الموضوع: عطل غريب واصلاح اغرب فى الكورولا 99 " تقرير "

السلام عليكم
عربيتى كورولا 99 عاملة حوالى 220 ألف كيلو ومعايا بقالها 10 شهور عامل بيها حوالى 18 الف كيلو غيرت العفشة الأمامية ماعدا المساعدين وايلسيلات الموتور كلها تقريبا علشان كان فى ترشيح زيت من عند السيور وبقت تمام وزى الفل
من كام يوم كنت ماشى فى صلاح سالم لقيت مؤشر الحرارة فجأة وبدون اى مقدمات بقى حوالى 3/4 ومقرب على العلامة الحمرا
رحت واقف واستنيت لما تبرد والمفاجأة الكبرى ..... لقيت الرادياتير خد حوالى 3 لتر مياة علشان يتملى !!!!
ياحلاااااااوة ... والايموشن بتاع مظهر ابو النجا
تمام العربية بردت وزى الفل روحت ولا اى حاجة
تانى يوم رحت مشوار حوالى 20 كيلو لقيت نفس الحركة حصلت والرادياتير كان شبه فاضى .
يومها رحت لميكانيكى وبعد الفحص حصل ماكنت اخشاه قالى جوان وش سلندر وهنفتح الموتور نشوف الليلة
قولت تمام ربنا يستر ودبرت الفلوس وقولت زى ماتيجى وروحتله النهاردة كنت راجع من الشغل تعبان والعربية قرفتنى فى الطريق وسخنت منى وكل شوية ازود مياه وصلت روحت سايبها قدام الورشة لحد ماييجى ورحت ع البيت ريحت شوية ورجعتله
ها ايه الاخبار ؟
والمفاجأة الكبرى قالى مش هانعمل حاجة
ليه ياعم ؟
ده انا لقيت وش السلندة مش مربوط فى البلوك كويس وربطت عليه وكله تمام
طب مش هانغير حاجة ؟
ولا حاجة خالص هنقفل غطا التاكيهات ونجرب ونشوف
قفل ياعم واملا الرادياتير وسيبناها دايرة ربع ساعةورفع العربية علشان يشوف لو في اى تسريب من دورة المياة والحمد لله فل
اطلع ياعم اقرص ع العربية وامشى فى الزحمة زى الفل برضو
طب شغل التكييف برضو مفيش حاجة وتمام التمام
زى الفل
قولت احتفالا بالمناسبة السعيدة دى نغير باه زيت الفتيس ومياة الرادياتير ونحط موبيل الخضراء واسحب هواء من الفرامل شيك على التكييف وزود فريون وغسلنا العربية
بس مارضاش يغيرلى مياة الرادياتير وقالى جرب العربية يومين لو المياة ماقلتش يبقى تيجى نغيرها

والحمد لله نجوت من العمرة باعجوبة
بس ليا كام سؤال هل لو وش السلندر مش مربوط كويس يعمل كده فعلا؟
والزيت بيقل حوالى نص لتر او اكتر شوية فى حوالى 2000 كيلو ممكن يكون منه برضو ؟
مع ملاحظة ان السحب تمام ومفيش طحينة لا فى الرادياتير ولا على غطا الزيت

اسف على الاطالة وشكرا ليكم جميعا على خبراتكم اللى بتنقلوها وفادتنى كتير جدا وحبيت أفيد انا كمان

الحمد لله ربنا يباركلك فيها وشكرا علي نقل التجربة