الموضوع: أسعار الصيانات الدورية في شركة مصرية من الألف الى الثمانين ألف

المشاركة الأصلية كتبت بواسطة basom

1000 شكر يا باشا على الموضوع الجميل دة بس انا كان عندى ملاحظة ان المصنعيات عالية اوى اوى يعنى مثلا تركيب التيل 40 ج و تغير زيت الباور 40 ج ازاى يعنى و المفروض تكون المصنعية دية من 100 او 120 بتوع الصيانات الفردية و الزوجية او يكون لينا احنا نايل موتورز المصنعية مجانا والله اعلم

تغيير التيل عملية منفصلة ممكن عربية تحتاجها وممكن لأ ، وكذلك تغيير زيت الفتيس للعربيات الأوتوماتيك فقط وبالتالي مصنعيتهم خارج تكلفة الصيانة الدورية العادية.

بخصوص نايل موتورز باذن الله هيكون لهم خصم خاص قريبا رسمي لأنه حتى الآن بيتعمل لكن مش رسمي

المشاركة الأصلية كتبت بواسطة alperance

مشكور يا مهندس طارق بس من المفترض ان يكون خصم خاص على اعضاء المنتدى خصوصا واحنا الى ليس لهم ضمان لنك قولت فىصيانه الالف تم اخذ0 60جنيها للخليجى بدون ضمان وبعدين تم على المبلغ كله 10%ضريبه مبيعات ومن المفترض تكون على الزيت مثلا لكن على اجمالى الفاتوره يعنى انا دفعت مبلغ 352جنيها نظير صيانه الالف والذى تم هو تغير الزيت والفلتر وكان نفسى اشوف الذى تم فى عربيتى لكن اخذو العربيه وبعدين بعد 3/4ساعه قاللو خالص وهل من الممكن فى نهايه العمل يجى المهندس ويقول لى تعالى استلم السياره احنا عملنا ويشرح لى حتى اكون على بينه لما حدث فى سيارتى عموما انا شاكر ليك يامهندس طارق فاكرنىانا الذى شرحت له الغيار الاوتوماتيك (مهندس /علاء حسن)

اهلا يا باشمهندس علاء ، بخصوص ضريبة المبيعات فدي حاجة مقررة من الضرايب انها على كل حاجه زيوت وقطع غيار ومصنعيات مش الزيت فقط

بخصوص اللي بيتم في صيانة الألف فهو اساسا تغيير الزيت والفلتر مع مراجعة على زيوت وفلاتر وسيور العربية وتربيط عفشة وبرضه كان مفروض مهندس الاستقبال يقول لحضرتك تم ايه في العربية

المشاركة الأصلية كتبت بواسطة MohabSaeed

بشمهندس طارق . عفوا لو استفسارى مش فى المكان المظبوط

انا عاوز اعرف سعر سير الكاتينه و بليه الشداد و الا2 اويل سيل كام كلاً على حدى . (((( ل اللانسر 1600 سىسى ))))

و اقدر اشتريهم منين بالظبط هل فى مركز بيع فى مكان قريب من وسط البلد .
هل السير ده بيبقى متكوب علي 100,000 كيلو متر .
لانى عاوز اشترى طقم كاتينه و سألت بره فى قالولى ان الى موجود بيتغير كل 60 الف و انا عاوز حاجه مضمونه .و اغيرها على 800000 كيلو و ابقى مطمن


شكرا جزيلا على المعلومات القيمه .

الموعد الرسمي المحدد من شركة ميتسوبيشي لتغيير طقم الكاتينة (سير وبلية شداد واويل سيلات) هو عند صيانة 80 ألف

فيه محل قطع غيار تابع للشركة في ميدان الكيت كات او بالتحديد في اول شارع السودان من الميدان على الشمال تليفون 33057640 وده شغال للساعة 7 كل يوم

تكلفة صيانة الـ 80 ألف كالتالي :

- الصيانة ميكانيكا وكهرباء 120 ج
- زيت موبيل (1) 210 ج
- فلتر زيت 50 ج
- بوجيهات 88 ج
- فلتر هواء 160 ج
- فلتر بنزين 413 ج (يجب تغييره كل 40 ألف كيلو)
- زيت أوتوماتيك 234 ج
- سير باور 88 ج
- سير دينامو 66 ج
- سير كاتينة 198 ج
- بلية شداد 237 ج
- اويل سيلات 72 ج
------------
يضاف 10 % ض.م

المشاركة الأصلية كتبت بواسطة MedaSam

الاسعار دي للبومه و لا لشارك؟؟ ......... و مشكووووور جدا يا أستاذ طارق

الأسعار دي للبومة أما الشارك فهي قريبة جدا من الأسعار دي لكن بتاخد زيت اكتر شوية من البومة

المشاركة الأصلية كتبت بواسطة mahmoudzaied

الف شكر على الموضوع الجامد ده
بس على فكرة اسعار الصيانات غالى جدا بالمقارنة بعربيات تانية زى الميجان والاوكتافيا
بس انا عاوز اسأل شوية أسألة
صيانات ال 15 الف وال 25 الف بيحصل فيهم ايه؟
يعنى الواحد بيحط زيت 10000 كيلو طيب بعد 5000 كيلو محتاج اغير ايه؟
وهل ينفع افوت الصيانات دى اللى هيا 15 الف وال 25 الف وال 35 الف وهكذا؟
واجى بس كل 10000 كيلو ؟
ول فيه غلط ايه الضرر اللى هيحصل لو تم تفويت الصيانات دى؟

الصيانات الدورية في التوكيل كل 10 آلاف كيلو متر مش كل 5 آلاف وبالتالي يتم وضع زيت موبيل وان حتى يستمر للصيانة التالية

فمفيش اي صيانات في التوكيل كل 5 آلاف ، وان كانت بعض مراكز الصيانة للعربيات الخليجي بتعمل صيانة كل 5000 كيلو

المشاركة الأصلية كتبت بواسطة limo

الف شكر يا بشمهندس على المجهود الرائع
هوه مش المفروض ان صيانه ال40 الف كم فيها تغير سير الدينمو وسير التكيف
ولا الحاجات ده على صيانه ال80 الف كم مع تغير سير الكاتينه

سير التكييف والباور بيتكشف عليهم في صيانة الأربعين لو محتاجين تغيير لأي سبب

اما الطبيعي انهم بيتغيروا مع سير الكاتينة وطقم الكاتينة كل 80 ألف كيلو