الموضوع: سؤال للخبراء عن لزوجة الزيوت

سؤال حضرتك فني بحت .. ويمكن ده اللي أخرني شوية علشان الرد عليه يستلزم شوية مراجعة للمعلومات والتأكد من المراجع العلمية.


طيب خلينا نبدأ..

قبل ما ندخل في تعريف القيم دي .. لازم الأول نعرف يعني إيه لزوجة..

اللزوجة باختصار بيعرفوها بإنها مقاومة المائع (السائل أو الغاز) للتغيير في الشكل ... ودي بتظهر في السوائل في شكل "التخانة".




عموما.. هحاول أتكلم عن المفاهيم الأساسية .. ومش عايز أدخل في معادلات لإن الموضوع فعلا كبير.. ويعتبر أحد المواضيع الأساسية في علم الموائع (Fluids).


اللزوجة ليها طريقتين لقياسها حسب وجهة النظر العلمية:


1- اللزوجة الديناميكية

ودي بتتقاس بمقدار حركة المائع مقارنة بالقوة الواقعة عليه لتغيير شكله..

وبتتقاس بوحدة إسمها "بواز" Poise .. ورمزها (P)

1 بواز = 0.1 باسكال.ثانية

والوحدة دي تعتبر كبيرة جدا.. فعادة بتتقسم على 100 ويسموها سنتيبواز (cP)

1 سنتيبواز = 1 ملليباسكال.ثانية

علشان كده.. الوحدة دي مهمة جدا مع العربيات علشان الزيت بيتضخ في الموتور تحت ضغط بمضخة (طلمبة) الزيت... ولازم نعرف الزيت هيتصرف إزاي أثناء الضخ.



2- اللزوجة الكينماتيكية

ودي بتعبر عن مقدار حركة المائع بدون ارتباط بأي قوى أخرى.

ودي ممكن تكون مهمة في العربيات خاصة في الأجزاء اللي بتتزيت بالانسياب الطبيعي للزيت.

بتتقاس بوحدة إسمها "ستوكس" Stokes أو ستوك" Stoke .. ورمزها (St)


1 ستوك = 1 سم مربع/ثانية

وبردو... الوحدة دي تعتبر كبيرة جدا.. فعادة بتتقسم على 100 ويسموها سنتيستوك (cSt)

1 سنتيستوك = 1 مم مربع/ثانية


لو حضرتك مهتم بالتفاصيل العلمية للموضوع تقدر تدخل على الويكيبيديا في الوصلات دي:

https://en.wikipedia.org/wiki/Viscosity
Motor oil - Wikipedia, the free encyclopedia
https://en.wikipedia.org/wiki/Dynamics
https://en.wikipedia.org/wiki/Kinematics



طيب ... إيه بقى موضوع الحرارة؟؟؟


طبيعة المواد كلها إنها بتتأثر بالحرارة... بتتمدد وتنكمش... وممكن لزوجتها تزيد أو تقل مع زيادة أو نقص الحرارة.

أغلب المواد لزوجتها بتقل مع زيادة الحرارة.. والزيوت واحدة منهم.. مع العلم بإن فيه مواد لزوجتها بتزيد مع زيادة الحرارة.. بس ده مش موضوعنا.


المهم..

اللي يهمنا هنا إن اللزوجة علشان نعرف نتعامل معاها هندسيا.. لازم نقيسها في درجة حرارة موحدة علشان نقدر نفرق بينها وبين بعض في الخصائص...


طبعا... الموضوع ده ممكن يجرنا لمسألة إن أداء الزيت هيختلف باختلاف درجات الحرارة اللي بتشتغل فيها العربية.. وإننا لازم نراعي الكلام ده واحنا بنختار لزوجة الزيت المناسب..


ده صحيح... وكان الموضوع ده سبب أساسي في وجود زيوت شتوية (لزوجتها خفيفة).. وزيوت صيفية (لزوجتها ثقيلة)

من هنا ظهرت فكرة الزيوت متعددة الدرجات (درجات اللزوجة) أو Multigrade oils... وكان الهدف منها هو إيجاد زيت يقدر يشتغل بكفاءة عالية في الصيف والشتا...

علشان كده الزيت عليه درجتين لزوجة... الصغيرة تكافئ زيت الشتا (اللي بعدها W).. والتانية تكافئ زيت الصيف.. وده كان أول ما اخترعوه في الخمسينات..




بس كان دايما فيه مشكلة.. إن بردو فيه اختلاف بين أداء الزيت في بداية التشغيل وأداؤه بعد الوصول لدرجة التشغيل المعتادة.


