الموضوع: مقارنه مختصره لمميزات وعيوب بعض السيارات الزيرو

انا معترض على كلامك في الشارك، مش تحيز علشان عندي العربية، بس رأيك طبعا يحترم.
غير كدة، تقريرك رائع ومبروك مقدما على السوزوكي

بالنسبة للسيارة السوزوكي SX4 انا شايف أنها منافس قوي بالسعر ده لكن ثقافة الشعب المصري هتخليها مش هتنتشر زي باقي الأنواع

لكن انا أؤيدك في أختيارك و إن شاء الله هتنبسط بيها جدا

د.عصام شكرا جدا علي زوق حضرتك بس انا مش عايز حد يزعل عشان عربيتو
ودول كفايه انا شفت كتير زي الكيا كارينز بس اللي زكرتهم دول اللي شدوني اكتر لان الكارينز جميله بس مبالغ في سعرها واي سؤال عن اي عربيه شفتها انا تحت امركو
د.هشام طبعا من حقق تعترض لان طبيعي الاذواق تختلف بس انا شايف ان الشارك من اسوء العربيات اللي نزلتها لانسر وكلو بيشتريها عشان اعاده البيع فقط
هامو باشا من عنيه انشاء الله تقرير مفصل بالصور كمان انشاء الله وشكرا علي العم

ما ينفعش الشارك تبقى من أسوأ العربيات اللي نزلتها لانسر والناس بتشتريها علشان إعادة البيع، الكلام هنا متناقض، قصدي مافيش عربية وحشة بتكون إعادة بيعها كويسة في سوق العربيات عندنا. ممكن العكس يحصل، عربية تكون رائعة وإعادة بيعها سيئة لأسباب كتيرة، زي مثلا توكيل سيئ أودعاية سيئة. وتقبل تحياتي

تقرير رائع
وانصح حضرتك تبص بصة علي الكيا سيد لانها تحفة فعلاً وربنا يوفقك في الاختيار

