الموضوع: سؤال بخصوص نقص وزيادة الزيت في البيجو 301 :

سؤال بخصوص نقص وزيادة الزيت في البيجو 301 :

الموضوع باختصار اني كنت مسافر رأس سدر، أول ما وصلت حسيت صوت العربية عالي وفيه زي صوت تكتكة من الموتور، سيبت العربية لحد ما تهدى وبليل، كشفت على مقياس الزيت ، لقيته على أقل مستوى على الرغم من أن لمبة الزيت منورتش، المهم كلمت خدمة عملاء بيجو وحولوني بمهندس طواريء، قالي اني ازود كيلو زيت، المهم بعد ما لفيت على مكان عنده زيت كويس (جيبت شل) وحطيت حوالي كيلو أو أزيد حاجة بسيطة، قالي المهندس اني استني دقيقتين وأقيس الزيت، المهم لقيته على أعلى مستوى (مش عارف ازاي) بس هو قالي كده تقدر ترجع بيها وتجيلنا في أقرب فرصة (فرع غمرة)، طبعا انا رجعت تاني يوم الصبح وروحت عليهم قبل ما اروح البيت، حكيتلهم الحكاية تاني وبعد فحص قالولي أن مقياس الزيت في مشكلة وانو مش بتاعها وأن الزيت مكانش ناقص، وانهم هيغيروا المقياس والزيت على الضمان، بس بعد م استنيت طلع المهندس يقولي أن المقياس اصلا مش عندهم واني لسه هستني لما يبلغوني في خلال ايام انو وصل، المهم سألتهم يعني كده في زيت زيادة بدل العربية مكنتش ناقصة؟؟ قالولي لا خالص مفيش زيادة!! المهم انا روحت وركنت العربية وتاني يوم قولت اكشف على مقياس الزيت حسيت اني في نقط زيت على الموتور، المهم كلمت مهندس الطواري (ادالي رقمه) وروحتلهم في نفس اليوم، وقولتلهم أن عايز كشف على الموتور وأن الزيت الزيادة أو الناقص ده (أنا مبقتش عارف والله) معملش مشكلة في الموتور، المهم غسلوا الموتور وقاسو ضغط الزيت وبرضو قالولي مفش مشكلة!! أرجو الافادة لاني فعلا مش فاهم كلامهم مفيهوش منطق خالص، لو على كلامهم مفيش نقص في الزيت وأن المشكلة في المقياس يبقي الزيت الزيادة ده الي انا حطيته على مسئولية مهندس الطواري أكيد هيعمل مشكلة، ولو على كلامهم النهاردة مفيش زيت زيادة، يبقي العربية كانت ناقصة لما أنا حطيت كيلو زيت ؟؟
معلش انا طولت عليكم بس انا فعلا مش عارف اعمل ايه (العربية مانيوال عاملة 9000 كيلو ولسه معملتش صيانة ال 10000) وبعد ما مشيت لسه قلقان بصراحة قولت احجز صيانة العشرة الاف في مركز ابو رواش (مركز مختلف) واشوف ايه الحكاية بالضبطأ، اسف على الاطالة وارجو الافادة

شكرا لحضراتكوا على الرد، فعلا انا حسيت أن المهندسين في فرع غمرة كلامهم غير منطقي بالمرة، وأنا حجزت بالفعل الصيانة (10 الاف) في فرع ابو رواش يوم الاحد 19 أبريل، وهناك هغير الزيت ،
ولا اغيره انا دلوقتي بدل ما امشي بيها لحد هناك (انا ساكن في المعادي) ؟؟، أنا خايف امشي بيها المسافة ديه كلها، وفعلا ممكن اوديها لميكانيكي محترم كنت بتعامل معاه قبل كده يفهمني فيه اي بالضبط قبل ما اروح التوكيل يوم الاحد يبص عليها..