استفسار لعربية جديدة

**Delli7** · 21-05-2015 06:10 PM

السلام عليكم,

حاليا معايا جيلي ام جراند 2015
عاملة حوالي 7000 كم

و بسم الله ماشاء الله العربية ممتازة
بس بافكر اغيرها و اتجه لنوع تاني

محتاج عربية تكون كويسة و كمالياتها مريحة
من تكييف - باور - طارة مالتي - تكون مرتفعة عن الارض علشان المطبات - الكاسيت يكون ظريف - تقفيل العربية يكون ممتاز - اسعار قطع الغيار - الصيانات الدورية في التوكيل - التوكيل نفسه يكون كويس ومعاملتهم حلوة

في نفس الوقت ماتكونش غالية علشان مادفعش كتير علي تمن العربية اللي معايا

ياتري تنصحوني بايه ؟

*ملحوظة: محتاج اي عيوب او مميزات للعربية هنا لأني هافتح نفس الموضوع في كذا قسم ومحتاج اقارن بشكل عادل بين كل عربية و التانية

تحياتي

**ENG.MaRk** · 22-05-2015 09:55 AM

مفيش حاجة فيها كل اللي انت عايزه يعني مستحيل تجيب عربية في مصر تريحك 100% لأنك لو جبت حاجة فيها كماليات كتيرة هتلاقي مثلاً توكيلها سئ و مراكز خدمتها مش كتيرة و لو جبت حاجة توكيلها كويس هتلاقي قطع غيارها مش متوفرة برة حتي لو جبت عربية غالية و توكيلها مهتم بيها هتلاقي قطع غيارها غالية ف خلاصة الكلام انزل اتفرج و هتلاقي عربيتك بتنادي عليك بنفسها بتقولك أنا أهو ... لو ميزانيتك 140000 هات سيات توليدو تاني فئة و لو الميزانية 150000 هات كروز أو شارك تالت فئة و لو الميزانية ممكن توصل ل 165000 هات فلوانس تاني فئة أوتو

**Delli7** · 22-05-2015 01:05 PM

شكرا لردك,
لكن الميزانية ماتوصلش كدة خالص :d

ممكن في حدود 115 الف بس كحد اقصي,

لو في اوتو جديد او مستعمل نضيف مافيش مشكلة, مع اني مابحبش المشتعمل و بخاف منه

**ENG.MaRk** · 22-05-2015 01:26 PM

لو ماعندكش نية إنك تغير قريب أو انت من النوع اللي العربية بتقعد معاه كتير يبقي حطهم مقدم عربية كويسة و قسط الباقي لو الكاش مش متاح لأن القسط هيبقي كلام فاضي آخره 1300 جنيه و أعتقد المبلغ ده مش صعب يتوفر كل شهر و علي فكرة ممكن كمان تجيبها من معرض عامل عرض للتقسيط أول قسط بعد 3 شهور :) ... للأسف 115000 مايجيبوش عربية كويسة لأن تقريباً آخرهم صني أو بيجو 301 أو سيتروين C-Elysée و هتبقي فئة أولي و فاضية مش هتلاقي فيها كماليات ترضيك و ممكن تفكر في الريو بس برضه الكوري ياتجيبه هاي لاين يا إما بلاش ... ممكن بروتون بيرسونا بس مش هتحس بنقلة كبيرة عن الجيلي ... اقعد مع نفسك و احسبها كويس بالورقة و القلم و انزل اتفرج علي العربيات و اعرف الأسعار و انت هتعرف تحدد بنفسك انت هتعمل ايه لأن العربيات تتفاوت فيها الآراء و العربية من الكلام عنها حاجة و في الواقع حاجة تانية ... ربنا يوفقك لما فيه الخير ... تحياتي

**Delli7** · 22-05-2015 03:03 PM

بص في دماغي دلوقت اختيار من دول:
*ملحوظة: كلهم اعلي فئة و اوتوماتيك

1. جديد: ميتسوبيشي اتراج
2. جديد: رينو لوجان

3. مستعمل: كيا سيراتو 2010
4. مستعمل: فولكس فاجن جيتا 2007

بس معرفش تفاصيل مواصفات العربيات الجديدة ايه ياريت لو تقدر تفيدني بيهم كمواصفات كاملة و اسعار (علماً باني في المعلومات الفنية مش قد كدة فالبحث من خلال جوجل مش مفهمني انهي افضل :D)

و المستعمل بافكر بشدة في توكيل غبور لأنهم في فابريكا من خلال تاعملي معاهم للصيانة الدورية للعربية اللي معايا محترمين جداً و بينجزو طلباتي بسرعة
ودي روابط العربيتين المستعملين:

كيا سيراتو:
عملية الشراء | فابريكا

فولكس فاجن جيتا:
عملية الشراء | فابريكا

تحياتي

**ENG.MaRk** · 22-05-2015 06:28 PM

هات سيتروين سي اليزيه

**Delli7** · 22-05-2015 07:14 PM

معلش نوعها ايه العربية دي
ماسمعتش عنها قبل كدة
فمش عارف هي تبع ايه :d
خبرتي معدومة تقريبا ومقتصرة علي بعض العربيات اللي اعرفها بس

فياريت مواصفات و تفاصيل العربية اللي بتقول عليها

تحياتي

**Delli7** · 22-05-2015 07:17 PM

بحثت عنها بسرعة كدة
لقيت سعرها اكبر من المتاح معايا (حوالي 140 الف)
ومابحبش القسط لأنه هيخنقني كل شهر :(

ياريت تفيدني في العربيتين اللي رشحتهم (كيا 2010 - فلوكس جيتا 2007)

تحياتي

**ENG.MaRk** · 22-05-2015 10:27 PM

للأسف علشان أقدر أفيدك لازم أشوف العربيتين بعيني و أركبهم لأن الصور مش بتوضح إذا كانت رشة ولا لا أو مخبوطة أو ايه نظامها بالظبط لكن الجيتا عايزة وش نضافة و مليانة خدوش و السيراتو الstart/stop engine متشال و ركز في الصور و لو مش فارق معاك مستعمل يبقي دور علي رينو فلوانس 2010-2012 هتلاقيها في حدود السعر اللي معاك و ديه عربية كانت معايا عملت بيها 147000 كم بدون مشاكل الحمد لله