الموضوع: تجربتى فى الشراء من معرض القرش فرع المريلاند

السلام عليكم.

اولا انا مشترتش زيرو قبل كده و لا ليا فيه بس قررت انى احكيلكم على تجربتي مع معرض القرش فرع المريلاند علاشان الناس تاخد فكره.

انا مليش فى شراء العربيات الزيرو بس كنت بدور على عربيه ابيزا 2011 / 2012 لاختى نضيفه و لاقيت اللى موجود يا اما مش احسن حاجه او غالى زياده مقارنه بسعرها زيرو. المهم اعتزمنا شراء الزيرو.

انا من سكان مصر الجديده بجانب المريلاند. اختى قالتلى ما تيجى نتفرج على الابيزا 2015 عند القرش و بما انه 5 دقايق مشى قلت يلا اهو الواحد يتحرك, الكلام ده كان يوم الخميس 25/6/2015

المهم نزلنا اتفرجنا و قابلنا الموظف اسمه مدحت بابتسامه لطيفه و قلت له عايز اتفرج على الابيزا الجديده, قالى موجوده يا فندم و رحنا اتفرجنا عليها كانت لطيفه و مدحت فاتح الموبايل على الApplication بتاعه المعرض و عمال يقولنا على المواصفات بتاعتها قلنا ماشى التكنولوجيا حلوه برده.

المهم العربيه اللى واقفه عنده لونها بترولى فا قولتله عايز الفئه الولى بجنط, قالى هيا ديه و فيه كمان الفيرانى. اختى قالت ديه لونها احلى. قلتله على البركه فا قفلها و دخلنا المكتب.

سعر العربيه كان 138000 و قالى انا هعملك خصم و نزلها الى 136500 قلنا ماشى.

دفعنا 5000 مقدم و قلنا هنكمل نص المبلغ يوم 1/7 عشان مسافريين بعد كده فايعمل الورق فى الفتره ديه بحيث نستلم و نرخص علاطول.

يوم 1/7 والدى سحب المبلغ المتفق عليه و دفعه و اخد الوصل عادى مافيش اى مشاكل.

سافرنا يوم الجمعه 3/7 بعد الاتفاق معاه اننا هانيجى نستلم يوم الثلاثاء 7/7 بليل.

المهم, بنكلمه يوم الاحد 5/7 علاشان ناكد الميعاد مش بيرد علينا.

قرر يرد يوم الاتنين 6/7 بعد الفطار عشان يقولنا اننا حاجزين عربيه غلط و اننا حاجزين الفئه التانيه اللى ب148000 و لو عايزينها زودوا 10000 جنيه او خدوا التانيه الفيرانى !!!

جليطه و قله زوق الصراح فى التعامل.

يعنى هو اخد 11 يوم عشان يعرف ان هو حجز عربيه تانيه غير اللى احنا عايزينها و هو مش دريان !!!

المهم, ابتدينا نعمل تليفونات و جبنا فيها 136000 من AutoMicho بس فيرانى برده.

فا قلت خلينى محترم و كلمته يوم الثلاثاء 7/7 بليل قلتله انا جايب 136000 من حد تانى و انت عارف انى فلوسى كاش فا يا تنزل ال500 يا هسحب الفلوس و اجيبها من حد تانى و انا كده كده معايا وصل بحجز البترولى مش الفيرانى.

قالى لازم ارجع للاداره عشان ماليش قرار فى الفلوس. قلتله ماشى, قدامك قد ايه, قالى 20 دقيقه.

طبعا اتصل بعديها بساعه و قالى انا اتكلمت مع الاداره و قلتلهم انا المشكله مش من عند العميل ديه من عندينا و هو ملوش ذنب يتحمل الموضوع ده فا رضيوا ال500 جنيه تنزل و العربيه دلوقتى ب136000 بس انا مجبتلهمش سيره انك جايب سعر من بره (حسيت اد ايه الاداره همها على الناس و مش مهم الفلوس خالص بالنسبه لهم ).