دلوقتي الزيوت متعددة الدرجات بتشتغل في مدى درجات حرارة (حد أقصى وحد أدنى).. والزيوت التخليقية الحديثة تقدر تشتغل كويس في كل درجات حرارة الجو المعروفة على سطح الأرض تقريبا.





ومع ذلك... مازال نظام الترقيم بدرجتين لزوجة متعارف عليه لحد دلوقتي..



حاليا.. درجتين لزوجة الزيت المكتوبين على العلبة بيتقاسوا في درجتين حرارة محددين...


الأولانية هي لزوجة الزيت في أقل درجة حرارة مسموح للزوجة دي بالتشغيل فيها..

وده بيبقى مهم جدا إننا نقيس لزوجته "الديناميكية".. علشان نعرف قدرة طلمبة الزيت على توصيله لكل أجزاء الموتور.


والتانية دايما هي درجة حرارة التشغيل عند 100 °م

وده مهم إننا نقيس لزوجته "الكينماتيكية" .. علشان نعرف قدرته على الانسياب والرجوع مرة أخرى لخزان الزيت (الكارتيرة) علشان يتضخ مرة أخرى لأجزاء الموتور


يعني... لو عندك زيت لزوجته 5W-40 مثلا.. فالـ5 تكافئ درجة اللزوجة المقاسة عند أقل درجة حرارة للجو مسموح للزيت يشتغل فيها ... والدرجات دي كالتالي:
(-35 °م) للزوجة 0W
(-30 °م) للزوجة 5W
(-25 °م) للزوجة 10W
(-20 °م) للزوجة 15W
(-15 °م) للزوجة 20W
(-10 °م) للزوجة 25W

أما الـ40 فدايماً تكافئ درجة اللزوجة عند درجة حرارة 100 مئوية.


ده جدول بيبين الفرق بين مستويات اللزوجة حسب مواصفة SAE J300 (ده اسم مواصفة منظمة الـSAE لدرجات لزوجة زيوت محركات السيارات)





طيب ليه ساعات بنلاقي في مواصفات الزيوت اللزوجة متقاسة على درجة حرارة 40 °م؟؟؟؟

ببساطة .. منظمة الـISO هي كمان عاملة مواصفات للزوجة الزيوت.. وأغلب اللي بيشتغلوا في صيانة الماكينات في المصانع عارفين الزيوت بمواصفات الـISO ... مش بمواصفات الـSAE.

المهم.. مواصفة منظمة الـISO بتقيس لزوجة الزيوت على درجة حرارة 40 °م .. لإن دي درجة حرارة التشغيل المعروفة في أغلب ماكينات العالم..


فملخص الموضوع إن شركات الزيوت بتحط اللزوجة على درجة حرارة 40 °م علشان تبقى زيوتها متصنفة حسب مواصفة الـISO... وعلى درجة حرارة 100 °م علشان تبقى متصنفة حسب مواصفة الـSAE


وعموما.. كل مواصفة بتعمل تصنيفات وأكواد للتسهيل على المستخدمين .. وكل درجة من دول ليها مدى.. يعني حد أدنى وحد أقصى


وده جدول بيعمل مقارنة بين لزوجة الزيوت حسب المنظمات المختلفة




طيب... يهمنا إيه من كل الكلام والدش اللي فوق ده؟؟


أنا كمستخدم... يهمني إن الزيت يكون بمواصفات مناسبة حسب ما مصمم الموتور بنى موتوره عليها.. لإنه اختار قيم الخلوص ونوع المعادن المناسبة بناء على افتراضات.. منها نوع الزيت المستخدم..



وبالتالي.. أنا شخصيا ما يهمنيش قوي غير إن الأكواد الموجودة على علبة الزيت تكون هي نفسها المطلوبة في الكتالوج... إذا ما كانتش أحسن منها.

والمفروض إني أخد فكرة عن إيه الفرق بين الأكواد... وإيه اللي ممكن أعمله لو ما لقيتش الأكواد دي زي الكتالوج.


...

المشاركة الأصلية كتبت بواسطة tote

شكرا جزيلا على البحث و المجهود و التبسيط
بس ممكن سؤال ؟
لو الكتالوج بينصح بـــــ 5w-30 وصاحب السيارة وضع 15w-50 فى فصل الصيف هل هناك ضرر على المحرك عند بدء الإدارة ؟
مع أطيب تمنياتى

قصد حضرتك إيه من كلمة "ينصح"؟؟

هل توجد كذا درجة لزوجة أخرى موجودة في الكتالوج لكن الكتالوج ينصح بلزوجة معينة..

ولا لا توجد أي لزوجة أخرى