الموضوع: شاب قضى 10 سنين فى الخليج حوش فلوس تخليه ينفع يفتح شركة

المشاريع الناجحه حتنحصر فى
الاكل والشرب لان لازم الناس تاكل لو حتبيع هدومها
الدواء لان لازم المريض يتعالج لو حيبيع هدومه
الهجص قهاوى كافتريات سيابر الخ لان المصرى من اساسياته الجلوس على القهاوى
دى المشاريع اللى مضمونه المكسب
كل حاجه بتيجى جاهزه من الصين وده طبعا مدمر اى فكره لمشروع صناعى لاكن تفكر فى مشروع جدى حيكون عندك احتمالات الربح والخساره وكل حاجه بتميل للخساره

من اهم المشاريع المربحة مشاريع التعليم الخاص
ولكنها تحتاج الى راس مال كبير نسبيا
سمعت شخصيا من احد كبار رجال الاعمال في احد الاجتماعات التعبير التالي حرفيا:
التعليم الخاص حنفية فلوس
بعدها بوقت قصير قام منفردا بانشاء معهد خاص في احد المدن الجديدة ولم يقبل اي شراكة معه في المشروع

هو الموضوع ميخصنيش انا كاتبه للافاده عن الى بيفكر يعمل مشاريع فى مصر وبتفشل منه فذكرت كم نقطه على اد ماقدرت توضح للناس سبب الفشل

مبدأيا الوضع اللى حضرتك بتحكى عليه ده بيتكرر بالاضافه للى حضرتك وباقى الاعضاء ذكروه بيحصل كمان علشان الحاجات دى :
1-اللى بيعمل مشروع بيفكر فى الموضوع بشكل مادى مش عملى ازاى بمعنى انه بيفكر فى الموضوع بدماغ ايه اللى بيكسب وحجيب الشغل منين وهكذا بالرغم ان التفكير العملى انه يفكر ازاى يقلل المخاطره ويقلل التكاليف المتغيره وكمان الثابته ويحسب معدل تحمله للخساره بمعنى هو على استعداد يخسر اد ايه وميتضررش بشكل كامل بمعنى لو هو معاه مليون جنيه هم اللى حيلته يبقى المفروض انه يدخل السوق فقط بما يعادل 250-400 الف maximum علشان لو الموضوع فشل مع التكاليف اللى اتكلمنا عليها حيقدر يسيل التكاليف الثابته من معدات ومبانى وغيره ويعوض منهم على الاقل نصهم وبالتالى يقدر يعمل حاجه تانيه

2-اللى بيفكر يعمل مشروع كل دراساته قبل المشروع بتكون عن المكاسب يعنى حبدأ اكسب امتى وحكسب كام بالرغم ان المفروض بعد الدراسه العامه يفكر المفترض يصرف على المشروع قد ايه علشان يكسب ويخصم المصروفات دى ويجنبها من راس المال الاجمالى علشان ميضطرش يحط من جيبه او ميلاقيش يصرف على المشروع فيضطر يقفله بالرغم ان ممكن يكون مشروعه ناجح جدا

3-التفكير التقليدى وفكره ده عمل كده ونجح يبقى انا كمان لو عملت كده حنجح نفس النجاح او بالعكس ده عمل كده فشل يبقى بلاش من الموضوع ده بالرغم ان ممكن نجاح مشروع ما يكون لمقومات خفيه محدش يعرفها وبرضه فشل اى مشروع مش معناه ان المشروع بالطريقه دى غلط ممكن فشل التنفيذ يكون هو السبب مش عيب فى المشروع نفسه
وكمان ان محدش بيفكر بره الصندوق بمعنى تفتكر كل المواقع العالميه والتطبيقات الموجوده حاليا لو واحد مصري قاعد على قهوه نفذها مش كان حقق حاجه ولكن الخوف من الفشل معطل ناس كتير بالرغم ان محدش نجح غير بعد لما فشل
بلاش لسه كنت بتكلم مع احد دكاتره جامعه فى كليه الزراعه وجه فى دماغى المزارع الخضراوات والفاكهه النموذجيه اللى بتكون بدون تربه فوجئت ان الموضوع بسيط جدا وممكن يتعمل فوق سطح بيت او ارض فاضيه ومفيهوش اى قلق غير مراعاه ودراسه وشويه استشارات من احد الخبرات وراس مال صغير شويه مواسير وموتور وبذور وحاجات تانيه وكان السؤال محدش خريج كليه زراعه فكر يعمل حاجه كده وحتبقى فى تخصصه ومش حيزرع الصحراء ولا حيفحت ولا غيره مكان نظيف ومشروع محترم جه من دردشه وكات الاجابه منه اكيد فى كتير فكر بس الخوف وقفهم بالرغم ان المزارع دى كل دول العالم بتتجه ليها لندره الارض الزراعيه
قيس على ذلك فى كل المجالات والمشروعات كام فكره زى دى محدش بيفكر فيها بعيدا بقى عن كلام البلد وغيره واقولك كمان معلومه ان المزارع دى انتاجها بيكون مميز وممكن يتصدر اذا ملقتش سوق فى مصر "وده مستحيل مصر بيتباع فيها الهوا "

