مشكله جننتنى فى بيجو 406

**Mohamed K.Anis** · 19-03-2015 01:53 AM

يا جماعه انا زهقت ومش عارف اعمل ايه و قولت ما فيش حد هيساعدى غيركوا ... انا معايا بيجو 406 موديل 2003 اوتوماتك 2000 سيسي .. انا شاري العربيه من شهر والعربيه من يوم ما جيبتها مش مظبوطه .. ال ار بى ام مش ثابت على السلانسيه و العربيه بتبطل لوحدها و بتاكل بنزين لدرجه انها بتعمل 90 كيلو فى الصفيحه و بتطلع دخان اسود من الشكمان .. روحت بيها عند واحد فى الاسكندريه بتاع بيجو اسمه ايهاب فى المندره غير الرشاشات و البوجيهات و البوابه و فلتر البزين و برضو المشكله ما اتحلتش وروحت عند واحد فى القاهره اسمه محمد ذكى فى الزاويه الحمرا غسل البوابه و نظف حساس الشكمان و برضو نفس المشكله و بتزيد وروحت عند كذا واحد و بيقعدوا يكشفوا بالجهاز و يدفعونى فلوس على الفاضي يريت حد يفيدى اعمل ايه او اروح لميكانيكى مين لأن انا صارف 6000 جنيه لحد دلوقتى و العربيه بتزداد سوء .. انا اقرب حاجله ليا طنطا

**pepo2011** · 19-03-2015 08:32 AM

لو اقدر تنزل القاهرة ياريت وانا تحت امرك وبسيطة انشاء الله

**AHMADKAMAL1** · 19-03-2015 09:42 AM

بص يا باشا حلك مفيش غير مركز محترم اوتو مان في الهرم خلف اولاد رجب المجزر الالي شارع اللبيتي الهرم من نزلة المريوطية المهندسي نادر والمهندس احمد اسماعيل مهندسين بجد ناس عندها ضمير واخلاق وفنيين عالي جدا وكانوا شغالين في توكيل بيجو وعن تجربة واسعارهم ممتازة جربهم ومش هاتندم تليفون 0122809611- 01006414327 وهمة اجازة الجمعة ودول تخصص بيجو

**م أحمد** · 19-03-2015 10:59 AM

السلام عليكم و رحمة الله و بركاته

الأستاذ المحترم

ممكن تتصور إشعال العربية زى شمعة لمبة جاز.......لو نفخت فيها زيادة هتنطفى.....لان مادة الحرق هتقل بالنسبة للهوا و لو رشيت عليها جاز برضه هتنطفى......لان الهوا قل بالنسبة لمادة الحريق

مشكلتك اللى بتخلى العربية تبطل هى عدم انضباط نسبة الوقود للهواء

زيادة الوقود هتلاقيه اشارة خاطئة من الكمبيوتر بناءا على حساس الشكمان و دا اللى عمله الحاج محمد انه نظف حساس الشكمان اللى بيقيس نسبة الوقود فى العادم

و لو البوابة مخنوقة هتلاقيه الاشعال غير كامل و العربية تبطل لان مفيش هوا كفاية

ولو البوجيهات او كهربتها مش كاملة... الحرق مش هيكتمل

تسييل الرشاشات يعمل دخنة علشان البنزين زيادة

رأى انك تثبت مع واحد ميكانيكى ما يفتحش عليك مواضيع على الفاضى علشان لو ما لقاش العيب ينقل على الاحتمال اللى بعده و يعالج الامور بتدرج

والله اعلم انت عندك مشكلة فى البوابة ...إما تغيير الأيدل او البوابة بالكامل (شكلك جبت واحدة استيراد او مخلوعة من عربية واحد قبلك) ....ممكن تروح لاى ميكانيكى بيشتغل فى العربيات الانجكشن عندك فى طنطا و تقوله نظف لى البوابة.....و تشوف الوضع اتغير ازاى علشان على الاقل تقدر تستبعد حاجة

