الموضوع: خطوات تجديد رخصة الملاكي بالفحص - يوليو 2015

السلام عليكم
ازيكم يا رجالة المنتدى الكرام
وكل سنة وانتو طيبين وفي أحسن حال دايما يارب

بما إن موضوع تجديد رخصة الملاكي هنا في المنتدى من 2010 فقلت أجدد الموضوع ونعمله update

بسم الله نبدأ

عربيتي كريستالة 99 بحب أجددلها كل ثلاث سنين (راحة دماغ من وجع القلب في المرور الصراحة)
في مرور الدقي (بين السريات)

قبل ما تروح لازم تكون مجهز معاك

1- 2 صورة للبطاقة
2- 2 صورة للرخصة
3- أصل البطاقة والرخصة
4- التوكيل وصورة منه لو انت مش المالك
5- يفضل تدخل على النت على موقع المخالفات وتعرف عليك مخالفات قد ايه عشان متتفاجئش زي حالاتي وفلوسي مكفتش المخالفات (هما مخالفتين بس عشان محدش يفتكر اني عربيد والا حاجة )

لينك المرور أهو
بوابة الحكومة الالكترونية - المواطنون

ندخل بقى على المشوار:
1- خدت ملف تجديد وفحص من الكشك اللي عند الباب أول ما تدخل على الشمال بـ 55 جندي
كان فيه:
3 نسخ من نموذج 251 مرور وعليه الدمغة بتاعته
طلب فحص فني
نموذج الفحص البيئي
شهادة صلاحية جهاز إطفاء يدوي

2- خدت حافظة (فوجئت طبعا بإنها مطلوبة ولازم تكون زرقا عشان ملاكي) بـ 10 جندي
3- رحت بعد كده علطول على مصر للتأمين قصاد كلية علاج طبيعي وأمنت بـ 263 جندي
وخدت نسختين نسخة ملونة هتتحط في الملف ونسخة حمرا للاحتفاظ بيها
طبعا قدمت صورة الرخصة وأنا بعمل التأمين

4- جبت العربية للفحص وفحصت
5- اشتريت طفاية بـ 147 جندي ونص (حاجة فخيمة)
6- اشتريت علبة اسعافات بـ 50 جندي (الحمد لله كان معايا المثلث وإلا كنت هتلسع 50 جندي تاني )
7- قدمت ورق الفحص البيئي للمهندس والحمد لله مضى عليه علطول
8- بعد كده اتجهت لنيابة المرو في الدور الثالث وقدمت الرخصة والبطاقة ودفعت 10 جندي وطلعت شهادة المخالفات
9- لقيت اللي بينادي عليا وبيقولي هات 2010 جندي
وهنا تتوقف الأحداث نظرا لأنه مكنش معايا المبلغ ده بعد الدفع اللي أنا دفعته ده
فقلتله اديني بيان المخالفات وهبقى أجيلك في يوم تاني
لقيت في البيان مخالفتين عكس اتجاه كل واحدة في اتجاه من البلد
واحدة في أكتوبر والتانية في المطار
وخدت بعضي وروحت على أمل اني أنزل يوم تاني

اه نسيت
كل الكلام ده كان في يوم الأربعاء 23 يوليو 2015 من الساعة 10 للساعة 12

هبقى أنزل باقي الأحداث لما أنزل أدفع المخالفات ان شاء الله

سلام عليكم
نرجع نكمل اللي بدأناه في المرة اللي فاتت
كنا وصلنا عند نقطة المخالفات ودفعها
9 - الحمد لله رحت دفعت المخالفات واستلمت بيان بيها
التكلفة بالنسبالي كانت 2000 جنيه مخالفات و 10 جنيه رسوم قضائية
هتدخل على شباك المخالفات تديله الرخصة والبطاقة وتدفع 10 جنيه وتقعد تستنى شوية
هينادي عليك بتاع الخزينة ويقولك عليك كام وتدفع وتستنى تاني
هينادي عليك واحد ثالث ويديك بيان المخالصة (يعني ان المخالفات اللي عليك اتدفعت ونزلت من عليك)
وتقول الحمد لله ليك يارب

10- أنا عاملها خطوة عشان متتعطلش بسسبها ألا وهي ان حضرتك وانت بتستنى تطلع النماذج اللي في الملف وتملى بيانات العربية اللي انت بتجددلها على كل النماذج
3 نماذج 251 مرور ونماذج الفحص
11- كده معاك في الملف:
3 نماذج 251 مرور
شهادة دفع المخالفات
أصل وثيقة التأمين
نماذج الفحص ممضية من المهندسين ومختومة من الضابط
رخصة العربية
صورة البطاقة والرخصة
>>> تحط كل دول في الملف الأبيض اللي اشتريته في خطوة 1 وتقدمه في شباك التجديد مع الحافظة الزرقا
12- هيتأكد من ان الملف كامل ويبعتك تدفع الضريبة
بالنسبالي كانت الشريبة 570 جنيه عشان عربيتي بنزين و1300
13- تاخد وصل الدفع وتقدمه تاني للشباك اللي قدمت فيه الملف بتاعك وتقعد تستنى شوية بقى لحد ما تستلم الرخصة
14- هينادي على اسمك ويسلمك الرخصة
15- تقول الحمد لله اني خلصت من المشوار ده
16- ترجع تمارس حياتك العادية مرة تانية

وتم بحمد الله