مواصفات موتور و فتيس النيو لوجان الأتوماتيك 2015

**Hany Saad** · 24-03-2015 09:02 PM

حابب أشارك معاكم ببعض المعلومات عن موتور و فتيس النيو لوجان الأوتوماتيك 2015

أولاً الموتور:

كود الموتور K4M و هو نفس الموتور المستخدم فى الميجان II و الرينو سينيك و بعض الموديلات الأخرى من الرينو
قدرة الموتور 110 حصان عند 6000 RPM
الموتور على سير تقسيم كاوتش بيحتاج تغيير كل ٦٠ الف كم او خمس سنوات أيهما اقرب مثل باقى المواتير من نفس الفئة
سحب الموتور مرضى جداً و خصوصاً عند المنطقة من 50 - 100 كم/ساعة بيظهر تجميع ممتاز
مفيش مشاكل خطيرة فى هذا الموتور و خصوصاً مع المحافظة على الصيانة الدورية

ثانياً الفتيس:
كود الفتيس DP0 و هو نفس الفتيس اللى كان نازل فى الميجان II
الفتيس مكون من اربع نسب تعشيق أمامية و واحدة خلفية
الفتيس نوعه steptronic و مهواش dual clutch ، ده فتيس قديم مجرب عند رينو من مده و تكنولوجيا أقدم من ال dual clutch
الفتيس أساساً أتوماتيك و ممكن تحويله ل semi manual علشان تتحكم فى زمن النقل و من ثم القيادة الرياضية
الفتيس يوجد به محول عزم يبدأ عمله بعد النقلة التانية و ده بيدى احساس بنتشة بسيطة مشهورة بين الغيار التانى و التالت و هو وقت تعشيق محول العزم و هذه خاصية لهذا الفتيس....ممكن البعض ميحبهاش و لكن لا يمكن ازالتها
الفتيس كمان بيعمل engine braking بطريقة اتوماتيكية، يعنى لو حضرتك بتجرى و كبست فرامل مرة واحدة، الفتيس بيسقط نقلات بسرعة و يلجم العربية معاك و بيعمل تحكم رهيب و لكن مشكلته انك لو رجعت تدوس بنزين تانى علشان تجرى مرة اخرى...بيجمع أبطىء بعد هذا الموقف مع علو عدد لفات الموتور و بعدين يرجع يظبط تانى

الفتيس بينزل بزيت مخصوص sealed for life او مش المفروض يتغير و لكن مع ظروف الجو و طريقة القيادة فى مصر، ينصح بتغييره كل ٦٠ الف كم للمحافظة على اطول عمر للفتيس

مبروك لكل اللى حجز العربية و تحت أمركم فى اى استفسار

تحياتى

**hugan** · 24-03-2015 10:12 PM

يعني العربيه نازله بنفس موتور وفتيس الميجان 2
ولا انا فاهم غلط
لو صح مش الموتور والفتيس مشهورين بادائهم والسيء واعطالهم الكبيره

**adel_edrees** · 25-03-2015 07:17 AM

طيب ماهو موتور اللوجان الأوتوماتيك كان برضه k4m لكن ال k4m زى ال k7m في منه حاجات تانية كتير المشكلة أن فتيس الميجان 2 مش الفورة يعنى الموتور تمام لكن لو بحساساته بتعقيداته يبقى الله الغنى

**Hany Saad** · 25-03-2015 08:22 PM

للأمانة أنا عملت انهارده تحريات موسعة منها الاتصال بصديق راكب اللوجان الشكل القديم اتوماتيك و صديق أخر فى التوكيل و كانت النتيجة كالأتى:
- اللوجان الأتوماتيك الجديدة هتنزل بنفس الموتور و الفتيس بتاع اللوجان القديمة الأتوماتيك دون اى تعديل و دول بقالهم قترة مش بطالة فى السوق و مفيش منهم اى اعطال تذكر حتى الأن
- النقطة التانية اللى اكدهالى زميلى و كنت مستغرب لها الصراحة، ان فى اللوجان الاتوماتيك القديمة مفيش اى تنتيش بين الغيار التانى و التالت ( يا ريت ملاكها يأكدوا المعلومة دى)

