الموضوع: تقرير عن الرينو نيو لوجان / لوجان 2 بعد استخدام 15,000 ك/م

بسم الله الرحمن الرحيم
السلام عليكم و رخمة الله و بركاته

كل سنة و انتم طيبين
رمضان كريم

العربية رينو لوجان 2 او نيو لوجان موديل 2015 اللي نزلت في اواخر 2014 مانيوال ماشية 15 الف ك

زي ما وعدتكم من ساعة تقرير استلام العربية اني هنزلكم تقرير بعد كل 5-10 الاف ك عن العربية و انطباعي عنها باللاضافة لتقارير عن الصيانات

المرة ديه هنزل انطباعي عن العربية و المشاكل اللي وجهتني و حلها بعد 10000 ك

و زي ما دايما بقول ان مفيش حاجة كاملة و الكمال لله وحده و هو شئ لا نختلف عليه ان كل عربية ليها مميزات و عيوب و هنا هتكلم عن العربية بشكل محايد ما لها و ما عليها


العربية شكلا افضل من القديم و ده من ضمن اللي عجبني فيها
العربية يتوافر فيها اوبشنز مش موجودة في فئات اعلي و اغلي منها
طبعا مع وسائل امان متعددة

العربية موتور 1600 سي سي 8 صمام تسارعها عادي مش قوي للدرجة اللي البعض بيصفها بها و اللي يقولك انا بعلم بيها ع بي ام و الهجس ده لكن عربية مناسبة للمدينة مش للجري
استهلاك البنزين بالنسبة اي عربية امتلكها او امتلكتها يعتبر عالي اقل معدل 8 لتر لكل 100 ك حسب حساب الكومبيوتر بدون تشغيل التكييف و مع التكييف في الحر البنزين بيختفي معايا و اغلب الوقت بسيبها بسبب استهلاك البنزين

العفشة ناشفة لكن مبتدبدبش مريحة في الطريق السريع لكن في ارض غير مستوية او مكسرة بتعب من النشوفية و انا شايف ده ميزة و عيب عيب انه متعب شوية و ميزة ان ده بيدل ان عمرها الافتراضي هيكون اطول ان شاء الله

الفرامل ما شاء الله كويسة و لحقتني اكتر من مرة و موضوع التيل اللي الناس اشتكوا منه انا معايا ما شاء الله وصلت بيه 15 الف بالرغم ان ناس كتيير غيروه ع 10000 ك

العربية عالية عن الارض و هو ميزةو عيب ميزة في الشوارع و المطبات لكن عيب مع السرعات و المناورات و بالتالي الثبات مش مرضي اوي بالنسبة لي ع الطريق السريع بالرغم انك ع الطوالي هتوصل بيها لـ 160 زي الفل لكن جرب تعمل مناورة هتشوف النتيجة من 140 كمان طبعا مع نوعية الكاوتش اللي بتنزل كلده بيأثر و انا متأكد بعد تغيير الكاوتش و بعض التعديلات الموضوع هيبقي افضل
لأن نسبة كبيرة مفهوم الثبات عندهم انك تجري بالعربية في طريق طوالي ع سرعة عالية و ده مفهوم خاطئ طبعا

التكييف عادي بالنهار مش هقول ممتاز لكن متوسط مع العلم اني بتبع الاجراءات الصحيحة لتشغيل التكييف و قولت للتوكيل في اخر صيانة حاسس ان التكييف ضعيف و مبيسقعش بسرعة قالولي لا التكييف مفيهوش حاجة و بعد اخر صيانة ابتدي يعمل صوت تزييق لما اشغله او اقفله مكنش موجود قبل الصيانة

بعض الناس هيسألوا ع صوت الموتور العالي ع فكرة ده الطبيعي من مواتير رينو الصوت العالي و المواتير الفرنساوي معمرة لأن كان معانا ميجان فالموضوع عادي بالنسبة لي لكن العزل اتحسن عن القديم و مش حاسس بالصوت اوي زي القديم

