مشكله لما بدوس فرامل مش لاقيلها حل

**Elsebily** · 16-04-2015 06:31 PM

عندي مشكله لما باجي ادوس فرامل بقالها تقريبا معايا سنتين لحد دلوقتي وهي اني بعد فترة اما امشي بالعربيه فتره عشر دقايق او اكتر علي حسب درجة حرارة الجو اما باجي ادوس فرامل بعد المده دي الاقي صوت زي ما تكون حاجه بتخبط في العربيه من تحت ( صوت تك تك خفيف بس يتسمع ويتحس بيه من جوه العربيه) وقوة الصوت ده بتزيد كل ما زادت قوة الدوسه المهم لفيت علي ميكانيكيه كتير وكلهم فكو التيل وشافو الطنابير وكله يقولي لا التيل ده ليسه شغال وكويس رحت لواحد فك التيل ونضف الطنابير بالهوا وبردو الموضوع ليسه موجود لحد ما بقيت اتعامل علي انه طبيعي في العربيه بس المشكله ان لما يكون حد معايا بيقلق من الصوت ده
ياريت لو حد عنده اي اقتراحات او مر بالمشكله دي يفيدني

**mikeal2020** · 22-04-2015 02:36 PM

وانا كمان نفس الموضوع نيسان صنى الشكل القديم 2015

**beshoyyy** · 22-04-2015 02:49 PM

هل الصوت بيجي في كل مرة بدوس فيها علي الفرامل و لا لما تكون بترجع لوار و بعدين دوس فرامل و طلع الي الامام زي ماتكون تركن العربيه و بتستخدم الفيتيس كتير

**jos** · 23-04-2015 12:06 AM

الطقة دى مشهوره فى الصنى الشكل القديم بتتحس فى النص الخلفى من السياره مع دوس الفرامل وقبل متشيل رجلك من عليها

**Abo_Mazen** · 23-04-2015 09:56 AM

التيل ده ليه كليبسات ..شوفها كده لو مش راكبه ركبها ..لو راكبه وضعيفه غيرها ..خلي بالك هي ممكن ما تكونش كليبسات ..ممكن تكون صاجه كده بتبقى ورا التيل ..خلي حد شغال في العربيه دي وحافظ الفبريكه بتاعها يشوف الصاجه دي موجوده ولا لأ ..أو الكليبسات ..عشان هو ده اللي بيعمل المشكله دي ..خلي بالك ممكن يكون بيت التيل نفسه وسع..الصوت بالأمارة كمان اللي بتسمعه ما بيبقاش صوت خبط ..صوت بيبقى صوت طقطقه أو حاجه بتسك في حاجه ..مش كده برضه ؟؟؟ ..

**nabil saleh** · 23-04-2015 05:21 PM

المشاركة الأصلية كتبت بواسطة m_m_sh_a

التيل ده ليه كليبسات ..شوفها كده لو مش راكبه ركبها ..لو راكبه وضعيفه غيرها ..خلي بالك هي ممكن ما تكونش كليبسات ..ممكن تكون صاجه كده بتبقى ورا التيل ..خلي حد شغال في العربيه دي وحافظ الفبريكه بتاعها يشوف الصاجه دي موجوده ولا لأ ..أو الكليبسات ..عشان هو ده اللي بيعمل المشكله دي ..خلي بالك ممكن يكون بيت التيل نفسه وسع..الصوت بالأمارة كمان اللي بتسمعه ما بيبقاش صوت خبط ..صوت بيبقى صوت طقطقه أو حاجه بتسك في حاجه ..مش كده برضه ؟؟؟ ..

فعلا كلام حضرتك مضبوط
انا كان عندى العيب ده و طلع كليبسات مش موجودة و كنت لفيت على صنايعية كتير
لكن الحمدلله واحد صنايعى من غير ما يكشف على العربيه عرف العيب منين من الوصف
وزى ما حضرتك قلت