المهم, قلتله خلاص ماشى, هجيبلك باقى الفلوس بكره الصبح عشان استلم, قالى بس انا بكره اجازه, قلتله حد تانى يسلمنى عايز اخلص, قالى طب استسمحك خليها بعد الفطار و انا هنزل مخصوص عشان اسلمهالك. قات ماشى على الساعه كام قالى على 9.

يوم الاربعاء 8/7 طبعا 9 بليل بكلمه قالى اصلى لسه راكب و جاى فى السكه. تمام.

الساعه 9:40 كلمنى و قالى انا فى المعرض, رحت واخد الوالد و نزلت و كنت عنده 9:45.

دخلت الخزنه دفعت باقى المبلغ و قلتله عايز وصل بالى دفعته قالى مافيش, احنا بنسلمك العربيه و ده معناها انك دفعت كل حاجه (قلت ماشى يمكن انا جاهل و معرفش).

انا: فين العربيه ؟؟
مدحت: اهيه اتفضل.
انا: جميل, مفيش خبطات
مدحت: امضى هنا
انا: ايه ده ؟؟
مدحت: اقرار استلام
انا: استلام ايه ؟؟
مدحت: العربيه
انا: هو انا استلمت حاجه ؟؟ انا حتى مشفتش مفتاحها
مدحت: يعنى مش هتمضى ؟؟
انا: لا, لحد لما استلم و اجرب كل حاجه.
مدحت بعد ما قلب وشه: ماشى, هخلص الورق و اجيب حد يسلمك.

نص ساعه قاعد مبعملش حاجه و هو عمال يتكلم مع اى حد معدى و بيخلصش حاجه.

قمتله و قلتله انا ورايا مشاوير و الحج مش قادر يقعد, قالى حاضر علاطول اهو.

10 دقايق و جاب الورق و قالى اتفضل استلم.

جيه راجل زوق, سلمنى غطا عربيه و طقم دواسات و الكتالوجات و جرب المفتاحين وانا جربت التكييف و الباور والزجاج و النور و المرايات و الريموت و كله تمام.

مضيت على اقرار الاستلام و قلتله الافراج هاييجى امتى قالى الخميس او الاحد.

كلمناه يوم الاحد 12/7 قال لسه مجاش.

كلمنا يوم الاتنين 13/7 قال لسه مجاش بس هاييجى بكره. قلت ماشى.

طبعا متكلمش, كلمته يوم الثلاثاء 14/7 الساعه 10:15 بليل وحصل الاتى:
انا: فين الورق ؟؟
مدحت:انا لسه فى الطريق رايح فا هوصل و هقولك.
انا: اتصل بيهم و اعرف انا مش تحت امرك.
مدحت: حاضر, هكلمهم و ترد عليك.

طبعا لا اتكلم ولا اي حاجه.

كلمته الساعه 10:35 و حصل الاتى:
انا: مكلمتنيش ليه ؟؟
مدحت: اصلى كلمتهم و محدش رد عليا فا قلت لما اوصل اشوفه بنفسى.
انا: و بعدين ؟؟
مدحت: اهو الورق جيه و تقدر تستلمه.

كنت عنده الساعه 11:00 و قالى مكتب الاستلام فى الاخر اتفضل.

رحت مكتب الاستلام و حصل الاتى:
انا: عايز استلم الورق باسم فلانه الفلانيه.
الموظف: الورق مجاش.
انا: نعم ... امال انا جيت ليه ؟؟
الموظف بكل برود: و مين اللى قالك تييجى ؟؟
انا: مدحت
الموظف ولا كانه سمع حاجه: الورق بتاعك هييجى الساعه 12:30
انا: و انا اعمل ايه دلوقتى فى اللى حصل ده ؟؟
الموظف: ادخل اشتكى للمدير المكتب اللى جنبى.

دخلت المكتب اللى جمبه و لقيت واحد قاعد قالولى ده احمد القرش.

