الموضوع: مشكله سخونه الشكمان( أرجو مشاركة استاذ مصطفي ) و سحب ضعيف و الموتور صوته عالي

المشاركة الأصلية كتبت بواسطة رامي سامي جاد

هما في كذا مشكله اولا الشكمان بيسخن جدا و تحت الفتيس سخن نار ميتلمسش و في الفترة الاخيرة لا حظت سحب العربيه قل و لما احمل عالدواسه الموتور ينعر ( زي اللي مركب مضخم صوت الشكمان ) و العربيه ساعات تاكل بنزين و ساعات لا يعني انا خدت مشوار ٣٠٠ كيلو و كنت مشغل التكيف طول السكة استهلك مني لأول شرطه في العداد( الربع الاول كله ) - و حاليا لما امشي مشوار حدود ٩٠ ك استهلك في حدود ١٧ لتر و كمان اول ما بطلع من العربيه بشم ريحه عام مخنوق او ني ، و بحس ان في في ريحة سخونه شديده ، زي لما تغلي مياه في كنكنه تحس في ريحه حديد حاميه .
ثانيا كان عندي مشكله رجه في الفرامل روحت لخراطه و عملت مسح طنابير وبعدها ترصيص اختفت الرجه لكن بعدها بيومين رجعت مع صوت حديد بيطقطق اتوصلت لمشكلة في البنوز و شاسيه الفرامل و غيرتهم و الصوت رجع بعد اسبوع و لما روحت لميكانيكي قالي مش كويسين و لازم يتغيروا تاني و عملت حشوة حته كان كولا و اختفت صوت الطقطقه في المطبات لكن الرجه لسه قاعدة و بلاحظها لما اشعر فرامل لكن لما أدوس جامد تختفي .
العربيه و هي عالسلانسيه بحس انها بتترج و الدريكسيون بيترج ، و احيانا بتبقي كويسه و كمان صوت الموتور عالي نسبيا ، دا مش لاقيه هنا عالمنتدي او اي مكان ؟؟؟؟
و في نقطه كمان لما اخد الغيار الثاني لازم أدوس عالدبرياج كتير علشان العربيه بترج جامد و كأنها هتفصل و لما اخد التاني و اطلع بيه احس في حاجه في العفشة مفكوكة بحس كأن حاجه مربوطه مش بأحكام ،
و العربيه بتدحف سنه يمين علي الرغم اني ظابط زوايا اكتر من ٣ مرات في شهر و عند ناس مختلفين .
أرجوكم لا تبخلوا عليا لأني مش بفهم قوي في العربيات و الميكانيكية بيدفعوني فلوس كتير و لما أقولهم علي ان المشكله في نفس المكان يقولو عيب تاني و يفتحوا شغل لبعض ، دا غير اني من قنا و الميكانيكية مش قد كده

ربنا يقويك ويعينك ..ده أنا على ما وصلت لآخر المشاركه نسيت كان في إيه في أولها ..أنا مش بتريق بس قلبي معاك ..بالنسبه لموضوع السخونه ده حاول تتأكد إن السخونيه دي في حدود أو في نطاق الفتيس والشكمان بس ..وإن المكنه مش شريك في المشكه دي ..ثانيا ..حاول تتأكد برضه إن الديسك والإسطوانه عندك مش هما اللي مسخنين الدنيا ..بص ..الحرارة دي ليها مصدر ..يا المكنه ..يا الفتيس ..يا الشكمان ..شيك على المكنه ..وإستبعدها لو طلعت مفيهاش حاجه ..شيك على الفتيس من مجاميعه ..يعني زيت وديسك وإسطوانه وكبالن داخلي وكبالن خارجي ..وكله كله ..وشيك على نظام خرج العادم عندك ..يعني تقسم الموضوع لتلات حتت ..تطلع من حاجه تدخل على التانيه ..عشان نعرف الحرارة دي جايه منين ..بالنسبه بقى لموضوع الفرامل ..في الغالب كده الطنابير اللي عندك دي مش هتعرف تضبطها تاني ..وهتفضل كده عملالك مشكله ..أنا كان عندي نفس القصه في ال 128 اللي كانت عندي ..ومسحت طنابير ورجعت تاني ..لإني لما مسحت الطنابير مغيرتش التيل ..قام التيل مبوظلي الطنابير ..عشان كده لو عايز تعمل محاولة أخيرة إنك تاخد الطنابير دي لمخرطه ..مخرطه مش ميكانيكي يعني تخلي الميكانيكي يفكها بس ..وتطلع بيها على مخرطه ..والخراط يقولك هتتحمل مسح تاني ولا لأ ..وتغير تيل وتجرب ..تشوف هتضبط معاك ولا لأ ..لو عايز تشتري دماغك وتجيب طنبورتين إستيراد وتركب وتخلص ..مع تغيير التيل طبعا ..إنت حر برضه ..بالنسبة بقى لموضوع الحدفه ..شوف الكاوتش عندك إيه ظروفه ..إنتاج سنة كام ..ولو عايز تلغي إحتمال الكاوتش ده أصلا ..بدل العجل ..هات اليمين شمال وهات الشمال يمين ...حتى مش لازم بتاع الكاوتش اللي يعملك القصه دي ..إنت ممكن تعملها بنفسك ..تبدل العجلتين وتطلع كده على طريق عدل وتشوف ..لو لقيت الحدفه بقت على الناحيه التانيه ..يعني لو هي يمين بقت شمال ولو شمال بقت يمين ..يبقى كده كده الكاوتش وما تلفش عليه كتير ..نسيت أقولك إن من ضمن الإختبارات اللي تاخد بالك منها وإنت بتكشف على الفتيس إن تشوف الأكسات بتسخن ..الجنوط بتسخن ..يعني تعمل كده مسح شامل ..حاول تشوف أسخن حته بتبقى إيه ..يعني الحراره بتبقى مركزه في أنهي نقطه ..والحرارة بتبدأ تتلاشى في أنهي حته ..كده يعني ..شوف كده وقولي

إبحث في الجانب الأيسر من الفتيس..عشان موضوع السخونه اللي كانت في الناحيه الشمال أكتر من اليمين ..وروح لبتاع شكمانات تاني ..مش هتخسر حاجه ..وقفه على البير وتسمع رأيه ..وتديله خمسه جنيه ..بس يبقى كده فعلا الشكمان طلع من القصه ..