البعض الاخر هيقولي السخونية اللي بتطلع من تحت ديه حلها عزل حراري بيتعمل و انت ممكن تعمله بنفسك لو فاهم و هو كام متر لباد و شكرا لأني اعتقد بسبب فتحات الريسيكل في العربية

و فيه ناس طب قطع الغيار و اصل الفرنساوي و الاوروبي و المفاهيم الخاطئة عندنا العربية قطع غيارها متوافرة في التوكيل او برة التوكيل نظرا لانتشارها انا عندي في الباركينج بس 1 ستيب واي و 1 سانديرو و 3 لوجان

طبعا من اول ما استلمت العربية ظهرت معايا اكتر من مشكلة هسردها بالتفصيل

بدايتها كانت مساعد امامي بايظ و اتغير في الضمان في اول صيانة بس نادر اني الاقي حد اشتكي من المشكلة ديه

اما المشاكل التاني و اللي لقيت مالكي العربية موجودة عندهم زيي و ناس اعرفهم شخصيا سواء اصدقاء او جيران او زملاء

1 - قطمة الدريكسيون
و اللي اعراضها صوت طقة و رجرجة مع لف الدريكسيون هم عارفينه و بيعرفوا يشخصوه في التوكيل
و الحل انها بتتغير في الضمان و سعادتك بتاخد ايصال يضمن حقك و لحد دلوقتي لسه مجتش
و ديه لما لقيت الناس بتشتكي لم انتقدهم لكن قولت اتأكد الأول و بالفعل المهندس شافها قالي في الاول القطمة كويسة العربية دخلت الورشة قالوا العربية فيه امشكلة في القطمة

2- تنفيث الشكمان
من اول ما جبت العربية و صوت تنفيث من الشكمان و تبان اكتر لما تفتح الكبوت و مش عايزين يدوا كلمة واحدة في التوكيل و في الأول يقولي بعتنا للشركة في فرنسا و انها هتروح بعد 20 الف و اقوله عربية جابت 25 الف و لسه التنفيث فيها
يقولي لأ بعد 30 -35 الف لا يمكن نقولك 20 الف ابدا ( كأني بتتبل عليهم بس ما علينا )
تجيب لهم عربية عدت 40 الف و التنفيث زي مهو يقول أصلها ملهاش تأثير متقلقوش و تعايش معاها
فعلا لا تعليق

3- دراع النور و الكلاكس اللي بيعلق
فجأة الكلاكس ميشتغلش و يعلق او النور يعلق و يطفي لوحده و ده ممكن يعمل كارثة لو شارع ضلمة
و الحل انهم بيغيروه في الضمان و ده اللي شكلي هعمله ان شاء الله الصيانة الجاية و ده ظهر معايا من 3 ايام

4- اصوات غريبة بتطلع من العربية مرة من الشنطة و مرة من الحوض مرة من الموتور مرة من التابلوه و الباب اللي جنب الراكب الامامي و كأني راكب عربية قديمة و صوت من الكراسي و 3 صيانات ابلغ و مفيش حل و امر الشغل يثبت ( شكله اوبشن عشان متحسش بملل او زهق او وحدة في الطريق )

5- صوت تزييق من الفرامل الخلفية لما بدوس فرامل و هي راكنة و الرد لا عادي هي كده !!!
تزييق دواسة الدبرياج و الأول كان بيعمل طقة معايا لما اشيل رجلي من عليه و شجموه و راح لكن رجع تاني التزييق

7 - تأخير الدوارة احيانا خاصة بعد مشوار و اجي ادور تاني او الصبح ملهاش وقت محدد
و بيتم حله عن طريق تحديث السوفتوير
في البداية ابلغت المهندس اني لاحظت التأخير لما بحط بنزين من مكان مش كويس قالي البنزين ملوش دعوة اصلا و كان مصر و انه سوفتوير بيتعمل