4-المبالغه فى تقدير الارباح بمعنى ان اى حد عايز يعمل مشروع دلوقتى لازم يكون عنده مصدر دخل تانى غير المشروع ده علشان يتحمل وقت انه يوقف المشروع على رجليه انما انك تفتح مشروع ولو مجابلكش دخل كويس يبقى المشروع مش جايب همه ده مبدأ يعدم اى مشروع من اوله لان اللى بيفتح مشروع علشان يصرف على نفسه لازم يعرف ان اى مشروع جيد ومدروس صح اول سنه بيغطى تكاليفه وفى خلال 3 سنين يكون جاب تكاليفه المتغيره وفى خلال الفتره دى المفترض ان الدخل اللى جى منه يا دوب يساعد فى المعيشه ولذلك نصيحه لكل واحد عايز يعمل مشروع اتعب شويه فى شغل ثابت واعمل مشروعك بمساعده عامل عندك امين "غالبا قريب او صاحب او احد معارفهم" يتابع مشروعك فى وقت عملك فى الوظيفه الثابته لحد متلاقى مشروعك بدأ يقف ومحتاجلك full time ساعتها سيب شغلك او خد اجازه بدون مرتب وتابع مشروعك الخاص

5-لكل حد عايز يعمل مشروع فى مصر اعرف ان مصر بلد استهلاكى ودى ميزه مش موجوده "بالشكل اللى فى مصر" فى كتير من الدول ولكن فيها صعوبات كتير برده شطارتك فى التسويق وانك تقلل تكاليفك علشان تعرف تنافس وتبيع منتجك واعرف ان الصعوبات فى مصر مش حتلاقيها بره بس متفرحش حتلاقى صعوبات وتحديات تانيه يعنى دماغك لو شغاله هنا حتكسب زى لو اشتغلت بره ولو دماغك شكايه اعرف انك فى مصر اما موظف او عاطل وبره عامل فى محطه او بائع جرايد وكل الميزه اللى بره بالنسبالك هى الهروب من كلام الناس اللى هو سبب من اسباب ضياع البلد مش ضياعك انت بس

6-لكل حد عايز يعمل مشروع فى مصر ،مصر فيها مشكله جامده وهى البيروقراطيه والرشوه خليك مفتح ومتقفش فى وش الامواج كيف نفسك على امور بلدك ووضعها واستفيد من فرص النجاح فيها ولو مفيش اصنع فرصه لنفسك وحاول تتجنب صعوباتها ودايما اعرف من اين تؤكل الكتف علشان تنجح او على الاقل لو فشلت متتكسرش جامد

من الاخر للى بيفكر يعمل مشروع فى مصر او بره مصر النجاح فى مصر مش سهل ولا بره مصر سهل ولو مش مصدق اقرا كل رجال الاعمال عملوا ايه علشان يوصلوا للى هم فيه
والفشل فى مصر اسبابه كتير ولو دورت على سبب لفشلك حتلاقى بدل السبب 100 وبرضه الفشل بره اسبابه كتير ومفيش ضمان للنجاح غير توفيق ربنا ومجهودك ودماغك

ونصيحه لكل حد فى مصر اعرف قدراتك قبل متحدد مجال شغلك لان مش كل واحد رجل اعمل او تاجر او مدير ممكن تكون انت موظف شاطر او مسوق شاطر او بياع شاطر او سياسي شاطر او مدرس شاطر وهكذا وبالتالى ممكن فى اى مهنه تعيش العيشه اللى انت بتحلم بيها فبلاش فكره ان اللى مبسوط هو بس التاجر او رجل الاعمال فكر انت ممكن تبقى شاطر فى ايه واعمله بمعنى تانى افهم قدراتك ودماغك قبل متدخل فى اى مجال .

اسف على الاطاله
تحياتى .