تشتري اية في حدود 220 الف؟

**dr.amr** · 09-06-2015 05:27 PM

تشتري اية في حدود 220 الف
بس يفضل مايكونش يحتاج 95
لقيت اختيارات كتير اوي
كورولا استرا اوكتافيا قاشقاي سبورتاج هيونداي اي اكس مازدا3 جيتا
اللي عندة ترشيحات تانية يقول
بس ياريت اي اختيار اعرف سببة ايه
اهم حاجة بالنسبالي الثبات مع تماسك الاجزاء الداخلية للسيارة اطول فترة ممكنة
بتضايق جدا من العربية لما تابلوهها او ابوابها تقعد تزيق وتفكك من بعضها
شاكر جدا لمساعدتكم

**أشرف** · 09-06-2015 05:40 PM

أفضل الكيا سبورتاج لو بتحب عبية suv

او الكرولا لو عاوز عربية سيدان

**AhmedFarhan** · 09-06-2015 05:46 PM

سيفيك عربيه جميله و ملهاش مشاكل

**Islam.zakzouk** · 09-06-2015 05:56 PM

استرا
أو
فلوانس e4

المازدا 3 جميلة جدا من حيث الجودة بس للاسف الوكيل منزلها بماتور غير مناسب ومبالغ في سعرها

**Ahmed Academy** · 09-06-2015 06:16 PM

[SIZE="3"][FONT="Trebuchet MS"]انا كنت في حيرة شبه حيرتك كده شوية بس كنت بقارن بين استرا واوكتافيا ومازدا 3 وكورولا والحمد لله رسيت خلاص علي الاسترا ومعايا بقالها شهرين والحمد لله مش ندمان علي اختياري ولو رجع بيا الوقت شوية هختارها برضه ...... المازدا 3 اشيك عربية فيهم من جوا ومن بره كمان بس موتورها تعبان و 4 سرعات بس و 105 حصان يعني هتشتري عربية منظر مش اكتر ... الكورولا حلوة بس انا عرفت بعد كدة انه حرام تقارن ياباني بالماني :D ....... والاوكتافيا اللي ب 200 دي اقل فئة يعني العربية فاضية خاااالص من جوا يعني حرام تدفع 200 الف عشان تقول راكب اوكتافيا A7 والعربية من جوا مفهاش كماليات خااالص ...... الكيا سبورتاج والهيونداي اي اكس معرفش عنهم حاجة بس زي ما قولتلك متقارنش بين ياباني والماني فما بالك بالكوري بقي xD ...... بالنسبة للاسترا اللي حببني فيها انها فيها esp مش موجود في المازدا وتقريبا الكورولا مفهاش برضه وطبعا ال esp مهم من غير كلام ...... من الاخر واحد قالي الجملة دي وهي فعلا صحيحة " عايز تمشي جوا البلد اركب كورولا او مازدا او كوري مش هيزعلوك خااااالص وهتكون مبسوط وهتلاقيهم احسن من الاسترا جوا البلد ..... انما عايز عربية بره البلد يبقي الماني اكيد ..... وفي حدود 200 الف دول يجبولك الماني زي الجيتا والاسترا والاوكتافيا احنا اتكلمنا عنهم ما عدا الجيتا ....... الجيتا بقي بتنزل بفتيس dsg وده مشاكله كتيييير جدا عن تجربة من ناس صحابي الفتيس حلو جدا بس مينفعش لمصر وعلي فكرة في ناس اشترتها ومحصلش اي مشاكل معاهم خااااااالص في الفتيس بس برضه مقدرش اقولك ان اللي حصل معاهم مشاكل نسبة قليلة لانهم كتير فعلا وروح اسأل علي الجروب بتاعهم وشوف المشاكل اللي فيها ........ انا مش هستفاد حاجة لما انتا تجيب الاسترا بس انا حبيت افيدك عشان عارف انتا محتار ازاي عشان انا كنت زيك بالظبط بس انتا بتقارن في نطاق وااااسع اوووي يعني انتا مش محدد عايز عربية عالية ولا ايه الكلام انتا بتقارن بين حاجات مختلفة عن بعضها وعن اغراضها اللي معمولة عشانها .

**Moataz Slaeh** · 09-06-2015 06:23 PM

اكيد كورولا مفيش وجه مقارنه، ماركه عريقه قطع غيار رخيصه ومتوفره شكل جميل ده غير اعاده البيع

**د.هشام** · 09-06-2015 06:34 PM

زود شوية وهات بيجو 508

**roffa1** · 09-06-2015 06:40 PM

بأختصار كده و مش هطول عليك . لو عاوز عربيه زيرو أعطال و معمره بمعنى آخر ..عربيه متوديكش للميكانيكى لكن انت اللى تاخدها للميكانيكى للصيانه يبقى عليك وعلى اليابانى أو الكورى . أما الالمانى فخامه و ثبات ملهومش مثيل لكن أعطال كتيره . بمعنى آخر انا معايا تيوتا كرولا 2007 عامله 117000 كم ....مفيش مره واحده رحت بيها للتوكيل الا علشان أعمل الصيانات الدوريه و بعملها كل 20000 كم . حتى التكييف زى ما هو مزودتهوش .هاتلى عربيه ألمانى عامله 120000 كم و ماظهرش فيها عيب فى التكييف أو الفتيس . للأسف فيه ناس فاهمه انها لما تشترى عربيه ألمانى هتفضل معاه زى اليوم الاول لما شافتها فى الاجنص

**ali ashraf** · 09-06-2015 07:03 PM

المشاركة الأصلية كتبت بواسطة د.هشام

زود شوية وهات بيجو 508

رد على د هشام و البيجو 508 فيناك يا مهندس مارك

**ENG.MaRk** · 10-06-2015 01:02 AM

المشاركة الأصلية كتبت بواسطة ali ashraf

رد على د هشام و البيجو 508 فيناك يا مهندس مارك

انا موجود يا فندم أهو و أضم صوتي لصوت د هشام و أقول زود 20000 و هات 508 أو هات قاشقاي لأنها عربية SUV محترمة عفشتها multilink و سحبها ممتاز بعكس كل التوقعات من موتور 1.2 و طبعاً تقفيل إنجليزي لا يعلي عليه و كماليات ممتازة و أنا شخصياً كنت بأفكر أجيبها لأني اكتشفت إن البلد محتاجة SUV و أنا مش عايز أبهدل ال508 و خصوصاً إني دلوقتي مش هسافر ألمانيا تاني غير في 2017 لأن المدام مصممة إن الأولاد يقعدوا شوية في مصر و طبعاً الحكم إلزامي :) ... ملحوظة أنا كان معايا قاشقاي 2012 و لما جربت الجديدة عجبتني جداً و الفرق بينهم ملحوظ بشكل كبير سواء في الDimensions أو الخامات الداخلية أو الoptions و نصيحتي ليك هات ال508 لأنها عربية فارقة في كل حاجة عن كل الC segment و أحسن بكتير في كل حاجة و بالنسبة لموضوع البنزين ده اطمئن بتاخد 92 عادي و ربنا يوفقك لما فيه الخير إن شاء الله :)