المهم, قالى اتفضل و الابتسامه على وشه:
احمد: تحت امرك.
انا: (طبعا حكيت الحكايه كلها من الاول وشه اتقلب)
احمد: مين اللى عمل كده ؟؟
انا: مدحت
احمد: لا طبعا مينفعش
انا: و بعدين ؟؟
احمد: تعالى معايا على مكتب استلام الورق
انا: ماشى

فى مكتب الاستلام.
احمد: فين الورق بتاع الاستاذ ؟؟
الموظف: لسه جاى فى السكه و دلوقتى فى المرج
احمد: هييجى الساعه كام ؟؟
الموظف: على الساعه 12:30
احمد: و مين اللى قاله ييجى دلوقتى ؟؟
الموظف: اصل مدحت جيه مسك الدفتر و راجع الاسامى مع نفسه و مسألنيش و بعدين مشى و راح كلم الباشمهندس.
احمد: لا مينفعش.

و بعدين دار الحوار التالى:
احمد: انت ساكن فين ؟؟
انا: اخر الشارع
احمد: طب روح و لما الورق ييجى هبعتهولك على البيت.
انا: لا, انا عايز الورق بتاعى و انا اللى هاجى اخده.
احمد: طيب تعالى على الساعه 12:30 عشان يبقى هنا.
انا: ماشى.

و بما انى عرفت الموضوع ماشى ازاى عندهم, رحت روحت مراتى و بنتى و قعدت فى البيت شويه و رحتلهم الساعه 1:15 و دخلت على الموظف.
انا: الورق فين ؟؟
الموظف: لسه فى السكه قدامه 10 دقايق.
انا: ماشى.

وقفت بره و طبعا مدحت عدا من قدامى ولا كانه يعرفنى.

الساعه 1:45 دخلت تانى
انا: الورق فين
الموظف: بنكلم الراجل و مش بيرد
انا: اعمل ايه يعنى ؟؟
الموظف: هحاول اكلمهولك تانى.

الساعه 2:00 واحد داخل المكتب
الموظف: انت مش بترد عليا ليه ؟؟
المندوب: اصلى كنت سايق.
الموظف: اتفضل يا استاذ الورق بتاعك بس هو معهوش شهاده البيانات.
انا: ماشى اى حاجه بس امشى (و مكنتش اعرف الكلمه ديه معناها ايه).

رحت النهارده انا و اختى مرور مصر الجديده الساعه 8:30 عشان نرخص و سحبنا الملف و عملنا الفحص و بعدين دار الاتى:
المهندس :فين شهاده البيانات.
انا: (طبعا بكل ثقه) مجاتش من المعرض و هتلع اعملها فوق.
المهندس بصلى بسخريه :فوق فين ؟؟
انا: فى المرور.
المهندس: ورق العربيه على المهندسين فا هتروح هناك.
انا: فين بالظبط
المهندس: معرفش بس هتجيبه و تجيلى تانى.
انا: ماشى.

مكنتش عارف اعمل ايه بصراحه فا قلت اللى هايعرف اكيد موظفه الافراجات.

طلعت للموظفه:
انا: المهندس قالى اجيب شهاده البيانات
الموظفه: ورينى الورق. ده مكان الشركه فى المهندسين يبقى هتروح مرور بين السرايات و تختم الورقه التالته بختم النسر من هناك عشان مرجعكش تانى.

انا سمعت بين السرايات و عرفت ان البوم كده ضاع لانى كان عندى عربيه قبل كده هناك واخدها بتوكيل.

الساعه 11:30 الصبح و كل الناس فى الشارع و كل حته زحمه.
امال مين اللى بيشتغل !!!!

حاولت اكلم اى حد يعرف حد هناك بس ملقيتش.

المهم وصلت بمعجزه هناك الساعه 12:20.
رحت قسم الافراجات و اديت الموظف الورق, خده رماه جمبه و قالى ساعه او ساعه و نص و استلم الورق من الشباك اللى جمب الباب تحت.

رحت انا و اختى عملنا مشوار و كنت عندهم الساعه 2:00.

سألت موظف الشباك على الورق قالى لسه مجاش اطلع شوفه فوق.

