الموضوع: مقااارنه غريبه ( الشكل vs الامان vs المطبات )

السلام عليكم ..

انا خلاص دماغي لفت من الحيره الي اغلبنا وقع فيها وهوا بيختار عربيته ..
العربيه ان شاء الله هتكون اول عربيه ليا والمنافسه انتهت على 3 عربيات عاوزهم ال 3 :)

1-الشكل : هوندا سيتي 2015 .
عربيه شكلها من جوا ومن بره عاجبني جددداااا بما اني شاب رغم ان سعرها عالي شويه بس انا مش شايفه كتير عليها ..

2-الامان : رينو فلوانس 2015 الفئه التالته .
طبعا لفت نظري ال6 ايرباج وغير فتحة السقف الي كنت شايفها بالنسبه ليا الاوبشن الوحيد الي يميزها عن الهوندا سيتي ..

3-المطبات : نيسان جوك 2015 .
بما اني عايش في الاقاليم فالمطبات العشوائيه حاجه تفتح النفس :) والجوك عربيه عاليه وفيها اوووبشنز كتيييييير جدا .

طبعا استبعدت عربيات كتير في الاول ورسيت على ال3 قمرات الي فوق وعاوزكم تساعدوني

اختار الجوك واتنازل عن ضيق الشنطه والكنبه الخلفيه بما اني مش هحتاجهم كتير واركب عربيه عاليه بعد عن قرف المطبات ( غير الاوبشنز والكاميرا الخلفيه والgps ) بس هلبس في قطع غيار غاااليه جدا
ولا الرينو عربية الناس كلها بتقول عليها انها كويسه وفيها اوبشنز كتير برضه ومريحه بس المشكله شكلها مش عاجبني من بره :(
هوندا سيييتيي دي انا مرتاحلها جداا شايفها مناسبه ليا اوي والكنبه الخلفيه واسعه وياباني واعتماديتها كويسه والناس بيقولوا توكيلها محترم ..

ارجوا انكم تساعدوني عشان دا هيبقى قراري النهائي الي هشتري بعده العربيه ..
انا ميال للسيتي بس لو انتو شايفينها مش كويسه قوليلي الاحسن ايه من ال2 التانيين ..

اهم حاجه بالنسبه ليا .
اني هسافر كتير بيها ان شاء الله .
قطع الغيار والصيانات تبقى سعرها معقول .
عاليه عن الارض مش لازم تكون عاليه اوي بس محكش في كل مطب .
عاوزه عربيه متعطلش لاني مبفهمش حاجه خالص غير اني احط بنزين وازود ميه للمساحه واسوق والباقي على ربنا :)
اهممم حاجه الراااحه والعزل الكويس .
يارييييييييييييييت تساعدوني ولو بمعلومه
شكرا مقدما للجميع واسف للإطاله

*اسم الموضوع اخترته كدا لاني شوفت ان دي الفروقات الوحيده الي هتفرق معايا بما ان اداء المواتير متقاربه وكلهم cvt والاوبشنز متقاربين من بعضهم والي موجود في واحده مش موجود في التانيه.

للامانة بس انا افتكرت حاجة فحبيت اقولها لحضرتك
الجوك اللى ب 180 مافيهاش الكاميرا و ال gps او حساسات ركن و لو هتزودهم هيكون بفلوس زى ما حصل مع معرفة اشترى العربية
الرينو معرفتى بيها محدودة بس حبيت اقترحها علشات عالية زى الجوك و شكلها اشيك و ارخص
شوف راى اكتر من مالك للعربية
و ربنا يوفقك