الموضوع: مقارنة هاتفيد ناس كتير اوي - لانسر شارك و سوزوكي سياز ..

بسم الله الرحمن الرحيم

مبدأيا مش حابب لما أقارن أقول دي فئة ودي فئة.. عشان غالبا اللي بيحدد الفئات عندنا في مصر هو السعر مش اكتر.. دلوقتي اللوجان بقت بتتقارن مع نيسان صني وستروين سي إليزيه.. بعد ما كانت بتتقارن بالفيرنا والانوس.. عشان سعرها زاد مش اكتر... فلو كانت الشارك سعرها قليل كانت اتقارنت مع السياز والعكس لو كانت السياز اغلى كانت اتقارنت بالشارك.. عموما : العربيتين ممتازين جدااا بس كل واحد له إحتياجات في العربية هيختار على اساسها ودا اللي انا هوضحوا في المقارنة.

فتعالو نسيب السعر للأخر ونتكلم شوية بحيادية وبدون تعصب ونقارن بين العربيتين من حيث عدة نقاط انا شايفها من وجهة نظري مهمة جداا خصوصا بعد ما ناس عدت حاجز ال 20 الف كيلو بالنسبة للسياز وبتشهد بكفاءة العربية.

1. التصنيع :

* الشارك : صناعة ياباني بالكامل وقبليها كانت البومة بردو نفس النظام ودا طبعا يديها اعتمادية وجودة الياباني.

* السياز : صناعة وتقفيل هندي بإشراف ياباني لشركة سوزوكي اللي بتمتلك 51 % من شركة ماروتي في الهند ومعظم تكنولوجيا العربية ياباني زي الماتور ال VVT وشركة ماروتي ليها عربيات في مصر من زمان ومعروفة ايضا بإعتماديتها.

* بناء على ما سبق : أقدر أقيم الإعتمادية : 9/10 للشارك و 8 / 10 للسياز.

2. المحرك والفتيس :

* الشارك : ماتور مايفك رياضي 1600 سي سي 117 حصان والفتيس اتوماتيك عادي 4 نقلات مش محسوسين زي معظ الأوروبي.

* السياز : ماتور VVT بتكنولوجيا ياباني زي مواتير التويوتا وقدرته 1400 سي سي 95 حصان والفتيس بردو عادي 4 نقلات مش محسوسين.

* بناء على ما سبق : قوة الماتور لصالح الشارك بس دا على حساب الصوت المزعج للماتور الرياضي وكمان استهلاك بنزين اكتر بينما السياز الماتور بتاعها مناسب جداا واستهلاك بنزين رائع ونعومة في الصوت.

* مع الأخذ في الإعتبار : الأتنين مفيش بينهم فرق ملموس في السحب والتكييف والتحميل والمطالع ودا حرفيا من الملاك ، اللي كان منهم نازلين مثلا من فيرنا وراكبين سياز.

* ملحوظة بردو شوفتها بعيني : العربيتين دول ومعاهم التويوتا ياريس عند الوصول لسرعة 200 كيلو متر في الساعة ال RPM بتاعهم بيبقى على 5000 لفة في الدقيقة.. بينما مثلا عداد البيجو 301 كان على RPM 6000 في سرعة 200. ودا بيورينا كفاءة ماتور السياز والشارك.

3. التكييف : ممتاز في الأتنين ولا يؤثر على السحب.

4. العفشة : ممتازة في الاتنين مع تفوق السياز في بعض الأحيان من حيث النعومة.

5. الثبات : في تفوق واضح للشارك ولكن دا على سرعات عالية فوق ال 160 .. قبل كدة الأتنين ممتازين بشهادة الملاك.

6. الصاج والمتانة : الاتنين تقريبا زي بعض مفيش فروق ملموسة في قوة الصاج.

7. الكماليات : الاتنين فيهم كماليات كتير سواء اعلى فئة في الشارك او السياز.

8. شنطة العربية : ضيقة جدا في الشارك وواسعة في السياز.

9. وسع العربية : الاتنين واسعين ومريحين.

10. وسائل الأمان : زي بعض في كل وسائل الأمان اللي خاصة بالفرامل زي ABS, EBD لكن بالنسبة للأير باج في فئات في الشارك فيها تقريبا 9 إيرباج ودا طبعا امان اكتر من السياز لأن السياز فيها 2 ايرباج بس.

