الموضوع: تجربتي مع قطمة دريكسيون هيونداي إلنترا 2010

السلام عليكم ورحمة الله وبركاته ..

تجربتي مع قطمة دريكسيون إلنترا 2010

الموضوع بدأ معايا بصوت طقة خفيفه في الدريكسيون في بداية الدوران سواء يمين أو شمال وكانت العربية ساعتها عامله حوالي 45000 ألف كيلو متر وبدأ الصوت يزيد مع الوقت لحد ما بقى صوت الطقة واضح جدا وغير مريح نفسيا وانا رايح صيانه ال 50000 كيلو متر سألت عالموضوع ده في التوكيل (غبور أوتو فرع العبور) قالولي هانكشف عليها وهو احتمال من 3 :

1- مجرد تربيط

2- قطمة دريكسيون

3- علبة دريكسيون

بعد الكشف بلغوني إنها قطمة دريكسيون وبتتغير ب 15000 جنيه !!! طبعا معملتهاش واخدت العربية وسألت ودورت عالنت والصراحه كان في موضوع منشور هنا في نايل موتورز عن نفس الموضوع من مشاركات الاستاذ m_zizo620 عن تجربته مع نفس المشكله وانه راح لكهربائي سيارات اسمه الاسطى عماد وده اللينك بتاع الموضوع

http://www.nilemotors.net/Nile/445997-hd-200-a.html

وبالفعل اخدت العربيه ورحت للاسطى عماد وده كان ملخص الزيارة:

- أنا : السلام عليكم الاسطى عماد موجود ؟

- أحمد بسكوتة (الصنايعي اللي بيشتغل في الموضوع ده بإيده) : ايوة موجود ثواني وجاي هو بيجرب عربية .. خير أأمر ؟

- أنا : عاوزه يشوفلي الدريكسيون كده

- بسكوته (بص عالعربية من بعيد لما لقاها إالنترا قالي) : في صوت طقه وانت بتلف بيه ؟

- أنا : بالظبط كده انت عرفت منين ؟

- بسكوتة : الموضوع ده منتشر جدا في إلنترا .. ده انا حتى لسه عامل الموضوع ده لزبون امبارح حتى تعالى بص ( واخدني جوه الورشه ووراني عنده قطمتين دريكسيون قدام مغيرهم)

- أنا : طب الموضوع بسيط يعني ولا ايه

- بسكوته : المشكله في قطمة الدريكسيون في جواها جلبه بتكون دابت بنحل القطمة ونغيرها ونرجعها تاني بدل ما تشتري قطمة جديدة .. الأسطى عماد وصل أهو

- أنا : السلام عليكم إزيك يا أسطى عماد .. كان عندى صوت طقة في الدريكسيون

- الاسطى عماد : فعلا دي من قطمة الدريكسيون هانحلها ونغير الجلبه .

- أنا : الموضوع بسيط يعني يا اسطى عماد ولا ايه انا اول مرة اطلع العربية بره التوكيل ومش عاوز اعمل فيها حاجة لو انت مش متأكد يعني

- الاسطى عماد : انا بفضل الله عملت الموضوع ده في اكتر من 13 عربية من نفس الموديل بتاعك كده ومافيش حد رجع اشتكى منها وعالموم القرار ليك انت وانا اضمنلك ان العربية هاتستلمها مني زي ما هي كده.

- انا : اصل في ناس اشتكت انهم بعد ما عملوا الموضوع ده لمبة ال eps فضلت منورة ومش بتطفي وكمان الدريكسيون تقل والعربيه وهي ماشيه عدل الدريكسون بيكون مايل

- الاسطى عماد : يا باشمهندس بأمر الله هاتستلم العربيه مني زي ما هي كده .. انا مش اول مرة اعمله ماتقلقش.

- أنا : الموضوع هاياخد وقت ؟

- الاسطى عماد : من ساعة ونص لساعتين ان شاء الله وهاتتكلف 300 جنيه

- أنا : توكل على الله بس مش هاوصيك والله العربيه اول مرة تروح لحد بره التوكيل

- الاسطى عماد : خليها على الله

وبدأ احمد بسكوته يحل الدريكسيون كله من جوه الصالون لحد ما فك القطمة وبعدين حل القطمة كلها لحد ما وصل للجلبه وورهالي كانت متبهدله ودايبه خالص فعلا وشالها وجه الاسطى عماد غيرها وبعدين رجع بسكوتة ركب كل حاجة تاني وطلعنا نجرب العربيه عشان عدلة الدريكسيون وفعلا الصوت اختفى خالص وظبطلي الدريكسيون زي ما كان وفعلا الدركسيون ماتقلش ولا حاجة وفضل ناعم ومافيش لمبات نورت والدريكسيون بقى زي الفل والحمد لله.

الخلاصة :

- الاسطى عماد : راجل محترم وعنده ضمير ويعرف ربنا وعبقري في شغله وفنان مع العلم ان دي كانت اول مرة اشوفه فيها.

- أحمد بسكوتة : شاب زي العسل وشاطر جدا وفك القطمة وركبها بمنتى السلاسة والسهوله وكان باين جدا انه عمل الموضوع ده كتير قوي قبل كده وفاهم هو بيعمل ايه.

- التكلفه : 300 جنيهوبصراحة راضيت بسكوته برضه لانه هو اللي عمل كل حاجة ويستاهل لانه شاطر.

- عنوان الورشه : 74 ش الدويدار – حدائق القبة – امام مول السوق الكبير مباشرة وانت رايح على ميدان الحدايق عالشمال.

- اي حد عنده الموضوع ده بجد يتوكل على الله ويروح له عالطول وهايدعيلي وياريت اللي يروح يحكيلنا تجربته.

- أخر حاجة احب اشكر اصحابي م/ أحمد حسين و م/ عمرو شاهين اللي تعبوا معايا في الموضوع ده وساعدوني لحد مالمشكله اتحلت والحمد لله.

عن أبي هريرة رضي الله عنه ، عن رسول الله صلى الله عليه وسلم ، قال : من نفس عن مؤمن كربة من كرب الدنيا ، نفس الله عنه كربة من كرب يوم القيامة ، ومن يسر على معسر ، يسر الله عليه في الدنيا والآخرة ، ومن ستر مسلما ، ستره الله في الدنيا والآخرة ، والله في عون العبد ، ما كان العبد في عون أخيه ، ومن سلك طريقا يلتمس فيه علما ، سهل الله له به طريقا إلى الجنة ، وما جلس قوم في بيت من بيوت الله ، يتلون كتاب الله ، ويتدارسونه بينهم ، إلا نزلت عليهم السكينة ، وغشيتهم الرحمة ، وحفتهم الملائكة ، وذكرهم الله فيمن عنده ، ومن بطأ به عمله ، لم يسرع به نسبه رواه مسلم .

وربنا يسترها عينا وعليكم

تم رفع الصور

المشاركة الأصلية كتبت بواسطة saif aldori

موضوع جميل جداً ومن سنه وانا بدور عليه بس المواقع الاجنبيه بتكلم عنه بس هل في حل لي لمبة ال eps المنوره عندي ياريت لو حد يعرف كهرباء او مجربه يبرمج الكنترول بتاع الدركسيون عشان الناس بتقول لازم تبديل ومع التبديل مش حيتضبط لازم برمجه !!!

على فكرة هو كهربائي وممكن تلاقي عنده حل لموضوع لمبة ال eps وعنده جهاز الكشف عن الاعطال بالكمبيوتر.

بس نصيحة لو مشكله في البرمجة وديها التوكيل او اي مركز معتمد يكشفوا عليها بالكمبيوتر.