الموضوع: اخيرا نقلت رخصة العربية من الاسكندرية للجيزة

قررت ان اشارك بهذا الموضوع نظرا للمعاناه التى لاقيتها
اولا .روحت مرور اوسيم بالجيزة واشتريت استمارة فحص وفحصت وطلب منى المهندس بعد ما خد الاكرامية .مش عايز اقول رشوة. مطابقة فحص من مرور برج العرب بالاسكندرية وشهادة مخالفات.
ثانيا . طرت على اسكندرية وبيت ليله وقمت من الفجر وطلعت على مرور برج العرب .مرور زبالة. علشان اعمل المطابقة قعدت لغاية الساعة 11 والعسكري لسه بيجيب الملف من الارشيف المهم وبعد معاناة وبعد تظبيط العسكري خد الملف وراح لمهندس الفحص وعمل المطابقة وبعدين رحت لمكتب اخر عملت استعلام امني واهم حاجة انك بعد كل مرحلة لازم تختم من الظابط المهم.
ثالثا. طلعت بعد كده على مرور ابيس زي ما اقالولى فى برج العرب علشان شهادة المخالفات واخلص قالولى برج العرب تبع المديرية القديمة .
رابعا. طرت على المديرية القديمة بابو الدردار وكانت الساعة دخلة على 1.5 خلصولى الشهادة قبل الساعة 2 .ميعاد انصرافهم. ودفعونى الف جنيه عن مخالفة انا معملتهاش .يا اما اتظلم واقعد استنى اسبوع على ما ينظرو في التظلم وممكن يتقبل وممكن لا .
المهم الحمد لله خلصت الليلة دى فى يوم واحد ورجعت طيران على الجيزة.
خامسا. صبحت تانى يوم وطلعت على مرور اوسيم تاني علشان اسلم مطابقة الفحص وشهادة المخالفات ورحت للمهندس وظبته تاني خلصلي المطابقة ورحت ختمت من الظابط بعد ما خلاني اشتري طفاية ومثلث وشنطة اسعافات مع العلم انهم معايا اصلا بس لازم الايصالات تدبس مع الورق روحت اشترتهم وخدت ايصالاتهم ودبستهم فى الورق .
سادسا.روحت على موظف الشباك وطبعا ظبته هو كمان والمرة دى طلب هو منى وش وطلب من تامين سنتين لانى رخصت سنتين وطلب ايصال سداد الضريبة من الخزنة المهم الحمد لله الورق خلص وراح للكمبيوتر علشان يتطبع واستلمت الحمد لله الرخصة وسلمت النمر القديمة واستلمت الجديدة وطبعا ظبت العسكري اللى سلملى النمر
وانتهت معاناتي بعد ان اخذت 3 ايام اجازة من عملي ودفعت اكراميات زي ما بيسموها حوالى 200جنيه وحسبي الله ونعم الوكيل حار ونار فى جتتهم يرضى مين ده يا ناس
ارجو ان اكون قد افدتكم فى هذا الموضوع

طيب انا داخل على فحص وهنقل المرور من سوهاج لفيصل ومش عارف ابتدى منين وﻻ اروح فين بس تقريبا هبتدى بشهادة المخالفات من سوهاج لكن مش عارف ﻻزم اروح بالعربيه سوهاج وﻻ ﻻ