الموضوع: صدمة عند شراء byd f3 2015

السلام عليكم
أنا آسف يا جماعة لو ممكن كلامي يضايق حد من الناس اللي بتحب العربية دي

من فترة وأنا متابع هنا في المنتدى قسم البي واي دي
وكلام الناس هنا شجعني على العربية دي
أنا ما كنتش هشتريها ليا إنما لزوجتي رغم إني كنت بدور على لانسر بومة أو يارس بحالة جيدة إنما قولت بصرف النظر عن كلمة عربية صيني وكلام من ده قولت في الآخر الجديد جديد بردو هتبقى عربية زيرو وبعدين قطع غيارها تعتبر ببلاش بالنسبة لعربيات تانية

إتخذت الخطوة وفعلا حجزت السيارةf3 ب1000 جنيه من معرض(.......) والحقيقة رجل المبيعات هناك كان راجل محترم فوق الوصف
روحت بعد بيومين علشان أستلمها لون سيلفر لكني تفاجئت بحاجة غريبة وأنا بستلم العربية
أينعم أنا عارف إن التقفيل المصري الفينش بتاعه وحش وده شوفته في عربيات تانية زي النيسان مثلا وغيرها إنما اللي شوفته تجاوز كل توقعاتي
1- درج الطابلوه ملووح من ناحية الباب يعني فارق من ناحية اليمين فرق كبير وهو مقفول
2- لما فتحت الشنطة وبصيت من عند مفصلاتها لقيت الصاج اللي تحت الزجاج الخلفي صاج معروج ومدهون على كده
3-لقيت الجلد بتاع مثلث الباب اللي ورا متقفل بطريقة وحشة كإن واحد قصه بمقص ولزقه في الجلدة التانية بأمير
4-الفبرة اللي تحت المساحات ليها شفة جلد كانت متنية لجوه من الطرف الشمال بطريقة وحشة
5-البوية مسيلة عند حراف الرفارف

وقتها بصيت للعربية كإني أول مرة أشوف بي واي دي في حياتي وقولت لأ العربية دي مش ممكن تكون زيرو أبدا مفيش زيرو كده خالص خالص

المهم قفلنا من العربية تماما وقولنا خلاص والحقيقة أنا عارف إن المعرض له الحق إنه يخصم الألف المدفوعة لإني أنا اللي تراجعت وهو جاب العربية خلاص فقولت لرجل المبيعات هناك شوف كده حضرتك لو هتخصم حاجة من 1000 أو هتخصمها كلها ده حقك لكن بصراحة أول ما كلمته وبدون حتى مجادلة المصريين المعهودة قالي تعالى بكرة ومعاك الوصل والخزنة فاتحة وخد فلوسك وفعلا رجعلي ال 1000 كاملة بدون خصم جنيه واحد( معرض محترم جدا ودي شهادةأمام الله)

فبصرف النظر عن العربية أو تقفيلها إنما الصراحة إحترمت الراجل ده جدا وإحترمت المعرض ده كمان وكان نفسي فعلا أشتري منهم بس للأسف هو قالي أي عربية هجيبهالك هتبقى بردو فيها حجات زي دي وأنا عارف إنه لاحظ إننا ناس موسوسين وبردو مترددين في موضوع الصيني زي ناس كتير

[overline]
فسؤال للإخوة اللي لسة شاريين f3 2015 هو فعلا عربياتكم إستلمتوها كانت فيها حجات زي دي؟؟ وياترى ده فعلا في كل عربيات البي واي دي؟! ولا أنا حظي كان كده؟؟
[/overline]