الموضوع: ليه تشتري عربية جديدة لما ممكن تضبط 2 قدام؟

السلام عليكم،
بصفتي طول عمري مش باركب غير عربيات جديدة احب انقل لكم تجربتي
انا من النوع اللي دايما لما باركب عربية محبش يكون فيها اي ملاحظات، مع الوقت تكونت لدي خبرة للتعامل مع التوكيل و كمان برة التوكيل، اخر عربية جديدة اشترتها كانت السيارة الرائعة جدا الماهيندرا سكوربيو بنزين 4 في 2
العربية دي عيبها الوحيد ان التوكيل معرفش يسوقها كويس لاصراره الغريب على انه ينزل لاحقا موديلات ديزل فقط مع ان جنوب افريقيا بتعمل النسخة البنزين ال2000 سي سي (موتور رينو لاجونا) المهم من حبي للسيارة دي (2000 سي سي مع عزم شديد جدا مع عربية عالية جدا وواسعة جدا جدا من جوة و في نفس الوقت ابعادها ملمومة من برة و سهلة الركن) لما جت العربية دي عدى عليها 7 سنين و ابتدت تحتاج بعض الصيانات الرئيسية قررت احتفظ بيها (خصوصا بعد ما انقذتني مرة كان عربية دخلت في اوتوبيس ورايا في في الاوتوبيس اللي قدامي و احنا كلنا كنا واقفين في كمين و العربية اللي من ورا جت بسرعتها، نزلت لقيت الاوتوبيسين اللي قدام وورا متدمرين و الحمد لله العربية كان فيها خدش في الاكصدام 1 سنتيمتر لا غير) وخصوصا لما عرفت ان العربية دي بتتباع ب 60 الف جنيه بس مع انها عربية لقطة جدا فرحت مغير فيها حاجات كتير لقطع غيار متسوبيشي زي المساعدين و حاجات ميكانيكية كتير في الدركسيون و في بلي الفتيس و ناوي برضه اغير فلتر البنزين لمتسوبيشي و فتحت اجزاء من التنك مقفولة و غيرت الخراطيم الهندي التعبانة بخراطيم صناعة مصري عمولة ممتازة و وزودت المدى بتاع اعادة التزود بالوقود بمقدار فوق ال100 كم ، و رحت مركبلها كمبيوتر عربية اندرويد بجي بي اس عربي و انجليزي و كاميرا خلفية تعمل مع النقلة الخلفية. ورحت جايب حنبها alfa romeo 156 موديل 2004 (الfacelift) بحالة شاذة نضيفة جدا و برضه عربية متينة و ثابتة و رياضية جدا و بتكمل تجربة العربية الجيب بالنسبة لي و بابدل عليهم الاتنين، الالفا روميو عايزة واحد يفهم كويس ان دي مواتير توين سبارك مصممة للاداء الرياضي فطبيعي انها بتستهلك زيت كتير فلازم انك تسخن العربية كويس جدا الصبح و تكشف بنفسك على الزيت باستمرار و تزوده كل ما ينقص بنفسك و تغيره كل 3500 مثلا بالفلتر تعيش معاك العمر كله ده غير ان قطع غيارها رخيصة برة التوكيل و لها مستوردين و ميكانيكية محترمين جدا.
المهم العربيتين على بعض سعرهم اقل من سعر تويوتا كورولا جديدة فاكيد انا الكسبان لان الكورولا عربية خفيفة جدا في الملفات و لا تقارن نهائيا بالالفاروميو 156 فلماذا تضيع فلوسك على ارباح الوكيل في عربية جديدة و ليه تضع كل فلوسك في عربية واحدة و لما تتصلح تقعد تدور على عربية تأجرها بالشيء الفلاني ما تجيب 2 مستعملين من العربيات الحلوة اللي سعر اعادة الشراء بتاعها منخفض (بس ما تسترخصش و اشتري انضف عربية في الموديل اللي انت اخترته حتى لو فرق السعر كبير )(لان الالفا روميو كان سمعتها في التسعينات انها عربية بتبوظ بسرعة و مع ان الا156 مفيهاش خالص المشكلة دي لكن سمعة الالفا القديمة فضلت معاها و دي كانت فرصة كويسة لي خلي الناس تضيف فلوسها في عربيات جديدة (سعرها بينزل جامد اول ماتركبها) تعيش مع الكوري اللي مفيهوش غير 2 ايرباج و مفيهوش ESP و الا ASR وعربية وحشة جدا في الملفات و الفرملة على السرعات العالية و لا يقارن بالتقنية الايطالية (اللي انا شايفها احسن من الالماني كمان في الاداء الرياضي) و بدل ماتجيب لك عربية كوري غالية جدا او حتى ياباني تعبانة زي اللاتسر شارك هاتلك دبابة هندي و ميني فيراري ايطالية بنفس السعر او اخترلك اي عربيتين مستعملين يناسبوك وكمان تستمتع بالتبديل عليهم علشان ماتزهقش من واحدة فيهم و الميكانيكية عندنا في مصر ممتازين جدا جدا المهم تعرف تميز الممتاز من بينهم. و اهم نصيحة ليك خليك في الجير المانيوال اوفر في البنزين و اداء رياضي جدا للناس اللي غاوية سواقة فعلا. وبلاش البي ام دبليو المستعمل لان البي ام دبليو عربية بتبوظ كتير قوي.
ملحوظة اخيرة انت كدة كدة الكسبان لو العربية قعدت معاك 7 سنين بعد كدة كانك سايقها ببلاش و اي تصليح رئيسي فيها من اللي ابو كل 7 سنين (طالما منتظم في الصيانة) حيبقى ارخص من 20 الف جنيه قسط سنوي لعربية جديدة فخليها تقعد معاك 10 15 سنة كمان ايه المشكلة طالما بحالتها؟ انت عندك القوات الجوية عندا بتطير مقاتلات من السبعينات بسرعة 2 ماك بسبب الصيانة الجاجة و المنتظمة.