الموضوع: تجديد رخصة وفحص بمرور ابيس فالاسكندرية

بص أنا هقولك على اللي حصل معايا والكلام ده في مرور طوسون في منطقة المنتزه بالإسكندرية وبصراحه كان معايا واحد صاحبي جري معايا في الموضوع ده
1- أخدت معايا العقد مسجل بالشهر العقاري وماضي في مشتري
2- أخدت معايا اصل بطاقتي وأصل الرخصه
3- كنت واقف على باب المرور الساعة سبعة الصبح ولقيت قدامي تلات عربيات ..واضح إنهم من المنطقة أو مبيتين عربياتهم قدام المرور
4- اول ما الباب ما فتح دخلت وقفت عربيتي في طابور الفحص وطلعت جري جري دفعت التأمين وخصوصا إن مهندس الفحص جه على الساعة 9 ..وأول ناس بيشتغلوا بتوع التأمين ..وفي الغالب عشان دي شركات خاصة فيهمهم قوي إنهم يشتغلوا بدري
5- رحت إشتريت ورق فحص وتجديد ونقل ملكية ..وأنا سايب العربيه في طابور الفحص
6- لقيت بتاع الطفايات جه روحت وريته الطفايه ودفعت اللي فيه النصيب وختمت وصل الطفاية
7- كان صاحبي جه إديته مفاتيح العربية وقلتله العربيه واقفه أهو في طابور الفحص ..شوف شغلك وإديته الورق اللي أنا أشتريته بتاع الفحص والتجديد ونقل الملكية وأنا رحت على النيابه عشان أطلع شهادة المخالفات وكان معايا أصل بطاقتي وأصل الرخصه وأصل عقد البيع لنفسي وأصل التوكيل..المرور اللي أنا تبعه النيابه بتاعته في المرور نفسه
8- رحت طلعت الرقم القديم من شباك كده بس مش تبع النيابه هو جوه المرور بس مش تبع النيابه ورحت عشان أقف في طابور قدام النيابة أسلم الرخصه وانتظر عشان أستلم الشهادة
9- ربنا يسر الحال ودخلت النيابه أستلم شهادة المخالفات عشان لو فيه حاجه لا قدر الله أدفعها ولو مفيش تدفع خمسة جنيه وتستلم شهادتك
10- لسه الموظفه بتطبع الشهاده من على الكمبيوتر ..يعني لسه هتتختم وهتتمضى من وكيل النيابه ..لقيت صاحبي بيتصل بيا على الموبايل بيقولي هات الرخصه وتعالى حالا أنا واقف قدام المهندس ..قلت للموظفه هاخد الرخصه في غمضة عين هوريها للمهندس بتاع الفحص وجاي علطول وآدي بطاقتي معاكي أهي عشان تضمني إني راجع تاني ..وقد كان ..جريت على صاحبي في طابور الفحص والمهندس شاف الرخصه وقام مالي الورق بتاعه وإداني الرخصه تاني وطلعت جري على النبابه تاني
11- في النيابه قالولونا إطلعوا بره لغاية الشهادات ما تتمضى من وكيل النيابه ..وأدونا بطاقاتنا ورخصنا
12- كان صاحبي خلص العربيه وطلعها ركنها جمب المرور بره
13- رحت إشتريت شنطة إسعافات ومثلث وإتختم الوصل بتاعهم ..الست بتاعة الشنطه والمثلث مكانتش جات الصبح لما خلصت في الطفاية
14- رجعت جري على النيابة عشان بدأوى يندهوا على أصحاب شهادات المخالفات وإستلمت شهادة المخالفات ..بصرف النظر عن إن هما ضيعوا الرخصه وقعدت أدور عليها وظرفت الوله المخبر عشره جنيه عشان يدور عليها ..بس المهم إستلمت شهادة المخالفات في الآخر
15- خدت بقى شهادة المخالفات والورق اللي أنا شاريه اللي هو ورق التجديد والفحص ونقل الملكية وطلعت عدل على مدير الوحده .البيه الضابط عشان يمضيلي على الورق ده كله
16- رحت دخلت جوه وشفت النطاق بتاع نمر عربيتي مع أنهي موظف ..عشان النمر بتاعة العربيات اللي تابعه للمرور مقسمه على بتاع خمسة أو عشرة موظفين ..كل موظف معاه جزء
17- حددت الموظف اللي نمر عربيتي في تبعه و قمت رايح شايف عسكري عشان يجيبلي ملف العربية من الأرشيف عشان يديه للموظف اللي أنا تابع له في نطاق الأرقام وطبعا إديت الرخصه للعسكري اللي جابلي الملف من الأرشيف
18- بعد كده بتجيب عسكري تاني غير العسكري الأولاني ..لإن العسكري الأولاني شغله جوه المبنى بس ما بيطعلش بره عند المهندس ..المهم بتجيب عسكري تاني عشان ياخد الملف من الموظف ..الملف اللي العسكري جابه من الأرشيف والملف الجديد اللي إنت إشتريته واللي فيه ورق الطفاية وورق الشنطة وورق المثلث ووصل التأمين وفيه برضه ورق التجديد والفحص ونقل الملكية ..ويقوم العسكري ده بقى اللي إنت جبته يطلع ياخد الملفين ويروح بيه لمهندس الفحص عشان يطابق البيانات ويقوم ماضي
19- الملف بيرجع تاني للموظف اللي قاعد جوه تقف قدامه بقى عشان تقدر الضريبه
20- الموظف يقدرلك الضريبه تقوم واخد ورقة التقدير دي وتطلع على الخزنه عشان تدفع الضريبه
21- بعد ما تدفع الضريبة تقوم راجع تاني للموظف بوصل الخزنه إنك دفعت الضريبه
22- بعد كده يقولك روح شباك الكمبيوتر إستلم رخصتك
24- تروح تقف قدام شباك الكمبيوتر وتستلم رخصتك وبعد ما تستلمها تراجع بيانتها كويس قوييييييييييي..ويكون معاك صورة من الرخصه القديمه اللي مكانتش بإسمك عشان تطابق أرقام الموتور والشاسيه ليكون فيه حاجه مكتوبه غلط ..وتراجع برضه على تاريخ الفحص اللي جاي إنه بعد تلات سنين وتاريخ الضريبة لو دافع سنه أو سنتين أو تلاتة
25- بعد كده تروح تنام بقى عشان تريح أعصابك من اليوم العويص ده

