معايا 30 الف ،، و عاوز فى خلال 12 ساعة بالكتير اكون استقريت على نوع عربية اشتريها

**Ladawy** · 17-03-2015 02:57 PM

الســـلام عليكم

حبايبنا الكرام ،،

انا بقيت قديم معاكم لدرجة انى بقيت بدخل ابص على مواضيع الاعطال و الصيانات للزملاء :)

انا عاوز اشترى عربية ،، معايا 30 الف ( يمكن ماكملوش كمان ) ،، و دى كل و كامل الميزانية
====

- دى اول عربية ليا ، العربية اللى هاتعلم السواقة عليها ( انا بسوق بس على خفيف )
- جايبها لمشاوير الشغل ( تقريبا 40ك رايح & 40 جاى ) ،، + المشاوير الداخلية اللى قد تصل لـ 40 فوقهم

----
هدفى فى العربية انها تكون متينة ، مش ورق .. علشان الشوارع اللى زى الزفت اللى عندنا
فـ استبعدت الماروتى : صديق ليا اخد بيها نقرة كسرت مساعد :\ .

و كنت عاوزها تكون نوعا ما واسعة مش ضيقة ، بحكم انها هاتكون للمستقبل و للأسرة بإذن الله

و عاوزها تصلح للسفر ، صحيح انا مش بسافر على طول ،، بس لما احتاجها فى السفر ( مشوار فوق 100 ك ) تسعفنى

-----------------

دماغى راحت لـ لادا ،، و شاهين
و وصيت قريب ليا يدورلى ، و قريبى غاوى ينقى الحاجات الشاذة ،، الـ a1 ..
لقيته بيكلمنى فى لادا 2107 مو2003 فابريكة بـ 33 الف !! ... و شاهين بـ 35 الف .

حسيت انى كدا بفكر غلط ،، انا لو رميت الـ 30 الف اللى معايا فى لادا ( فبريكة و ...و...و... ) عمرى ما هاعرف اجيب اى رقم قريب منهم لو حتى فكرت ابيعها تانى يوم !

و بعدين لادا ايه دى اللى الواحد هايبص إذا كانت فابريكة خوارج ولا لأ ،، دى لادا :)
+ انى بظلم نفسى لما ادفع كل ما املك فى عربية تكون صخرة كـ اللادا ... كدا يبقى الاونو اولى بقى طالما هاضحى بكامل المبلغ

=======
- انا حاطط الـ 30 الف ميزانية و عندى طموح اوفر منهم :) ،، لو رسيت على لادا يبقى ادفع فيها 26 الف مثلا ، علشان لو حبيت ابيعها ماخسرش جامد
- الشاهين حلوة بس طويلة شوية ،، و هاتبقى سعرها اعلى من 30
- الاونو حاسس ان سعرها مبالغ فيه ، مش عارف رأيكم ايه ؟

---------
انا المفروض انوى اليومين دول و اقدم على موضوع الخطوبة ، خصوصا ان بقى فيه ناس بتقولى " انا عندى ليك عروسة كذا " ،، تصوروا لما يبقى ردى انى مأجل الموضوع دا لحد ما اجيب العربية الاول :\ !!
- لإن العربية مهمة جدا فى الشغل عندى -

ايه اقتراحاتكم ؟؟

**mh_ccont** · 17-03-2015 03:35 PM

اولا انا اتمنى لك التوفيق اولا فموضوع الخطوبه
بس نصيحه متأجلش حاجه عشان حاجه وامشي فكل الاتجاهات
بص ياباشا انا لو فمكانك بكل صراحه هحاول اتصرف و ازودهم حاجه بسيطه و اجيب فيات سيينا شكلها حلو وجميله وقطع غيارها متوفره بس جيب ال1400 متجيبش 1600 وهتلاقي منها فحدود 32 الف او 33 الف او ممكن تجيب هيونداي اكسل بالرغم اني بحس انها ورقه وضعيفه بس الناس بتشكر فيها برضو ونصيحه بقى من مجرب اوعى تسترخص وتجيب عربيه يكون حالتها صعبه شويه ورخيصه لانك هتلاقي المواضيع فتتتتحت معاك وهتلاقي نفسك بتستلف وصرفك ممكن يعدي ال8000 جنيه بلا فائده
بالتوفيق ......

**Ladawy** · 17-03-2015 05:15 PM

بس نصيحه متأجلش حاجه عشان حاجه وامشي فكل الاتجاهات

ناس كتير نصحتنى نفس النصيحة ، بس زى ما انت عارف "صاحب بالين كداب" ،، فمابالك بـ مليون حاجة ،، فقولت ازودهم حاجة بحاجة ;)
-------------
فيات سيينا

انا دورت عليها ع النت ع السريع و تفاجأت بصراحة !! ازاى اللى بيشتروا الاونو مايعرفوش العربية دى !!
( العربية افضل من الاونو فى كل حاجة ، و ازيد من سعرها 3 آلاف ) زائد الكماليات اللى فيها

بس مضطر اصرف النظر عنها لإنى عاوز انزل عن 30 مش اعلى ،،
غير موضوع الانجكشن :\ ،، انا من دمياط و ماعندناش متخصصين فى الانجكشن اساسا :) ، فما بالك بانجكشن السيينا .

هيونداي اكسل ،،
العربية دى بكرهها :) ،،، كبيــــــــــرة زيادة عن اللزوم
و كانت مع قريب ليا كان مبهدلها ، فـ عقـّـد العيلة كلها منها :d .

-------------
بمناسبة كلامك عن الاسترخاص ،،
انا كنت فكرت اجيب لادا 2105 موديل تسعينات بـ 20 و اوفر الـ 10 الباقيين دول ، رأيك ايه فى الخطة دى :) ؟

**hugan** · 17-03-2015 05:52 PM

شاهين اظن افضل اختيار

**م أحمد** · 17-03-2015 07:00 PM

فيات تمبرا

**meemo20032000** · 17-03-2015 07:09 PM

أنا ركبت لادا10سنين وشاهين حوالى 8 سنين بصراحة الشاهين تفرق كتير بالذات الباور
الشاهين أفضل فى النعومة وسرعة الأستجابة فى الجرى والسرعة القصوى وعفشتها أقوى كتير من الادا يكفى ان العربية لو عفشتها بايشة عمرها ماتوقفك فى الشارع