11. التوكيل : تقريبا الأتنين زي بعض تعبانين وزي الزفت وممكن دايموند يتفوق بفارق ليس كبير على مودرن.

12. اسعار قطع الغيار وتوافرها : بالنسبة لقطع الغيار الأتنين متوافرين في التوكيل والأسعار ارخص بالنسبة للسياز.. ولكن اللي يميز الشارك ان حاجاتها موجودة برة كتير وكذا صناعة في حين ان السياز لسة منتشرتش بالدرجة اللي تخلي ليها قطع غيار برة التوكيل.

13. الإنتشار وإعادة البيع : طبعا في صالح الشارك لأنها موجودة من زمان في السوق وإعادة البيع لصالحها ولكن في نقطتين لازم ناخد بالنا منهم : اولا: السياز لسة مخدتش وقت كافي للإنتشار - العربية إنتاج 2014 - والحاجة التانية إن في عند بعض الناس إتجاه من زمان ان ماتور الشارك ضعيف على جسم العربية ودا طبعا قبل ما يغيروه بماتور أقوى ودا طبعا مخلي مثلا إعادة بيع البومة احسن بكتير من الشارك.

14. الإرتفاع عن الأرض : ال Ground Clearance في السياز أكبر من الشارك، وعشان كدة السياز مش بتحك في المطبات.

15. بعض عيوب العربيتين :

* الشارك : الشنطة ضيقة والعزل سيء جدا وقطع الغيار غالية.

* السياز : الثبات بيقل على السرعات المرتفعة اوي من 160 وطالع.. وبعض الخامات في السيارة رديئة زي عدم تقفيل الشنطة بشكل كويس.. وكمان عدم وجود بار للحماية خلف الإكصدام الخلفي.

16. أخيرا السعر : سعر السياز 124,400 في التوكيل و برة بتوصل ل 131,000 بالنسبة للشارك في منها فئات كتيرة جدا خليجي ووكيل وشرق اوسط.. بس بيتهيألي ان اعلى فئة ممكن تكون في حدود 160 الف ممكن ازيد ممكن أقل.

** الحكم النهائي **

أولا : الإستخارة ثم الإستخارة ثم الإستخارة. ثانيا : العربيتين فعلا ممتازين جدااا بس لو انت من هواة السفر الكتير وبتمشي دايما على سرعات عالية فوق ال 160 و 140 ومسافات كبيرة الشارك هتكون اختيار مناسب ليك.. اما لو معظم مشاويرك داخل البلد وسفرك قليل مرة او مرتين في الأسبوع وتحركاتك بين محافظات جنب بعضها هتكون السياز مناسبة ليك وهتستمتع بتوفير البنزين الخرافي..

يارب أكون عرفت أفيدكو..

[/SIZE]

المشاركة الأصلية كتبت بواسطة Mohamed Awny91

مقدرش افتي الصراحة في عدد الأيرباج بس انا فاكر اني شوفت في فئة في الشرق الأوسط فيها 9 ايرباج.. اما بالنسبة للفئة السعرية فدا مبدأ انا رافضو تماما لأن علميا مش إمكانيات العربية فقط إللي بتتحكم في السعر.. في أشياء أخرى زي الطلب على المنتج والسمعة وخلافو.. وعموما اللي يثبت صحة كلامي ان في عربيات نزل عليه تخفيض جامد جداا بسبب عدم الطلب عليها زي السي إليزيه (نزل عليها 15 الف تخفيض) والسيات توليدو نزل عليها تخفيض بردو 25 الف جنية. هل معنى انها نزلت في السعر يبقى إمكانيتها وحشة وتتقارن مع مثيلاتها في نفس الفئة السعرية ؟؟

أنا متأكد يا فندم إن عدد الair bags في أعلي فئة شارك عموماً نزلت مصر 8 و غالباً بيكون عدد الair bags في أي عربية even و موضوع الفئة السعرية حضرتك أخطأت فهمه لأن قصدي إن الشارك طلعت لفئة أعلي منها بسبب سعرها في حين إن السياز اللي تساوي تالت فئة في الكماليات إذا مازادتش عنها واقفة مكانها