خلي بالك الإجراءات دي كلها مفيهاش نقل من مرور لمرور تاني ..كل ده وأنا تابع لنفس المرور ..شوف بقى هتمشيها مع نفسك إزاي

المشاركة الأصلية كتبت بواسطة unl0veable

طبعا انا مقدر كل كلامك بس احنا في ابيس حاجة تانية خالص

حمادة تاني بجد

http://www.nilemotors.net/nile/355747-a.html

مرور المنتزه فيه برضه تجديد الرخصه بالتليفون ..بس صاحب المشاركه قايل إن هو عنده فحص ونقل ملكيه ..وأنا برضه كان عندي فحص ونقل ملكيه ..عشان كده إضطريت وصاحب المشاركه للأسف هيضطر برضه إنه يعمل زيارة للمرور ويعمل كككككككككككككككككككككل الإجراءات اللي أنا قلت عليها دي بنفسه ..بإستثناء بس حتة شهادة المخالفات ..هو العذاب مش في شهادة المخالفات ..هو العذاب كله في شرا الطفاية وشرا شنطة الإسعافات وشرا المثلث والوقوف قدام الموظف ...وكله كوم وطابور البصمة والفحص ده كوم تاني خالص ..أو تقدر تقول حماده تاني خالص ..عموما ..ربنا ما يحوجنا لا للمرور ولا لمشاوير المرور

انا عندى فحص وتجديد لرخصة العربية فقط
انا اتصلت بيهم ف ابيس اخذت منى بيانات رخصتي وقالتلى اتصل ع الاربعاء صباحا عشان هروحلهم ع الخميس بأذن الله
وقالت لي الموظفة ان السنة الواحدة ب 350 ج وقالتلى هتروح تفحص الاول وبعدين هتجيلي فالحاسب الالي عشان اديلك شهادة المخالفات بتاعتك
دلوقتى تساؤلي بقى : انا طفائة الحريق بتاعتى استعملتها ف حدوث حريقة وكان معايا 3 اشخاص غيري استعملوا هما كمان الطفائة بتاعتهم المهم بعد ما طفينا الحريقة اخد كل واحد فينا طفائة الحريق ولكن منعرفش هل هى الطفائة بتاعته الفعلية من عدمه ؟؟ فهل اشتري مطفئة جديدة ولا اعمل ايه ؟؟
ومعايا فالعربية شنطة المثلثات علبة بيضة كده كنت واخدها من المرور من 3 سنين