الموضوع: معرض أتوماك فورميلا الاهرام لعام 2015 !! عيوب تغلب المميزات

السلام عليكم ورحمة الله
الأغلب منا قام بزيارة معرض أتوماك فورميلا الأهرام للبحث عن ما هو جديد ، معرفة أخر الأسعار والعروض ، مشاهدة الsuper cars على الطبيعة حيث يندر وجودها فى مصر

أولاً الدخول ..
الدخول للمعرض سهل وسلس ولم تواجهنى اى عقبات حتى وصلت للبوابات الداخلية للمعرض و بمجرد الدخول وجدت الارض الغير مستوية او ممهدة فعند الدخول يجب النظر اسفل قدمك اثناء السير لكثرة الاسلاك الممدة ذات الحجم الكبيرو الكثير منا الزوار اتكعبلو فيها + اغلبها بارز تحت سجاد الدخول - بجانب الخشب البعض من اجزاءة غير مستوية فدائما السير بحذر

ثانياً بمجرد الوصول لبداية المعرض واجهنى مشهدين لم اعتاد على رؤيتهما من قبل

اولاً نصبة الشاى والمشروبات وشكل غريب فى مدخل معرض السيارات
شركات السجائر الشوفتها مرتين

ثالثاً البخل الشديد فى اعطاء اى تذكار اى من الشركات وحتى اغلب المجلات مثل عربيتى وغيرها ب 10 جنية وغير مجانية مثل ما كان يحدث سابقاً !

الشركات البتعطى هدايا بمجرد ملىء كوبون هى Fit & Fix
وكارت تخفيض فقط

اغلب الهدايا او التذكارات غير متوفرة فى اى مكان فى المعرض ولازم الطلب ومش بتطلع بسهولة للذائرين واخرها شنطة :) بعكس السنوات السابقة

مفيش اى عروض جذبتنى اغلبها الاعتيادى واغلب الاسعار تخفيض بسيط فقط لبعض الشركات واوقات كان بعض السيلز بيقول تخفيض ولما اسال على السعر الاقية هو نفسة سعر السيارة قبل المعرض

بعض السيلز فى الشركات مش ملمين بالمنتج البيسوقو لية وبعض العارضين قاعدين داخل العربية كانهم متفرجين وشغالين على الموبايل ودة شوفتة فى شركات صينية

الاغرب ان السيلز فى منهم خدومين جداً وفى منهم مبيناقش او بيفهم زى شركة سوزوكى مثلاً لما وضحتلهة موضوع الهورس باور لسيارة زى السياز غضب بل لما وضحتلة معلومة معرفش يرد وكل العملة قالى انت شوفت دة فين قولتلة موقع السيارة الرسمى للسيارة فى الهند زعل و قام سايبنى ومشى !!

البعض مبيفهمش وفى سيلز يكلمك وهو قاعد مش بيجى معاك يشرحلك العربية او مواصفاتها اية دة غير انت اللازم تدور على حد مش بيجولك الا بعض الشركات القليلة جداً

قابلت شباب فى قسم بى ام بيبتسم اكثر ما بيفيدك ودة شىء متوقعتوش لما اسال عن معلومات او سعر يقولى سيب ايميلك او رقمك وحبعتلك البيانات طب انت وظيفتك اية .؟

-- السيلز مش واقفين جمب عربياتهم

معجبنيش نقص البرشورات فى بعض الشركات وفى شركات كانت مكسلة تضعهم فى مكان واضح لازم تقف تطلبة وطبعاً فى وسط عدد ومش موضحين اى اسعار داخل اى برشور فى المعرض وفى احد الشركات سألت على اى برشور ليهم قالى احنا جايبين 5000 وخلصو اول يوم انتو محتاجين مليون دة فاكس مش فاهم يعنى اية معرض اصلاً


ملاحظتى كثرة الشركات الصينية هذا العام وماركات اول مرة اسمع عنها او اشوفها على حساب شركات كثير متغيبة او كنت متوقع اشوفها فى المعرض


# كل ما هو غالى فهو مغلق
اغلب السيارات البتحذب نظر الحضور فى شركات زى مرسيدس - جاكوار - الفا روميو - بى ام - بنتلى - سوبارو وغيرها مغلقة طب انتو جايين المعرض لية ؟ ولية سياسة فتح سيارت وغلق الباقى يعنى انا مش جاى المعرض علشان اتفرج عليها وهى مقفولة انا جاي اركب العربية واتفرج على الانتريور اعرف المواصفات

ولية احاطة السيارات بالشكل دة وكان الناس حتكسرها !! والاغرب فى شركات ثانية زى سويارو قافلين فيها عربيات برضو

علماً انى فى معارض كبيرة فى الشارع بتبقى العربيات دة متاحة تشوفها براحتك من الداخل والخارج

الجارد الواقف ممنوع اللمس حتى او تقف جمب اى سيارة تتصور بجانبها جاكوار او الفا روميو وبمجرد ما تعمل كدة حيتزعقلك يا استاذ وبعدين ودة شوفتة حصل لناس امامى وكسفهم !! اقف من برة الزجاج ومتلمسش حاجة



الاسعار شايفها مبالغ فيها السنة دة ومتشجعش على الشراء
اغلب التغييرات فى الشكل الخارجى وبتنزل السيارة بنفس الجيربوكس والمحرك مفيش اى تنوع وشوفت دة فى مازدا - فورد - وبعض الشركات الاخرى كانة قالب ماشيين علية بصراحة سوق تعبان جداً مفيش غير بى ام ومرسيدس - مينى كوبر - الفا روميو- لاند روفر وغيرها فى تنوع فعلاً ومن صالات العرض العجبتنى فى المعرض

فى شركات كتير مفتقدينها فى مصر نشوف ليها سيارات فى المعرض بدل ما كلة صينى كدة وياريت الشركات الكبيرة زى MTI تنزلنا سيارات اكثر سوبر كار داخل المعرض ويبطلو شغل الاحاطة كان العربية مفخخة
فين فيرارى - بورش - لامبورجينى - اودى

اجهزة ال simulator لتجربة سيارات الفورميلا محتاج عددها يزيد علشان ميبقاش فى طوابير بالشكل دة 2 فقط غير كافيين

مفتقد العروض الخارجية ذى الكانت بتقام من قبل لشركة جيب وكان فى تنوع وحركة وتجربة للذائرين للسيارات

الناس كلها زوق فى المعرض ومرحبين جداُ