نصيحتكم يا شباب عايز اشتري فولكس 1974 - 1303

**ya3mm** · 27-04-2015 07:11 PM

السلام عليكم ورحمة الله وبركاته

باذن الله انا ناويت اشتري عربية فولكس بيتلز 1303s موديل 1974، العربية من بره شكلها حلو وان شاء الله حروح اشوفها بعد بكره ، ممكن من فضلكم لو سمحتم تقولولي ايه اللي مفروض يتم فحصه في العربية عشان اتأكد من سلامتها؟ علما بأنها مش رخيصة ... هي مطلوب فيها 27000 وصاحبها في التليفون لفت نظري ان ده سعر نهائي ، انا بس عايز اعرف ازاي اتأكد من صلاحية الموتور واذا كان اتعمله عمرة قبل كده حتكون السبيكة كام ... وازاي اتأكد من الاسطوانة والدبرياج والكهربا والحاجات المهمة اللي في العربية عامة ، وايه تاني لازم ابص عليه وافحصه وازاي
متشكر جدا جدا مقدما

محمد

**Kirolos Edward** · 27-04-2015 10:06 PM

لو مش اوي في العربيات خد حد بيفهم كويس فيها

**ya3mm** · 28-04-2015 12:10 PM

الف شكر ، انا عندي فكرة عن الفولكس لكن الكلام ده كان من زمان جدا ، يعني اقدر اعرف جودة الموتور لكن معرفش اذا كان اتعمله عمرة قبل كده ولا لأ ، هي دي المشكلة ، على كل حال شكرا جزيلا على الرد والله المستعان
محمد

**Abo_Mazen** · 28-04-2015 02:26 PM

هي جايه معاك بفولكس يعني ..يعني آسف في الكلمة ..طلبت معاك فولكس ..أصلها عربيه قديمه ومكن قديم ..وليها كده نظام في الصنايعي اللي هيشتغل فيها وقطع غيارها ..وبعدين بسبعة وعشرين تجيب حاجه تانيه تركب وتستريح ..إلا لو حضرتك طالب فولكس وخلاص

**gn4me442** · 28-04-2015 03:25 PM

بص بقي يا باشا المفيد عندي انا لو حضرتك مشترتش لسه ممكن تكلمني انا عندي 2 واحده 1303 والتانيه 1300 هدلك علي المفيد كله
01280301682

**ya3mm** · 28-04-2015 04:42 PM

هو بصراحة انا بحب الفولكس وكان عندي واحدة زمان اوي اي نعم كانت مطلعة عيني بس كنت بحبها اوي ، ودي شكلها عجبني كتير ، بس حضرتك طرحت فكرة شراء عربية تانية بالمبلغ 27000 ، ايه نوع العربية اللي ممكن تكون بالمبلغ ده طيب وتكون مش محتاجة مصاريف يومية؟

**kar!m** · 28-04-2015 05:26 PM

لازم ميكانيكي فولكس يروح معاك .. يعرف الموديل و الموتور من رقم الشاسية و يقول لك الموتور متغير ولا لأ ..و حالة الموتور اللي راكب ايه و الدواخل و الرقبة و العفشة و علبة الدركسيون .. خلي بالك علبة الدركسيون ب 2000 جنية.

في ميكانيكي اسمه عاطف عبده فرج في أثر النبي ده ممتاز و محترم جدا .. اكتب في جوجل بس عاطف عبده فرج .. و في واحد اسمه عزب في جسر السويس ممتاز برضه.

بس لازم تاخد ميكانيكي فولكس معاك أو تروح بيها لميكانيكي فولكس قبل ما تشتري.

**ya3mm** · 28-04-2015 05:41 PM

شكرا جزيلا يا استاذ كريم على النصيحة وربنا يسهل للخير يارب :)

**Abo_Mazen** · 28-04-2015 06:23 PM

المشاركة الأصلية كتبت بواسطة ya3mm

هو بصراحة انا بحب الفولكس وكان عندي واحدة زمان اوي اي نعم كانت مطلعة عيني بس كنت بحبها اوي ، ودي شكلها عجبني كتير ، بس حضرتك طرحت فكرة شراء عربية تانية بالمبلغ 27000 ، ايه نوع العربية اللي ممكن تكون بالمبلغ ده طيب وتكون مش محتاجة مصاريف يومية؟

يعني ..تركب فليشيا على كدها ..تركب أونو مستريحه ..كده يعني