مطب غبى غير مدهون ؟

**wael6** · 31-05-2015 04:55 PM

السلام عليكم
عندى مطب امام مدرسة فى المنصورة
معمول عالى ومش مدهون ولا متخطط ( مطب غبي )
ومعظم العربيات بتتخبط فيه
هل اقوم بدهانه ؟
ولا ابلغ الحى ولا اعمل ايه ؟
ولو هدهنه انا اجيبله دهان نوعه ايه ؟ومنين ؟
منهم لله اللى بيعملوا المطبات ويسيبوها تأذى الخلق

متابع
وشكرا جزيلا

**Mecha** · 31-05-2015 06:18 PM

عالي ماشي المهم يكون بحره طويل ارحم من المطبات البلدي بنت التيوته بحرها قصير ومبتلحقش تدري ولا تهدي دب دب .دهانات الاسفلت اسبشيال ومنها ساخن وبارد ,ممكن تحط علامة تحذير فوسفوري

**فتح الباب** · 31-05-2015 08:28 PM

نفسى الناس كلها تفكر زيك كده ساعتها ممكن نكون ارقى واشيك شعب فى العالم وربنا يباركلك على فكره انا بفكر زيك بالظبط بس هعمل ايه ولا ايه الواحد بيتعب نفسيا فى اليوم ١٠٠ مره اما بالنسبه للدهان فمش محتاج تاخد راى حد طبعا والنوعيه زى ما قال الزميل العذيذ ميكا ٠ تقبل مرورى

**HishamShafai** · 31-05-2015 09:19 PM

و الله إحنا لو ننتج أي سلعة بمستوى و حجم تشييد المطبات لأصبحنا أكبر قوة إقتصادية في العالم ما شاء الله كل واحد عنده محل متر في متر و مش لاقى ياكل بس تحس إنه واجب قومى إنه يعمل مطب مثل السيف بعرض الشارع لدرجة فيه حارات ضيقة تلقى فيها 3 مطبات ورا بعض يقسموا وسط العربية حسبنا الله و نعم الوكيل

**wael6** · 01-06-2015 01:15 AM

المشاركة الأصلية كتبت بواسطة mecha

عالي ماشي المهم يكون بحره طويل ارحم من المطبات البلدي بنت التيوته بحرها قصير ومبتلحقش تدري ولا تهدي دب دب .دهانات الاسفلت اسبشيال ومنها ساخن وبارد ,ممكن تحط علامة تحذير فوسفوري

متشكر جدا للتوضيح والاهتمام
اجيب الدهانات منين ؟
من محل بويه عادى
واقوله عاوز دهان فسفوري اسبيسيال

ولو هحط علامات هتكون على ماسورة زى علامات المرور ؟

وجزاكم الله خيرا
ويارب نشوف مصر فى افضل الاحوال

**Mecha** · 01-06-2015 05:29 AM

لو مصمم علي الدهان ,دي سبشيال عشان تستحمل حك العجل وتعيش ,جرب شركة كيماويات البناء الحديث . العلامه هتتقبها والماسوره وتربطهم بمسمارين . وياريت ماسورتين يمين وشمال وتحفر الاسفلت وترشقهم.