بناء على ما سبق و اذا ملاك اللوجان الاتوماتيك الشكل القديم اكدولنا ان معندهمش شكوى من الفتيس الاتوماتيك ( مفيش تنتيش بين التانى و التالت و لا فيه اعطال ) يبقى فعلاً هتكون النيو لوجان الحصان الأسود لهذه الفئة

تحياتى

**monamize4** · 25-03-2015 08:59 PM

تسلم ياباشا ع التقرير الجامد دا ,,

فى 2 اصاحبى واحد معاه لوجان القديمة اوتو و التانى معاه اللوجان الجديدة مانيوال
و طبعا انا ركبت ال2 و كان نفسى الصراحة اعمل مقارنة مابين ال 2 ف موضوع منفصل

بس الخلاصة ان اللوجان الجديدة غيرت رأى تماما ف اللوجان ,, للاحسن طبعا
خصوصا ان الجديدة اللى ركبتها اعلى فئة مانيوال اللى فيها تكييف اوتو و نافيجيشن و سنسور

اه صحيح ,, ماحستش خالص بنتشة ف الغيارات ف اللوجان الاوتو القديمة

**Hany Saad** · 25-03-2015 09:11 PM

المشاركة الأصلية كتبت بواسطة monamize4

تسلم ياباشا ع التقرير الجامد دا ,,

فى 2 اصاحبى واحد معاه لوجان القديمة اوتو و التانى معاه اللوجان الجديدة مانيوال
و طبعا انا ركبت ال2 و كان نفسى الصراحة اعمل مقارنة مابين ال 2 ف موضوع منفصل

بس الخلاصة ان اللوجان الجديدة غيرت رأى تماما ف اللوجان ,, للاحسن طبعا
خصوصا ان الجديدة اللى ركبتها اعلى فئة مانيوال اللى فيها تكييف اوتو و نافيجيشن و سنسور

اه صحيح ,, ماحستش خالص بنتشة ف الغيارات ف اللوجان الاوتو القديمة

كده حضرتك بتأكد المعلومة أن فتيس اللوجان الأتوماتيك مختلف او على الاقل معدل عن فتيس الميجان 2 و ده شىء إيجابى و فى صالح اللوجان

تحياتى

**gebreel** · 31-03-2015 12:46 AM

موتور اللوجان الاوتو هو هو موتور الميجان 2 بس من غير ترس الديفشششيبيا (مبعرفش انطقه ولا اكتبه :D )

فتيس اللوجان الاوتو هو هو فتيس الميجان 2 بالظبط مع تعديل بسيط جدا في السوفت وير بتاعه علشان يتناسب مع الموتور و النتشة موجودة بس مش ملحوظة في المطلق بتبدأ تلاحظها لو كنت بقالك فترة بتشد بالعربية و بعدين هديت و بقيت ماشي عادي (غالبا علشان الفتيس adaptive)

و النتشة و الengine break انا اخدت بالي منهم من يوم الاستلام و موجودة في التقرير بتاعي هنا اول ما استلمت

الموضوع: مواصفات موتور و فتيس النيو لوجان الأتوماتيك 2015

LinkBack

أدوات الموضوع

عرض

مواصفات موتور و فتيس النيو لوجان الأتوماتيك 2015 - انشر الموضوع فى :

-

-

-

-

-

-

المواضيع المتشابهه

مواصفات الفئات الخمسة لنيو لوجان 2015 و الفرق بينها

تقرير مبسط مني على النيو لوجان 2015 بعد اسبوعين

رعشة في فتيس النيو لوجان

مشكلة فتيس الأتوماتيك فى النيو أكسنت

للخبراء لو سمحتو... هو موتور النيو اكسنت هو نفس موتور النيو الينترا ؟؟

الكلمات الدلالية لهذا الموضوع

المفضلات

المفضلات

ضوابط المشاركة