8- التقفيل في نقط كتيير سئ بالنسبة ليا زي ضفيرة الكهربا في الحوض متسابة بدون اي غلاف يحميها او ضهر الفوانيس الخلفية اللي متساب او الفروقات في اللحام عند العتب تحت الباب الخلفي او الكاوتش ع الابواب مش كامل للاخر ( بس الواحد فوت انا شوفت تقفيل اسوء من كده )


اللي مزعلني اني ملاحظ ان العربية مقضيها تغييرات في الضمان انا تقريبا هغير العربية كلها في الضمان من قبل ما اتم 40 الف حتي

و ربنا يستر و مفيش حاجة تانية تظهر و تمشي العربية ع خير

حاجة تانية ضايقتني اسعار الصيانات و اختلافها من عميل لاخر و من فرع لاخر و من خدمة العملاء للفرع نفسه او طول فترة الانتظار عشان اعمل صيانة

( لكن انا عشان مبحبش اعمل اي حاجة برة التوكيل عشان بقول هم فاهمين العربية و شغالين فيها و هتبقي اضمن سواء قطع غيار او حل للمشاكل و بتحمل الزيادة في الاسعار عشان ابقي مطمن )

و اخيرا و ليس اخرا

البعض بيقول بعض الجمل المستفزة زي :

( أصلها عربية ع اد فلوسها ) و ديه لما تقول فيها مشكلة او العربية سواقته مش اد كده و مرة المهندس قالهالي اول صيانة و رديت عليه و عندي مثال لعربية صغيرة و سعرها قليل زي سوزوكي التو 2008 عربية عادية جدااااااااا مفيهاش اي حاجة تبهرك من الاخر حاجة تقضي بيها مشاويرك و بس و جايبها زيرو ما شاء الله عملت بيها 200 الف ك و اعلي حاجة غيرتها فيها كانت طقم الدبرياج ع 126 الف ك و ماستر فرامل عمومي ع 140 الف ك و الطنابير فضلت شغالة لحد 184 الف زي الفل و احقاقا للحق مكنتش بعمل صياناتها في التوكيل بسبب ما واجهته من اول صيانة لما دخلت كعميل نسيان كانوا شايليني من ع الارض شيل و لما دخلت بسوزوكي التعامل كأني من حثالة المجتمع غير ارتفاع الاسعار قررت اعمل الصيانات برة التوكيل بنفسي و ناس كتيير هنا كانوا عارفين القصة و اللي حصل معايا ) يبقي ايه علاقة فلوس العربية باي حاجة فيها و كمان دول يعتبروا 100 الف مش 10 الاف ج يعني اللي مدفوعين

و طبعا فيه ناس هتشوف ان العربية تتقارن بـ بي ام و تتفوق او يدخل يقولي مفيش اي من العيوب ديه زي ما حصل معايا و لكن اعذرني كده انت مركبتش عربية قبل كده او معندكش خبرة في العربيات اصلا
او ركبت حاجة اقل منها في الفئة سواء قديمة او جديدة فحاسس باختلاف و انبهار الاوبشنز
او صعبان عليك تعترف بده عشان دفعت كل اللي معاك
او انك زي مشجعي الفرق الرياضية متعصب لما تملكه بدون ان تكون محايد و نسيت ان طبيعي كل حاجة يكون ليها مميزات و عيوب

و اخيرا رأيي النهائي عن العربية هي في المجمل كويسة شكلا و اوبشنز و وسائل امان و الاداء كويس بالنسبة ليا انا اعتبره اداء متوسط

و لو حد ناوي ع العربية هي تعتبر احسن اختيار في فئتها الا لو بتفكر في فئة اعلي ومعاك فلوسها توكل ع الله
و الناس اللي ناويين ع الاوتو مشوفتش حد ظهر معاه حاجة من دول لحد دلوقتي بس برده تابعوا مالكيها

و بالتوفيق للجميع ان شاء الله