استرا h موديل 2012 ؟؟؟؟

**mustafa__khali** · 30-03-2015 03:36 AM

السلام عليكم و رحمه الله و بركاته,

الناس الجامده و اللي كنت متابع ليهم بطريقه غير عاديه ... لحد ما قررت اني اتكلم معاكم بقي.
انا متابعكم من حوالي 5 سنين ... انا مدمن اوبل ... بصراحه.
كورسا هاتش 99 ... كورسا سيدان 2005 .. استرا 2012 ؟؟ هتقولي ايه ده ؟ 2012 ؟؟ انت بتكدب..اخرها كان 2009/2010.
هقولك دي اسمها برا في اوروبا ASTRA CLASSIC III

http://auta5p.eu/vystavy/brno_2011/brno_056.jpg

http://www.moto.rs/f/t/7/000/000/030/910/36_11.34.jpg

انا للاسف لسه جديد و مش عارف اعمل ارفاق للصور.
المهم انا بعد ما بعت العربيه الكورسا السيدان في رمضان اللي فات لقيت العربيه دي لسه نازلها اعلان و كانت عليها نمر تجاريه و جايه من المانيا و بسعر كويس كانت عمله 12000 كيلو.
المهم الحمد لله... ربنا وفقني و اشتريتها و رخصت كمان و كله كويس.

مواصفات
موتور 1600 .. 115 hp .... نوع الوتور A16XER.

مانيوال . 4 ايرباج .. كروزكنترول .. جنوط 16. ماكينه رفع زجاج امامي.
العربيه خليط غريب بس الحمد لله كويسه جدا.
------------------------------------------------------------------------------------------
من حوالي شهرين عملت حادثه و الايرباج الجانبي فتح و كمان الدونجل اتلوح.
نور الصالون علطول شغال"نظام فتح الابواب" + انتظار اول لما اشغل العربيه + السنتر لوك بيعلق.
المهم روحت الحرفيين :اشتريت دونجل كامل بتركيبه عمله 1400 جنيه.
ايرباج جانبي بتركيبه 750 جنيه , و بعد ما اتركب احتاجت اعمل سوفت وير جديد للكونترول بتاع الايرباج عمله 600 ج. "قولت انقل تجربه الاسعار بالمره"

تبقي عندي حاجتين اسخف من بعض نور الصالون و كمان بوابه التكيف اللي تتحكم في الهواء اللي داخل من بره العربيه, معلقه ومش بتتقفل و لما بجري بالعربيه و اكون قافلها بتتفتح و بتدخل هواء و عادم و قرف.
ولما بقفل العربيه و هنزل اسمع صوت مزعج وغريب كأن بكره بتلف بصعوبه

ياريت حد من العمالقة الجامدين هنا في الاوبل يفيدني ... و اسف لاني طولت عليكم جدا جدا ......
وشكرا

**mustafa__khali** · 30-03-2015 06:55 PM

لازلنا في انتظار الردود من رجالتنا .......

**moody_687** · 30-03-2015 08:25 PM

يعنى ايه دونجل معلش ؟
وهل الشاسيه بتاعك اتأثر ؟؟
وازاى الايرباج اللي جنب منك يفتح بدون الاساسي بتاع السائق مايفتح ؟؟
اعذرنى ع تساؤلاتى

**mustafa__khali** · 30-03-2015 08:54 PM

الدنجول دة بار حديد خلفي و بيتربط فيه المساعدين و الطنابير "معلوماتي الصغيرة ... ممكن حد يفيدنا اكتر".
انا كنت بصيت علي الطريق و بقطعه علشان اعدي .. وحد خبط فيا من الجنب ناحيتي.. و تقريبا الخبطه كلها جت في الجنط ,علشان كدة البار الحديد دة اتلوح و الايرباج الكرسي بتاعتي بس هيا اللي فتحت, والجزء اللي فوق العجله " الرفرف الخلفي" دخل لجوه من اثر التصادم.
لا الشاسيه الحمدلله محصلش فيه حاجه.

الحمد لله ,, انا منكرش انا كنت زعلان جدا ... لاني باصص كويس و ماشس علي سرعه قليله اصلا ,تقريبا 20.
بس مش هقول غير الحمد لله .. و انا مروح اليوم دة شوفت تلات حوادث علي صلاح سالم و بالاخص اخر وحده كان فيها ناس ماتت... ربنا يسترها معانا كلنا يارب

**ahmed_gamal** · 31-03-2015 02:04 AM

بوابة التكييف بتبوظ دايما في الاسترا و حصلت عندي و قفلتها علي طول بمسمار

**mustafa__khali** · 31-03-2015 02:10 PM

يا ريت يا باشا تقولي معلش او توضح بتتعمل ازاي
بعتذر للاطاله و شكرا مسبقا لردك

**احمد فهمى** · 01-04-2015 02:52 AM

العربيات الالمانى الجديده واليابانى الاير باج متقدم يعنى بيفتح اللي فمكان الخبطه بس واللي حصل طبيعى ثانيآ برمجه ب600 جنيه ليه؟ انا برمجتو هو ومثبت السرعه ب150 جنيه والنور اللي معلق عندك ده بسبب مفتاح القفل اللي في الباب راجع عليه واضح ان السمكري مظبتش الخلوص والبوابه بتبان من تحت الفلتر اي حد يقفلهالك بمسمار شك من فوق هو عك بس اريح حل وفعال

**mustafa__khali** · 01-04-2015 10:05 AM

احمد فهمي : باشا انا مروحتش لسمكري بصراحه لان الخبطه مجتش في الباب ، و كمان لو الباب كان فيه مشكله كان جاب العلامه علي التابلوه "ده تخيلي"... بالنسبه للبرمجه انا معرفش سعر مثلا علشان اقارن بيه و الراجل ده تقريبا هو اللي موجود في الحرفيين و الناس كلها بتروحله مش انا بس و بيحاسب الناس كلها كده قدامي، اسمه: الهامي عنده مهندس اسمه تامر شاطر اوي.
بس الموضوع كان اكتر من انه يوصل جهاز و يشتغل كده و خلاص، هو خلع الكونسول اللي في النص عند فرامل اليد و شال الكونترول ، حاول يفك الشفره اللي عليه و هو حاول فيه ثلاث مرات و الاخيرة نجحت الحمد لله. و بيني و بينك اتبصت انها اتعملت و ارتحت كانت مقرفه جدا. "لو ينفع ترشحلي حد تاني لو احتجت اروحله، يبقي كتر خيرك و جزاك خير".
بالنسبه لبوابه التكيف هو الاحسن اقفلها و لا اغيرها ولا مش بتتغير؟؟
متشكر جدا لردك و اسف للاطاله