المشاركة الأصلية كتبت بواسطة iso_loma

السلام عليكم
حبيت انقلكم تعب اسبوع من اللف و التدوير والبحث عن سياره جديده للوالد وتكون عربيه عائليه
اولا هو كان معاه كيا سيراتو 2010 خليجى وبعناها وكنا مكررين هنجيب لانسر شارك خليجى او شرق اوسط
وبالفعل سألت على الاسعار و المواصفات لحد مكررت انزل انا والبيت نختار الفئه واللون
1- لانسر شارك 2016
مبدئيا انا عارف ان فيه ناس هتزعل خاصا ملاك الشارك و فيه ناس هتستغرب بس ده رايى فيها
طبعا هى عربيه من شركه محترمه و شكلها حلو .
لكن لما نزلت شفت مواصفات كتيييير اوى للهاى لين وكل معرض غير التانى و كلو خليجى وكلو واضح اللعب فيه بس نيجى بقى لما ركبت العربيه ودى كانت المفاجأه العربيه كارثه فى جوده الخامت الرديئه جدا انا اتصدمت لما شفت خامه الطبلوه و ضيق العربيه و صغر ارتفاع الشنطه واتصدمت اكتر لما مسكت الاكسدام الامامى ضعيف جدا جدا اعتبروه مش موجود يعنى حضرتك ماشى بصدر العربيه ودى كانت فئه ب 160
طبعا انا اتصدمت لان الناس كانو بيقولو فيها شعر ولانى كان معايا لانسر بومه خليجى سوبر اكشن وللاسف البومه تتفوق فى كل حاجه جوده الخامات المصنوعه منها و التقفيل و الوسع ده غير ان سحب العربيه حتى مع الماتور الجديد ليس بالجيد جدا بشهاده الملاك غير المشاكل الاخرى المعروفه زى سوء عزل الصوت والحراره و صوت الكاوتش وفقر التابلوه لكن طبعا هى عربيه اعتماديه جدا فى الماتور والعفشه لكن غير كده لعربيه سيئه جدا و طبعا انتشرت لان الناس فى مصر مش بتفكر فى الركوب قد ما بتفكر فى سعر اعاده البيع وده للاسف ثقافه شعب ده حتى المعارض قلتهالى وش خد شارك و هتبعها بعد كده بأغلى من تمنها لكن بما اننا اسره فالشارك صغيره علينا .
2- نيسان سنترا 2015
وكان جنب الشارك فى نيسان سنترا قلت ابص عليها بصراحه فرق رهييب جدا النيسان فرقه بمراحل فى خامتها وسواقتها ونعومتها العربيه اتباعت قدامى وطلبت من بصراحه مالكها راجل محترم عرض عليا تجربتها وقررت اعيد تفكير لان كده 160 حرام فى الشارك بعتذر لكل ملاك الشارك بس انا كنت فاكر هنزل اجيب حاجه وهم بالذات بعد ماشفت نعومه النيسان وصوت الماتور الغير مسموع بالمره وسحبها الجيد طبعا محرقتش عشان مش عربيتى ولسه جديده السياره عزلها جيد جدا شنطتها واسعه جدا العربيه واسعه من جوه و مريحه قوى فى القعده و شكل التابلوه تحفه مع اللون الاسود فى البيج وشكل و اضأه العدادات وشكل فرش الباب الرائع فعلا العربيه من احسن العربيات فى فئتها ف والهاى لين فيها اوبشن رائع
ِABS/ طاره مالتى ستارت كى / بصمه/سنسور بارك / جنوط اسبور / اسبويلر طالع نايم من شنطه العربيه لا يعيق الرؤيه مثل اسبويلر الشارك و شكلو جميل بجد فعلا عربيه تستحق الفلوس اللي هتدفع فيها عيبها الوحيد قله انتشارها وسؤ توكيل نيسان وللاسف تحذير اكتر من معرض ليا بشراها رغم انها موجوده عندهم ودى علامه تعجب كبيره العربيه دى مظلومه فعلا وللاسف توكلها مش موفر كل قطع غيارها بنسبه 100% لكن اتوقعلها انتشار جامد الفتره اللى جايه ولو التوكيل اهتم بيها شويه هتتفوق على الشارك جدا بس و على فكره انا مهمنيش كلام التجار واتحتط فى حسباتنا
3- شيفروليه كروز
عربيه ممتازه جدا خامتها ممتازه اوبشن رائع خاصتا اوبشن ESP العربيه دى كورى بطابع المانى حاصا ان ماتورها هو نفس ماتور الاوبل استرا بالظبط ودى ميزه وعيب فى نفس الوقت لان ده خلى اسعار قطع غيارها غاليه جدا كمان يعيب العربيه انها بنفس الشكل تقريبا من سنه 2010 مع تعديلات بسيطه لكن غير كده العربيه جميله واسعه ثابته اوبشنز كتير شكل الطابلوه جميل شانطه واسعه سعرها ممتاز 2016 فئه واحده ب 150 الف
4- سوبارو XV
طبعا العربيه اخدت سمعه كويسه وبدأت فى الانتشار وابتدى يبقى فى اعلان ليها وده اللى شجعنى انى اركب عربيه يبانى محترمه من شركه سوبارو خاصا انها كروس اوفر وعاليه عن الارض و 4wd ودى نقطه احب اوضحها الفرق بين 4*4 و 4WD
4*4 بيكون فيها فتيس غرز و الاربع عجلات بيشتغلو عند الحاجه
4WD مفيهاش فتيس غرز و الاربع عجلات شغالين على طول
نيجى للعربيه ان كلمت خدمه العمله و روحت لابوغالى وقابلت مندوب المبيعات وطلبت اتفرج على العربيه وكالعاده لما تسمع غير لما تشوف العربيه اه مرتفعه عن الارض لكن البدى مش عالى يعنى اوطى مثلا كيا اسبورتاج ولانى من اصحاب القامات الطويله انا ووالدى فلما ركبنا يبدوب فى فرق حوالى 5 سم بين رسنا و السقف العربيه مش واسعه زى ماتخيلت العربيه فقيره جدا من الاوبشنز بمعنى الكلمه واكتر حاجه ضيقتنى لما خدمه العملاء قالولى معلومات غلط زى انهم ممكن يركبو مثبت سرعه ولما رحت قالى الموديل الجديد مبيركبلوش و قالولى فى الفون الاستلام بعد اسبوع ولما رحت قالى بعد شهرين نيجى