و اعراض تلف البوابة الحاجات اللى حضرتك قلتها ...التبطيل..و ارتقاع و انخفاض ال rpm مع ملاحظة انك لو حطيت نوعية زيت رديئة بخر الزيت هيبقى عالى و يسد لك البوابة بمعدل سريع..... او لو الموتور خفيف.....لان بخر الموتور بيرجع تانى للبوابة زيت خرطوم الفايظ فى العربيات الكاربيراتير

يعنى اكيد لما نظفت البوابة كل الكلام اللى انت قلته ما كنش موجود لفترة و بعدين رجع تانى

تانى حاجة لازم تشوفها كويلات الكهربا المسئولة عن الاشعال و دى اساس زيادة استهلاك البنزين

برضه ممكن تروح لعفشجى او ميكانيكى متخصص يشوف العفشة جايز فى مشكلة مكتفة العربية بتسبب زيادة الاستهلاك و التبطيل

**م أحمد** · 19-03-2015 11:37 AM

إحتمال آخير للدخنة تكون حاجة فى الموتور كاوتش صباب اوطقم شنبر

**Mohamed K.Anis** · 21-03-2015 01:07 AM

انا النهارده غيرت حساس شكمان وبرضو نفس المشكله ... و روحت لواحد كشف عليها بالكمبيوتر وقالى فى مشكله فى الرشاش الاول و الرابع .. ف انا كنت عايز اعرف لو فى مشكله فى الرشاشات ممكن تعمل الاعراض الى عندى دى (استهلاك وقود عالى - دخان اسود من الشكمان - العربيه بتبطل لوحدها - البوجيهات بتطلع مهببه )

وعايز اعرف طقم الرشاشات بتاعها استيراد يعمل كام ؟

**ahmdghalwash** · 21-03-2015 01:48 AM

المشاركة الأصلية كتبت بواسطة mohamed k.anis

انا النهارده غيرت حساس شكمان وبرضو نفس المشكله ... و روحت لواحد كشف عليها بالكمبيوتر وقالى فى مشكله فى الرشاش الاول و الرابع .. ف انا كنت عايز اعرف لو فى مشكله فى الرشاشات ممكن تعمل الاعراض الى عندى دى (استهلاك وقود عالى - دخان اسود من الشكمان - العربيه بتبطل لوحدها - البوجيهات بتطلع مهببه )

وعايز اعرف طقم الرشاشات بتاعها استيراد يعمل كام ؟

اخي العزيز...يمكنك التواصل معي وان شالله محلولة.........لان اذا صدق ان المشكلة في الرشاش الاول والرابع فهتكون فنية جدا.......
م-احمد غلوش

**MOHGOMAA2002** · 03-04-2015 12:54 PM

راجع على حساس الكرنك و خصوصا الطنبورة اللي راكب عليها ممكن تكون سبب
ومتصرفشي أكتر من كده لأن المكنة كلها ب 7000 جنيه تقريبا .

**rasha1** · 08-04-2015 03:48 PM

المهندس / احمد
من فضلك عايز اعرف معدل استهلاك البنزين لبيجو 406 سى سى 2000

**م أحمد** · 08-04-2015 04:13 PM

المشاركة الأصلية كتبت بواسطة rasha1

المهندس / احمد
من فضلك عايز اعرف معدل استهلاك البنزين لبيجو 406 سى سى 2000

لو عربية خارجة من المصنع تعمل 6 لتر/100 كم فى الطرق المفتوحة
و داخل المدينة سرعات ما بين 20 و 70 كم/ساعة تعمل 11 لتر/100 كم

لو عربية كويسة المعدل دا بيزيد من نصف لتر الى لتر فى الطرق المفتوحة

لو عربية فيها مشاكل المعدلات دى بتبقى اعلى من كدة

بالنسبة لزحام بلدنا الموجود حاليا فهو وبال على كل العربيات لكل السعات اللترية و اكيد طبعا ال 2000 سى سى و المعدلات دى بتبقى اعلى من كدة بكتير ، يعنى الطرق واقفة و الكلام دا 20 لتر/100 كم و ممكن تزيد او تقل