الموضوع: التغطية الرسمية لمقابلة عيد ميلاد نايل موتورز الثامن

يوم جميل ومميز كعاده كل مقابلات نايل موتورز سواء المقابلات الكبيره
زى مقابلات عيد ميلاد المنتدى أو مقابله إفطار رمضان
أو حتى المقابلات الصغيره اللى بتتعمل بإستمرار مع أجدع أصدقاء وأرجل اخوات .

أيام وسنين بتمر علينا وبتاخدنا حياتنا الخاصه بمشاغلنا ومشاكلنا وإلتزاماتنا
وفجأه تلاقينا بنحتفل بسنه جديده من عمر بيتنا التانى أو بيتنا الكبير نايل موتورز .
حاله خاصه ومختلفه كلنا عشناها هنا على صفحات المنتدى
وكل واحد فينا كانت له تجربه مختلفه عن التانى فى شكلها وتفاصيلها .
لكن نفس النتيجه وصلنا لها كلنا مع بعض
كلنا ارتبطنا بالمكان ده
كلنا حبينا المكان ده
كلنا أخدنا المكان ده من بيوتنا ومشاغلنا وحياتنا الخاصه بكل اللى فيها
كلنا استفدنا من المكان ده وكلنا حاولنا ولا زلنا بنفيد المكان ده
اتعاملنا مع المنتدى على انه عالم إفتراضى زيه زى اى موقع على الإنترنت
لكن لاقينا هنا حياه مختلفه حقيقيه واقعيه
وإتحولت العلاقات مع بعضنا لحقيقه وواقع
وبقينا أصحاب وأصدقاء وأخوات
بنتكلم وبنتقابل وبنسأل على بعض وبنقف مع وجنب بعض
الحكايه تخطت مرحله الإهتمام بالعربيات
الحكايه بقت علاقات إجتماعيه متشابكه
بقينا عائله كبيره قوى

حقيقى فخور إنى واحد من قدامى أعضاء عائله نايل موتورز
وفخور وسعيد بكل واحد عرفته وقابلته من نايل موتورز
وبتمنى من الله عز وجل أن يديم علينا جميعا الحب والصحه والسعاه
ويرزقنا الخير ويجمعنا دائما على الخير وبكل خير

أخيرا

شكر خاص لكل من قام على تنظيم هذا اليوم المميز واللى ساهم إنه يخرج بالجمال ده
وشكر جزيل لأخى العزيز كريم منير (رئيس مجلس الإداره )
ولأختى العزيزه مدام سماح (مديره المنتدى )
على مجهودهم الوافر فى سبيل راحه كل الحضور .
ومش هنسى أكيد أشكر الجندى المجهول
اللى كان له دور فى عمليه إختيار الفندق
أخى العزيز مهندس / محمد طه .

ومتجمعين دايما فى الخير
عذرا على الإطاله
تقبلوا جميعا تحياتى ....................