ديهاتسو جراند تيريوس حادثة ورد غير منطقي من الوكيل

**yasserlab** · 24-06-2015 02:52 AM

السلام عليكم ورحمة الله وبركاته
اولا صاحب السيارة صديق شخصي لي
ثانيا ظروف الحادث ..دخل في ميكروباص واقف وهو كان ماشي بالجراند تيريوس على سرعة 70
ثالثا: هو ما كانش لابس حزام الامان ولا ابنته ( جالسه في الكرسي بجوار السائق )
حصلت الحادثة
الايرباج فتح للسائق والراكب الامامي
اشتباه ما قبل الارتجاج كسر في ضلعين تمزق في اربطة الرقبة
البنت اتبهدلت من الايرباج
لان ما كانش حد فيهم لابس الحزام لانهم كانو جوة بلدهم الريفية
والسؤال دلوقتي
ازاي سيارة ياباني زي دي يفتح الايرباج فيها دون اكتمال الدايرة فيها اللي بتكمل بلبس حزام الامان
اتصل صديقي بالوكيل
قالوا هانرجع للقسم الفني ونرد على حضرتك
اتصلوا بعد شوية
وقالوا
هي عربيتنا كده الايرباج بيفتح من غير استخدام حزام الامان
روح اشتكي او روح حماية المستهلك
الشركة هاتعرف ترد كويس على اي حاجة
اللي حضرتك عايز تعمله اعمله يافندم

لا انكر خطأي في التصادم
بس متفاجئ برد غير مقنع وتوكيل ابعد حاجة عنه حياة الناس
ايرباج بدون حزام امان ( يعني ممكن يعمل انفجار بعضلة القلب )
انا مش هاسكت على حقي وهارفع الموضوع لاعلى مستوى في الدولة
حق بنتي اللي اتبهدلت مش هاسيبه
على فكرة العربية هاتوصل 3 سنوات في اكتوبر القادم وعاملة 68.000 كيلو
ولا صيانة برة التوكيل
وماحدش لمس العربية غيرهم
برجاء من الافاضل الرد على الموضوع وتنصحوني بايه

**عﻻء سالمان** · 24-06-2015 06:20 AM

ربنا يعوض عليك طمنا على بنتك

**hesham fawzy h** · 24-06-2015 07:39 AM

حمدا لله على سلامتهم

اشتكيهم فى حماية المستهلك

**Abo_Mazen** · 24-06-2015 10:34 AM

هي المشكلة إن ممكن يكون في المواصفه بتاعة العربية إن الإيرباج بتفتح بدون ربط حزام الأمان ..لو الشركة أثبتت إن دي مواصفة العربية ..يبقى كده المالك مش هيقدر يرجع على الشركة بأي تعويض ..وكده ممكن يختصم شركة دايهاتسو اليابانية ذات نفسها لإن دي كده مواصفة خطأ في السيارة

**haany_ghazy** · 24-06-2015 03:16 PM

الف سلامة عليها و ماتسيبشى حقك

**smsm_cato** · 24-06-2015 03:28 PM

اولا حمدالله على السلامة وده اهم شئ اهم من العربية نفسها
ثانيا مع احترامى الكامل ليك سيبت ان انت اللى غلطان وداخل فى ميكروباص واقف وان الايرباج فتح ويمكن يكون حماك انت وبنتك من عواقب كانت ممكن تكون اكثر من اللى حصلك ورايح تحاسب الشركة ان ازاى الايرباج تفتح من غير ماتكون رابط حزام الامان
ثالثا انا مقدرش افتى فى موضوع اختلاف المواصفة من عربية لعربية فى حتة ان الايرباج ميفتحش الا وانت رابط حزام الامان بس هنضرب مع بعض مثل بسيط فى ظروف افتراضية لو حضرتك سايق العربية وانت من النوع اللى مبيحبش يربط الحزام مثلا وماشى على سرعة عاليه وعملت حادثة لا قدر الله مفروض هيبقى منطقى ومريح ليك ان الايرباج متفتحتش علشان انت مش رابط الحزام وتاخد الخبطة كلها فى التابلوة والزجاج الامامى
اخيرا انا بقول رأيى بعيدا عن ان فى مسؤلية قانونية فعلا على الشركة ولا لأ وحمدالله على السلامة مرة ثانية ( قل لن يصيبنا الا ما كتب الله لنا )

**Ahmedo0o** · 24-06-2015 03:31 PM

دا توكيل مصاص دماء
شوف محامى كوبس ويكون معرفه يكون معاااك

والف الف سلامه على بنتك
ربنا يقومها معافاه
وإبقى طمنا عليها

**dr_ashrof** · 24-06-2015 03:38 PM

مبدايا الف سلامة عليكو بس عاوز اوضح لحضرتك حاجة ... انا اتقلبت من سنتين بعربية الانترا 2008 وانا ماشي 160 ومكنتش رابط الحزام بس الحمد لله ان الاير باج فتح وقعدني فمكاني وطلعت سليم زي مانا الحمد لله لولاه كان زماني اترزعت في القزاز وخرجت بره العربية واتكسرت كلي . اللي فهمته بقى ان الايرباج ليه حساسين بيفتح لو واحد منهم ادى اشاره الاول في الحزام نفسه (لو الاحزمة ادت اشارة انها اتشدت جامد بسبب اي حادثة مش شرط تكون امامية) والحساس الثاني المعروف اللي قدام في صدر العربية (بيفتح من حادثة امامية فقط)
ملخص الكلام انك لو عملت حادثة بس وش العربية متخبطش خالص الايرباج مش هيفتح الا لو رابط الحزام
اما لو مخبوطة من قدام الايرباج هيفتح هيفتح سواء رابط الحزام او لا ودي حاجة انقذتني شخصيا

**joe_techno** · 24-06-2015 04:02 PM

اولا : حمد الله علي سلامته
ثانيا : هيبقي ايه دليله انه مكانش رابط الحزام و مع ذلك الايرباج فتح
ثالثا : اكيد الشركة هيبقي ردها ان السائق اللي غلطان لانه مكانش رابط الحزام و لو مكانش الايرباج فتح كانت هتبقي الاصابات اكتر بكتير

انا شايف اني فرصته ضعيفة اوي في انه ياخد حقه

**romar** · 24-06-2015 04:41 PM

الحمد لله.. قدر الله وما شاء فعل..
حضرتك راجع كتالوج عربيتك.. حتلاقي تحذيرات قوية جدا من إنك متربطش حزام اﻷمان ﻷن ده ممكن يؤدي ﻹصابات قوية من اﻹيرباج.. للأسف محدش بيقرأ الكتالوج.. بس التحذير حتلاقيه موجود وواضح جدا.