الموضوع: تجربتى مع فيلبس اكستريم فيجن

بقالى فترة بفكر فى تقويه الإضائه عندى فى النوبيرا
اللمض اللى فيها 50/60
فطبعا كإنها ملهاش لازمه
وعشان بسافر اسبوعيا لمنوف واللى فيكم يعرف سكة منوف وكم المطبات فيها حيعرف انه طريق مش عادى
انا مرة عديتهم لقيتهم حوالى 125 مطب فى مسافه 60 كيلو يعنى بمعدل مطبين لكل كيلو
واكيد المطبات بتبقى زباله
كان زمان قبل المطبات دى كان الطريق بياخد 50 دقيقه
دلوقتى بقى العادى انه ياخد ساعتين الا ربع
وانا مش بشوف المطبات دى وكنت بعانى منها اوى
ففكرت فى الزينون بس دخلت عالمنتدى وقريت مواضيع كتيره بس مطمنطش انى اعمله لضعف وردائه الخامات المباعه زى العدسات واللمبات الزينون والأصلى كان غالى ومعدى الألف جنيه فخفت اخوض التجربه وميعجبنيش الأداء
دا غير انى لما نزلت شارع دمشق وسألتهم عالزينون وعاوز العدسه فيها العالى والواطى لقيت اللى بيقوللى مفيش حاجه اسمها كده لازم تعدل فوانيس عربيتك وتعمل عالى لوحده وواطى لوحده
واللى يقوللى العدسات مش حلوة وبتضعف الإضاءه والزينون لازم يتركب من غير عدسه
فطبعا اسهال الفتى دا كله قفلنى من حوارات الزينون
فكرت فى انى اركب كتاوت واعلى الواط بس الناس قالتلى انه حيطوس العاكس بتاع الفانوس واللى عندى الأصلى فمحبتش اعمل كده
فمكنش ادامى غير اللمذ الفيلبس
جبتهم اكستريم فيجن من عند محل المدينه وركبتهم
الملاحظات:
طبعا فى فرق فى الإضائه
الرؤية اتحسنت شوية
بس الفرق مش الرهيب اوى
يعنى مش حتخلى الدنيا نهار وانت فنص الليل
مش حتخليك مثلا شايف كل فسفوسه عالطريق
لكنها قللت قلقى فى السواقه شويه بالليل
وخلت سواقين المكروباصات يتهتوا شويه لما بنورلهم العالى عكس زمان
بشكل عام اللى بيفكر يقوى الإضائه حتبقى دى اول درجه فى تقوية الإضائه
لو بلدنا الطرق بتاعتنا فيه عواكس عند الملفان او عند المطبات وعند الخرسانه اللى فنص الطريق كانت اللمض دى حتبقى ممتازه وكاشفه كل حاجه كويس جدا
ودا القصد انها بترمى النور لبعيد يعنى حتشوف حدود الطريق والمطبات من بعيد دا لوفيه عواكس لكن هنا فمصر مش حتكون مجدية
واى استفسار انا فى الخدمه

المشاركة الأصلية كتبت بواسطة amr011111

طالما بتسافر كتير على الزراعى فانا قريت هنا فى قسم الملاحه ان ناس بتشغل الجى بى اس وتكون مسجله المطبات قبلها باى مسافه زى 100 متر مثلاً وده ممكن يساعد ليك علشان انا عارف كمية المطبات رهيبه فى الزراعى وبالتوفيق

كان فيه برنامج اسمه trapster كان كويس بس اتوقف ومعادش ينزل تانى
فبحاول ادور على برنامج زيه سريع عشان يقدر ينبهنى قبل اى مطب