طلعت فوق لقيت الشبابيك فاضيه و داخل ادور على الراجل لقيت مندوب شرطه بيقولى ممنوع.
قلتله هو ايه اللى ممنوع انا الورق بقاله ساعتين, قاللى هما بيتاخروا و الظابط مانع حد يخش.

طب فين الظابط ؟؟ تانى مكتب يمين.

دخلت للظابط و حصل الاتى:
انا: انا الورق بتاعى بقاله ساعتين و لسه مخلصش
الظابط: انا المفروض امشى الساعه واحده و قاعد عشان اخلصلكم الحاجه.
انا: ده بقاله ساعتين
الظابط: ماهو الورق خلص و انا طبعتلهم شويه عشان يكملوا و لا تحب نقفل و اقولك تييجى بكره ؟؟
انا: لا شكرا هستنى

طبعا وقفت بره و مندوبين الشركات مظبطين مندوبين الشرطه فى بيخلصوا حاجتهم الاول و يسلموهم و يكرمشله 10 او 20 جنيه.

قلت ماشى, يا مصطفى فيه ورق عند باسم كذا و انا معاك. قالى ماشى.

ولا كانه سمع حاجه. بيمشى مناديب الشركات و كانه شافنى.

و بعدين مسك الورق اللى فاضل كله و قال كله على تحت, التسليم فى الشباك.

كله نزل جرى و بيزق انا سبتهم خالص لحد لما خلصوا و نادوا على اسمها و رحت استلمت و اتاكدت من ختم النسر و بكده خلصت المرحله ديه 2:50.

قلت الحق مرور مصر الجديده عشان هما قالولى انهم هايقفلوا 5.

كنت هناك الساعه 3:45 (مش عارف ازاى بس حصلت).

المهم, عديت على مهندس الفحص و راجع الورق (و ايدى على قلبى لا يبعتنى تانى الدقى) و بعدين قالى كله سليم و ختم و مضى.

رحت المرور طبعا كانت شركات التامين كلها قفلت, قلت ادفعلها الضريبه عشان بكره يبقى على التامين و تستلم النمر.

ملقيتش فوق غير الظابط و 2 موظفين, رحت للموظفه:
انا: عايز ادفع ضريبه
الموظفه: قد ايه ؟؟
انا: 3 سنين
الموظفه: فين العربيه
انا: العربيه زيرو (و اديتها الملف)
الموظفه: فين التامين ؟؟
انا: قفلوا كلهم
الموظفه: مينفغش
انا: ليه ؟؟
الموظفه: لازم يبقى الورق كامل الاول
انا: طب انا مش عايز ابهدل اختى فى المواضيع ديه فا ياريت نخلص الضريبه على الاقل.
الموظفه: مينفعش
انا: يا ستى ساعدينى
الموظفه: ادخل للظابط

دخلنا للظابط و حكينا الحكايه وكان بصراحه محترم جدا و جاب الموظفه و قالها خلصيلهم الضريبه.

المهم طبعا راحت كاتبه الورق و قلت الحمدلله.

اروح للخزنه الاقيها قافله !!!

بصراحه قلت كده كفايه على اليوم و قلت لاختى يلا نمشى عشان مفيش فايده و تعالى بكره انجزى اللى فاضل ده حتى مش فاضل كتير.

الخلاصه:
معرض القرش معندوش اى احترام للمواعيد ولا للناس طالما قفش الفلوس.
احمد القرش بعد ما قلب وشه و عمل الشويتين بتوعه, لا جاب الواد و لا اداله كلمتين ولا فادنى باى حاجه.
غير طبعا بهدله المرور اللى شفتها بسببهم لانهم مش عارفين يعملوا شغلهم صح و على كلام كل الناس لازم المعرض يجيبلك شهاده البيانات ديه حتى فى المرور بيقولولى المفروض هما يدوهالك.

انا مش بسىء لحد بشخصه او معرض باسمه بس حبيت احكى حكايتى عشان اللى هايشترى زيرو يعرف يعمل ايه و يستنى ايه من المعرض.

اسف للاطاله.