شراء عربية

**زهرة البنفسج** · 27-07-2015 12:14 AM

السلام عليكم ورحمة الله وبركاته
أنا عايزة أشتري عربية تكون كويسة في حدود 40000 جنيه بس مش عارفة أختار ماركة معينة أنا عايزة ماركة تكون قطع غيارها متوفرة وسعرها مش غالي وكمان الميكانيكية يعرفوا يشتغلوا فيها.
أرجو الرد في أسرع وقت

**mohamed-ahlawy** · 27-07-2015 12:23 AM

حضرتك لو تقدري تزودي 5 الاف جنية يبقي تشتري لانسر كريستالة موديل 99 او 98
او ممكن تشتري فيرنا موديل 2004 بس الي هي تكون كوري بلاش المصري

**ahmedalaahosny** · 27-07-2015 12:30 AM

دايو لانوس 1 او هيونداى فيرنا بس هتبقي اغلى من ال40 ب 5 الاف او اكتر
لكن الاتنين دوول الاكثر انتشارا ف مصر

**eng_amg** · 27-07-2015 01:02 AM

كريستالة مبالغين في السعر جدا والعربية الجيدة فوق 50
واعتقد نفس الحال للانوس والفيرنا.
ممكن كيا سيفيا بحالة جيدة اخرها 42 الي 45

**زهرة البنفسج** · 27-07-2015 07:20 PM

السلام عليكم ورحمة الله وبركاته
ممكن أعرف رأي حضراتكم في السوزوكي التو والهيونداي اتوس والدايو ماتيز والرينوكليو والكيا ريو 2001

**على مهران** · 28-07-2015 10:50 AM

السوزوكي التو والهيونداي اتوس والدايو ماتيز التلت عربيات دول حلوين ومصرفهم قليل بس صغيرين جدا والعفشه بتاعتهم ضعيفه شويه
انا عن نفسى ارجح الكليو 2002 - 2003 - 2004 ودى متوسط سعرهم الحاله النظيفه من 35 الف الى 40 الف بالكتير لو 2004 اهم حاجه الحاله والكشف فى التوكيل او مركز خدمه متخصص فى الرينو فقط

**زهرة البنفسج** · 29-07-2015 12:33 AM

السلام عليكم ورحمة الله وبركاته
لو حد عنده تجربة شخصية مع واحدة من العربيات دي رينو كليو - كيا سيفيا - كيا ريو موديلات 2002 ممكن يفيدني بخبرته

**زهرة البنفسج** · 29-07-2015 12:34 AM

السلام عليكم ورحمة الله وبركاته
لو حد عنده تجربة شخصية مع واحدة من العربيات دي رينو كليو - كيا سيفيا - كيا ريو موديلات 2002 ممكن يفيدني بخبرته

**AlphaCharlie** · 29-07-2015 12:45 AM

الكليو حلوة جدا لو حتجيبيها حالة جيدة وزي ما قال العضو علي مهران لازم الكشف عليها في مركز متخصص او التوكيل. لان الرينو لو مش كويسة فمشاكلها كتير. وايضا لازم تعرفي مركز او ورشة متخصصة في الرينو للصيانة والمتابعة. يعني مش اي ميكانيكي يشتغل فيها.

السيفيا عربية حلوة وقطع غيارها منتشرة استيراد وواسعة وموتورها قوي.

**aymanmu** · 29-07-2015 10:26 AM

السلام عليكم
الرينو كليو عربية ممتازة جدا
انا كان معايا رينو كليو 2008 وهتلاقيها فى حدود 24 او 43 الف جنيه
اختارى عربية حالتها كويسة
وهي عريبة ممتازة ، موتور قوى مع انه 1400 ، تكييف تلاجة، ثبات على الطريق ملوش حل انا كنت بجري لحد 170 الف على الصحرواى واتظرطيت قبل كده افرمل والحمدد لله ثابتة جدا على الطريق لانها اصلا عربية تقيلة اوى

قطع الغيار غالية دى خرافة، بالنسبة للاجزاء الخارجية الصينى بقي متوفر وباسعار رخيصة يعنى الفانوس ب 120، 2 مراية من اول 110 وانت طالع حاجات كده، والعفشة استيراد

العيب الوحيد اللى فالعربية دى اللى مانعنى انى اشتريها تانى هو صغر حجمها وده العيب الوحيد من وجهة نظرى العربية ضيقة شوية على عيلة او لو ركبها عدد كبير

بالتوفيق