الموضوع: الوقت بقى مناسب إنك تبلغ شكوتك لبيجو فرنسا

كتير مننا قابلته مشاكل مع شركة CDCM الوكيل الرسمى لشركة بيجو فى مصر, ولوقت طويل كل تحركاتنا كانت تحركات فردية و باءت بالفشل لمحاولة التواصل مع التوكيل لتقديم خدمات أفضل بعد البيع و لرفع المستوى الفنى للعاملين به بما يمكنهم من حل مشاكلنا.

كانت فيه محاولة جماعية قمنا بها من حوالى عام http://www.nilemotors.net/Nile/414762-301.html لكن للإسف لم تحقق أهدافها, اللهم الحصول على غطاء وحدة الكنترول مجاناً, والذى أراد التوكيل محاسبة العملاء عليه على الرغم إنه توافر فى أول نزول للبيجو 301 مجاناً.

الهدف من الموضوع ده إن كل ملاك البيجو - بدون تحديد أو تخصيص لموديل بذاته - إنهم يتقدموا إلى شركة بيجو فرنسا بمطالبهم و شكواهم من الوكيل المصرى. و على وجه الخصوص من خلال صفحتهم على الفيسبوك و التى قمت أنا أيضاً بتقديم شكوتى عليها بسبب الحادثة التى تعرضت لها بسبب عدم عمل نظام فرامل سياراتى البيجو 301, وهو ماكان يجب أن يحدث لعدم إهتمام التوكيل بفحص و إصلاح وحدة فرامل سياراتى رغم ذهابى إليهم عدة مرات http://www.nilemotors.net/Nile/459295-301.html

أنا تواصلت مع بيجو فرنسا بصورة مكثفة و أرسلت لها قدر ما إستطعت من لينكات الموضوعات لشكاوى ملاك العربيات البيجو من خلال مراسلاتنا http://www.nilemotors.net/Nile/459295-301-7.html لكن لابد من تواصلكم مع بيجو فرنسا بصورة مباشرة و إخبارهم بمشاكلكم ليقوموا بالإشراف على رفع المستوى الفنى للتوكيل و رفع مستوى خدمة ما بعد البيع.

ده لينك بيجو فرنسا على الفيسبوك: https://www.facebook.com/Peugeot

و ده لينك شكوتى لبيجو فرنسا على الفيسبوك من توكيلها فى مصر, تقدر برضه تضيف تعليق عليه بالمشكلة اللى قابلتك و أهم حاجه تحدد فى التعليق إنك من مصر: https://www.facebook.com/photo.php?f...e=1&permPage=1

الخطوة دى مش هاتكون كفيلة برفع مستوى توكيل بيجو بس, لأ, هاتكون بداية لرفع مستوى باقى التوكيلات, و بأيدينا بعد مشيئة ربنا إننا نكون الشرارة و نقطة البداية لغد أفضل لينا كلنا.

و أسيبكم مع محمود المليجى على لقاء إن شاء الله
[youtube]http://www.youtube.com/watch?v=qAdREJmdYSQ[/youtube]

المشاركة الأصلية كتبت بواسطة abohend

أنا اشتريت العربية (بيجو 301 مانيوال) في شهر 2-2014
بعد 4000 كيلو و أقل من تسع شهور أستخدام بدأ يظهر مشكلة في الفتيس
بيعلق و ميرضاش يدي مارشدير
رحت عملت صيانة 10 آلاف بدري عشان أشتكي من الموضوع ده و أبقى عملت اللي عليه و أتبعت شروط الضمان (الإبلاغ عن أي عطل فور ظهوره)
للأسف مفيش جديد
المهندس في الأستقبال يجرب معاك العربية...يحس بالمشكلة و يوعد بالحل
يدخل الورشة و يطلع إنسان مختلف و كأن تم تنويمه مغناطيسياً...العربية تمام يا أستاذ
ابقى نزل الدواسات لتحت عشان بتحوش بدال الدبرياج
تجرب معاه تاني من غير دواسات خالص....أه كده فهمت قصدك ايه
يدخل الورشة و يطلع......العربية زي الفل مفيهاش حاجة و لو حصل أي حاجة أحنا تحت أمرك
طبعا ده بعد ميكون فات 5-6 ساعات و انت ملطوع بره
و هو ده التكتيك
زهق العميل لحد ميروح من غير ميحل المشكلة
و الرد السحري.....فوت علينا بكرة
و كأني رئيس جمهورية نفسي و مفيش ورايا شغل و لا إلتزامات

الخلاصة:

• لم يتم حل المشكلة

• لم يتم إثباتها بأمر الشغل (عشان ميبقاش في دليل لو الفتيس باظ و طلبت أستبداله داخل الضمان)

و الله المستعان على توكيلات السيارات و معارض السيارات و جهاز حماية المستهلك و كل مشارك في المنظومة المهببة دي

ربنا يكرم و إن شاء الله مشكلة التفيس دى تتحل عن قريب, و عسى إن يبقى فيه تضامن ما بين ملاك العربية للدفاع عن حقوقنا زى ماحصل من حوالى سنة, لإن حرام نبقى دافعين الفلوس دى كلها و نفضل قاعدين فى قلق و تتعرض حياتنا و حياة أسرنا للخطر.