوع يمكن يفيد شوية فى موضوع الاعطال والاكواد بتاعتها :
- دلوقتى لما بيحصل عطل فى اى عربية بتنور فى التابلوه لمبة تحذير واللمبة دى حاجه من اتنين :
(١) لمبة التشيك انجن check engine
(٢) أو لمبة تانية زى لمبة مثلاُ الايرباج او الـ abs ودى مش بتخلى لمبة التشيك انجن تنور
- لما لمبة التشيك انجن تنور بيبقى فيه عطل فى مجموعة الموتور او الفتيس او نقل الحركة و يبقى لازم نروح لميكانيكى او ورشة صيانة عنده سكانر او كمبيوتر بيوصله فى العربية على فيشة اسمها obd2 ودى بتبقى جوه العربية تحت الدركسيون فى الغالب او جنب الفتيس او تحت درج التابلوة اللى قدام الكرسى اللى جنب كرسى السواق- علشان نعرف ايه العطل ونصلحه.
- لو لمبة تانية نورت غير التشيك انجن زى مثلاً لمبة الـabs بتبقى عاوزة سكانر متقدم شوية يقرا اعطال غير اعطال الموتور والفتيس علشان يقولنا اى جزء فى منظومة الـ abs فيه مشكلة زى السنسورات بتاعة الـ abs واللى أحياناً يطلق عليها سنسورات السرعة ودى بتبقى موجود منها سنسور على كل عجلة فى الغالب فالجهاز حايقدر يقولك اى سنسور هو اللى فيه المشكلة علشان تروحله على طول وتشوف مشكلته ايه عاوز نضافة مثلاً او فيشته مخلوعه او بايظة.
- أكواد الأعطال اللى بيقراها الاسكانر اللى عند الميكانيكى او فى مركز الصيانة دى متفق عليها عالمياً بإنها تكون عبارة عن حرف واربع ارقام زى مثلاً p0300 أو b1311 وتفسير الحروف والارقام دى بيسهل شوية الوصول للعطل - وتفسير الكود ده كالأتى :
(١) اول حرف بيبقى حاجه من اربعة :
أ - حرف الـ b وده بيرمز لأعطال مجموعة الجسم body
ب- حرف الـ c وده بيرمز لأعطال مجموعة الشاسية chasis
جـ- حرف الـ p وده بيرمز لأعطال مجموعة المحرك والفتيس ونقل الحركة power train
د - حرف الـ u وده بيرمز لأعطال خاصة بالإتصال بين الأجزاء الإلكترونية فى السيارة.
(٢) بييجى بعد اول حرف رقم والرقم ده حاجه من اتنين :
أ - رقم 0 وده للأعطال المتفق عليها من رابطة مهندسى السيارات sae
ب- رقم 1 وده للأعطال المتفق عليها من رابطة مصنعى السيارات mfg
(٣) الرقم اللى بعده بيبقى من ١: ٨ وهم على التوالى : ١ ، ٢ خاصين بمجموعة الهوا والوقود - ٣ خاص بأعطال الرشاشات والميس فاير - ٤ خاص باعطال مجموعة العادم زى حساسات الاكسجين مثلاً - ٥ خاص بأعطال مجموعة التحكم فى السرعة والأيدل - ٦ خاص بدوائر الكمبيوتر - ٧ ،٨ خاصين بمجموعة الفتيس ونقل الحركة
(٤) اخر رقمين من ٠٠ إلى ٩٩ بيبقى رقم العطل فى المجموعة وساعات بيدل على رقم السلندر زى اعطال الميس فاير بيقولك السلندر رقم كام هو اللى فيه المشكلة زى مثلاً الكود p0302 وده معناه عطل فى مجموعة الموتور ونقل الحركة ( حرف p) - والـ 0 معناه انه متفق عليه من رابطة مهندسى السيارات - والـ 3 معناها عطل خاص بأعطال مجموعة الرشاشات والميس فاير - والـ 02 معناه الإسطوانة رقم ٢ هى اللى فيها ميس فاير .

حاليآ الموضوع تطور عن كده العربيه اصبحت بتكتب لك كمستخدم العيب كامل يعنى نقص لتر زيت ومحتاجه تزودو قيمه معينه وضغط الهوا نقص بنسبه معينه او سنسور معين باظ وده المستقبل بس شريحه عاليه من السيارات رانج روفر والفئه السابعه والخامسه بي ام والمثيلات لكن احنا عندنا حاليآ مشاكل بنحلها بالاحساس وده بسبب الخبره ومحتاجين نشرح كل تجربه ومشكله حصلت معنا ونوضح الاعراض وازاي اتحلت وان شاء الله نفيد ونستفيد