الموضوع: بعض النصايح للمسافر على الصحراوى الشرقى

السلام عليكم اعضاء المنتدى الكرام كل سنه وانتو طيبين ويارب ديما فى احسن حال . ندخل فى الموضوع كنت محتاج احذر كل اللى هايسافر على طريق الجيش الصحراوى الشرقى من حلوان حتى المنيا والعكس لان دة اللى انا مشيت عليه واتعرضت لواقف كتير قوى عليه

1 _ نبدأ باسم الله ونتأكد من ضغط الكاوتش _ المياه _ الزيت ..........الخ لعدم وجود خدمات على الطريق وبالنسبه للبنزين فى وطنيه حلوان اتجاه بنى سويف ووطنيه فى الاتجاه المقابل ووطنيه الكريمات ودى بنزين 80 وسولار بس و مفيش 92 ومتعتمدش عليهم لان ساعات كتير مفيش بنزين وده غير الزحمه .

2 _ حاول يكون معاك اكتر من شبكة محمول لضعف التغطيه على الطريق كله وياريت يكون معاك رقم تليفون كساحه ويكون حد تثق فيه ومجربه احتمال تحتاجه لو حصل عطل او غيره لا قدر الله .

3 _ مع بداية الطريق من بوابة حلوان او العكس ياريت تصفر الرحلات علشان لو حصل اى حاجه حضرتك تعرف مكانك فى الكيلو كام والمسافات هى من حلوان الى الكريمات 50 ك ومن الكريمات لبنى سويف 40 ك ومن بنى سويف للمنيا 130 ك .

4 _ الاهم والاخطر على الطريق ده هو تيار الهوا ايوه فعلا طيار الهوا واللى جرب الطريق او اللى هايجرب هيتأكد بنفسه من الكلام ده فبر جاء ماتجريش على الطريق ده اكتر من السرعه المقرره حتى والطريق فاضى وتكون متاكد من عفشة عربيتك جدا لان هاتحس بعومان شديد جدا جدا خصوصا عند مرورك بين جبلين او بجوار حواجز خرسانيه مكسوره لان بيحصل تفريغ لتيار الهوا يسبب غربله شديده وممكن يسبب حادث لا قدر الله . بأكد تانى جميع انواع العربيات شفتها فى حوادث على الطريق ده لحد البى ام 740 كانت برضوا عامله حادثه بس معرفش ايه السبب . ياريت حضرتك لو معاك حموله ( افراد _ شنط ) توزع الحمل فى العربيه بالتساوى ده هايساعد فى اتزان العربيه .

5 _ لو حضرتك محتاج تخطى نقل او اتوبيس حاول تبعد عنه بمسافه حاره كامله واوعى تخطى من بين عربيتين نقل لان بيحصل برضوا تفريغ هوا بيعمل غربله شديده وخلى بالك بيحصل تخطى من اليمين من سواقين كتير .

6 _ احذر كل الحذر من عربيات نقل الطوب والبلوك بتاع الرخام لان العربيات دى نسبه كبيره منها متهالكه وبلوك الرخام غير مؤمن على العربيه ممكن يقع ويسبب كوارث نسأل الله السلامه وكمان ياريت نخلى بالنا من الكاوتش الممزع نتيجه فرقعه كاوتش عربيات النقل لان فيه سلك ممكن يخرم الكاوتش عندك

7 _ تجنب السفر ليلا لان 99.9 بس من سائقى النقل والمكروباص مش كلهم يعنى علشان مانظلمش بيكونوا عاملين فرح ب اربعين لمبه بجميع الوان الطيف فى ضهر العربيه ما شاء الله عليهم وده بيصعب الرؤيه عليك وتحديد المسافه اللى بينك وبينو . حاجه كمان لو حضرتك راجع من المنيا خلى بالك من نهاية الطريق عند 15 مايو لان النهايه مش باينه وناس كتير بتتخدع فيها وتكمل وتتفاجئ بالمطبات والمنحنى وده سبب حادث لحد من زمايلنا هنا

8 _ اخيرا لو حضرتك محتاج تعمل استراحه ياريت يكون بجوار البوابات اللى هيا حلوان _الكريمات _ بنى سويف _ المنيا وممكن قبل المنيا ب 60 ك فى الشيخ فضل حتى لا تكون عرضه للتثبيت من اى حد وتجنب الوقوف لاى سبب غير طارئ ونسأل الله السلامه وأسف للاطاله وكل سنه وانتم طيبين





تم إعادة تنسيق الموضوع بمعرفتى
م ع 7

المشاركة الأصلية كتبت بواسطة mazagangee

كلامك كله صحيح…
انا حضرت حادثة في 2011 في الشتا و اتبهدلت فيها اكتر من 30 عربية و الطريق اتقفل تلات ايام لحد ما شالوا منه العربيات بسبب الشبورة و العربيات النقل…
و مرة تانية حصل هبوط في الاسفلت قبل بوابة حلوان و اتبهدلت فيها 15 عربية…
الحوادث علي الطريق ده كتيرة جدا و ضحاياها كتير…

ربنا يسترها مع الجميع ..

فعلا انا كنت راجع فى اليوم ده وقابلت اكتر من اربعين حادثه بسبب الشبوره واخت اكتر من 8 ساعات لحد ما وصلت وكان فى حادث بين جبلين بعد بنى سويف وقبل الكريمات واحنا واقفين كنا اكتر من 100 واحد جت عربيه نقل بمقطوره كانت هاتشلنا كلنا لولا ستر ربنا والله