الموضوع خطير بالنسبالى عن نيسان صنى 2015 ارجوا المساعدة

**يوسف ياسين** · 11-07-2015 10:29 AM

بسم الله الرحمن الرحيم
يا جماعه ارجوكم ساعدونى الموضوع بالنسبالى خطير
اشتريت نيسان صنى 2015 . فى 7 /2014 يعنى بقالى سنه بالظبط روحت اعمل صيانة 10000 ك لقيت المهندس بيقول تغيير طنبوره .
انا سألت عالعربيه قبل الشرا وعرفت عيب الطنابير بس قالوا العيب ده فى موديلات قديمه لكن الجديدة لا ودلوقتى ايه العمل.
المهنس قال بعد 10 ايام يعنى بعد العيد والله اعلم.
ايه الحل استنى تتغير الطنبوره وابيع العربيه اصل انا كده ثقتى فى نيسان اتهزت ورأى المتواضع ان بكده الطنبوره الجديدة مع الاستعمال هتبوظ. ده صح ولا غلط مش عارف.
واللى يفرس المهندس بيقول تقدر تمشى بيها 5000 كمان امان عادى.
الموضوع قبل كده كان مع جهاز حماية المستهلك بس ايه اللى حصل مش عارف
ارجوكم ساعدونى الموضوع خطير بالنسبالى ارجوا المساعده .
منهم لله اللى بيستهينوا بأرواح الناس.

**eng_amg** · 11-07-2015 11:17 AM

ناس كتير أتكلموا في الموضوع دا وكلهم بيشتكوا من تغيير طنابير النيسان والتوكيل بيحملها عليهم رغم أن كل الصيانات في التوكيل والتيل في ميعاده.

وناس إشتكت من صوت صفارة في الفرامل مع إن التيل جديد.

وأنا شخصيا بقول إن فراملها سيئة جدا وكنت عرضت مشاركة قبل كدا فيها صورة من الحادث إلي حصل في الصني لأنها لن تقف مع الفرامل وإتزحلقت وزحفت وغيرت إتجاهها علي سرعة تحت 120.

بعد كل المشاهدات دي... يبقى أكيد العربية فيها مشكلة فرامل فعلا.

**يوسف ياسين** · 11-07-2015 12:42 PM

وايه الحل يا استاذى من فضلك
يعنى اصلحها وابيعها

**unl0veable** · 11-07-2015 06:31 PM

المشاركة الأصلية كتبت بواسطة eng_amg

ناس كتير أتكلموا في الموضوع دا وكلهم بيشتكوا من تغيير طنابير النيسان والتوكيل بيحملها عليهم رغم أن كل الصيانات في التوكيل والتيل في ميعاده.

وناس إشتكت من صوت صفارة في الفرامل مع إن التيل جديد.

وأنا شخصيا بقول إن فراملها سيئة جدا وكنت عرضت مشاركة قبل كدا فيها صورة من الحادث إلي حصل في الصني لأنها لن تقف مع الفرامل وإتزحلقت وزحفت وغيرت إتجاهها علي سرعة تحت 120.

بعد كل المشاهدات دي... يبقى أكيد العربية فيها مشكلة فرامل فعلا.

**amrseiffares** · 12-07-2015 01:09 PM

هما مش قالو انهم حلو المشكله.

**يوسف ياسين** · 12-07-2015 07:52 PM

للأسف لا مفيش حاجه حلوها
ربنا المنتقم
علشان الواحد مش سارق الفلوس

**RamiAbbas** · 12-07-2015 10:28 PM

انا معايا العربية من 2013 كل الموديلات فيها نفس العيب لأنه عيب تصميم في الفرامل نفسها و كمان سوء خامه الطنابير .. الحل اللي وصلت له بعد تغيير طنابير مرتين و 8 تيل فرامل في 60 الف كيلو هو الأتي :

حضرتك هتشتري تيل كوري High Q و في نوع تركي مش فاكر اسمه دول احسن اتنين جبتهم الحقيقة سعرهم كان 150 جنيه .. التيل منهم بيقعد معاك من 12 الف لحد 15 الف كيلو و انت و استخدامك ..
بالنسبه للطنابير كل مرة تغير فيها التيل تعمل خرط للطنابير عند الخراط حاجة بسيطه هتكلفك 40 جنيه للطنابير الأتنين هينضف وش الطنابير و يعدلها و يخليهم كأنهم جداد ممكن تعمل الحكاية دي اربع او خمس مرات لحد ما الطنابير فعلا تبقى محتاجه تغيير .. بس ده هيخلي معاك الفرامل كويسة و الصوت هيروح .. و التكاليف قليله مش غاليه

نصيحه اخويه التوكيل صيانات و بس أياك تغير عندهم تيل فرامل او طنابير لأن و الله العظيم و يمين اتحاسب عليه اردئ نوع خامه تيل هو الأصلي ... انا جبت صيني و كوري و تركي و انضفهم الكوري و التركي نفس المستوى تقريبا الصيني تعبان بس انضف من الأصلي و الله انضف من الأصلي

حاجة كمان عشان لما تمشي بالعربية شوية صوت الفرامل الجامد مش بيكون من الطنابير الاماميه و التيل الأمامي بيكون من التيل الخلفي و الطنابير الخلفي لأن خامتهم من اردئ ما يمكن و هما اللي بيعملوا الصوت الجامد دايما مش الأمامي و جرب شد فرامل اليد و انت ماشي على 40 مثلا هتسمع مزيكا طالعه من العربيه و ده بسبب انك بتقفل الفرامل اللي ورا بس

**RamiAbbas** · 12-07-2015 10:30 PM

حاجة كمان .. التوكيل كل ما الطنابير وشها يبوظ هيقولك غير و ده بيبقي بسبب ردائه خامه التيل و الطنابير في نفس الوقت الخامات زي الزفت و هما مستفيدين تيل تمنه 150 جنيه بيبتاع ب 650 و الطنابير بره التوكيل ب 700 جنيه جوا التوكيل فوق الألفين

**volociximab** · 12-07-2015 11:25 PM

حاولوا تراسلوا الشركة الام
نيسان استدعت سيارات فى نهاية 2014
راسلوا الشركة الام يمكن تعمل استدعا عندكم او تنزل حلول فى التوكيل

**hi_nmr** · 13-07-2015 02:59 AM

لو نبطل نشتري الوحش اكيد الناس هتلم نفسها ومتعملش حاجه وحشه
بس العيب فينا بنشتري الوحش واحنا عارفين انه وحش يبقي هيصلح نفسه ويبقي حلو ليه مهو وحش وبيبيع وزي الفل وحياته تمام