مميزات العربيه انها سوبارو طبعا 4WD وسعرها معقول فى اول فئه فقط لان تانى فئه التوب لاين ب230 وتفرق انها 6 ايرباج وحاجه واحده تانيه بس انا اسف مش فاكرها بس متستاهلش فرق 22 الف
عيوب العربيه طبعا ان مسقتهاش لكن دى العيوب العاديه الشنطه صغيره و العربيه لانها على كارونه خلفيه فالاستبن طالع لفوق لحد نهايه الاكسدام الخلفى لدرجه ان الفرشه اللى عليه مش متسبته على بادى العربيه وده صغر الشنطه قوى وموضوع الشنطه ده بالنسبالنا مهم لانها عربيه عائليه مكونه من 5 افراد و عيزنها للسفر المرايات مفيهاش اشارات الفئتين ولو عايز تركبهم بيخدو اللى ركبا وتدفع 4000 :D وفيه 2 جريده بتركب زى الشبك كده فوق السقف لو عايز تركبهم ب 2000 جنيه الفرش فى الفئتين مش جلد
بأختصار دى عربيه اداء فقط وليس للترفيه عربيه المهمات الشاقطه
5-رينو داستر
العربيه شكلها و حجمها وسعرها تحفه لكن عيبها انها مانوال فقط وبالتالى الموضوع انتهى قبل ماتفرج واسأل وده اللى خلانى ابص على الاستيب واى
6-استيب واى
عربيه جميله جدا من بره متواضعه من الداخل ضايقنى شكل ازرار التحكم فى الزجاج اللى فى الطابلوه
العربيه واسعه شنطتها كويسه و اتوماتيك لكن عيبها قطع غيارها غاليه طبعا و شفت شكاوى منها كتير من ملاكها خاصا موضوع الثبات وقله جوده التكيف وسوء التوكيل والعيوب موجده فى قسم الرينو فى المنتدى
5- شنجان CS35
طبعا كلو بيقول ازاى تفكر فيها :D دى صينى هقولى اللى حصل اننا لقينا واحد قربنا جابها من فتره و قبلناه و شفنا العربيه وبصراحه العربيه مبهره جدا خامتها ممتازه من جوه اوبشنز بالهبل مرايات ضم مثبت سرعه جنوط اسبور سنسور بارك استبتروك فيتيس نيسان قشقاى فعلا ناعم جدا ومبتحسش بالنقلات عاليه عن الارض ملاكها بيشكرو فيها فى الجروب بتاعها على الفيسبوك و صاحبها شكر فيها ولما سقتها فعلا لقتها عربيه ممتازه تتفوق على التيجو و البريليانس v5 خاصا فى التقفيل والخامات وسواقتها جميله وفعلا رحنا نشتريها واثناء دف الفلوس اشوف التحفه الفنيه :D
6- سوزوكى SX4 (المفجأه)
فعلا العربيه دى مفجأه انا مشفتهاش قبل كده لكن اول لما شفتها شدتنى جدا و ناديت والدى نتفرج عليها العربيه شكلها من بره راائع جدا عاليه عن الارض كروس اوفر الطابلوه تحفه امكانيات وابشنز حدث ولا حرج
(زينون عالى واطى/زجاج فاميه/طاره مالتى/4 ايرباج/ABS/ESP/فيتيس ايزى ترونك/شيفت جير فى الطاره تحفه/تكيف تاتش /اختيار نظام القياده/سينسور بارك امامى وخلفى/فانوس امامى ليد/2 نور اضأه واحد للراكب الامامى والاخر فى الوسط/مرايات كهربا/طى المرايات كهربيا/مرايات تعتيم/نظام إيموبليزر ضد السرقة/فوانيس ضباب/مساحات خلفيه/USB/AUX/زر تشغيل و إيقاف المحرك / مثبت سرعه/بصمه/نور بالشنطة الخلفية/حساس مطر /...... حجات تانى كتيييير زهقت من كتر الامكانيات ) نيجى بقي للشنطه الشنطه ملعب مع امكانيه طى الكنبه العربيه يبانى طبعا تقفيل المجر يعنى تقفيل اوربى يعنى من انضف الخامات والتقفيل اللى موجود طبعا عربيه زى دى بالامكانيا التحفه دى تتخيلو سعرها هيبقى ايه انا قلت 250 اقل حاجه اتفاجئ بالمندوب يقولى سعر العربيه موديل 2016 ب 170 الف كام 170 طبعا حضرتك قصدك 270 لا يافندم 170 الف فقط ده السعر الرسمى :D طبعا فى زهول رهيب انا و ابويا نبس لبعض عربيه بأمكانيات زى الاسبورتاج والهيونداى ix35 ويمكن اعلى كمان وكمان يبانى وبالسعر ده طبعا وبدون تفكير الحمدلله حجزتها وإن شاء الله استنو منى تقرير بعد الف كيلو انا شايف ملاكها بيشكرو فيها جدا لكن هى لسه مش منتشره لكن إن شاء الله هتنتشر جدا خاصا بالسعر ده والامكانيات دى .
فى النهايه انا اسف لو كنت مش محايد انا بقيم العربيات من وجهت نظرى انا فقط وده لا يزود ولا ينقص من عربيات حد واسف لو مكنتش محايد او متكلمتش عن عربيات كتير زى التانيه وده لان العربيات دى معروفه وفيه اعضاء تانيه اتكلمو عليها احسن منى وياريت يكون تقرير مفيد ولو اى عضو احتاج مساعده فى العربيات دى انا تحت امرو

انت استاذ ما شاء الله على تفكيركوملاحظاتك
معاك قوى فى نقطتين
اولا السنترا مظلومة لكن ليها اخت اسمها فلوانس ومبيعاتها هايلة والفلوانس تشترك مع السنترا فى الفتيس والموتور والتكيف من شركة نيسان (دا تعاون بين رينو ونيسان) علشان كدة انا جبت الفلوانس

ثانيا السوزوكى sx
فعلا عربية حبتها من غير ما اشوفها وكان نفسى فيها بس السيدان هى اللى غلبت