الموضوع: مقارنة بين انواع مستعملة

السلام عليكم اهل نايل موتورز الكرام
محتاج مساعدتكم لأني هاشتري عربية مستعملة في حدود 50-55 الف بالكتير جدا جدا

حاليا قدامي كذا حاجة

1. نيسان صني 2007 مانيوال بس عايزة نضافة من برة في الاكصدامات ورد عالبارد بسعر 55 الف
2. دايو نوبيرا 2008 مانيوال بسعر 55 الف
3. دايو نوبيرا 2008 اوتوماتيك خليجي بسعر 50 الف !!!!
4. فورد فوكس 2006 هاتشباك ستيبترونيك بسعر 55 الف
5. سيات ابيزا 2002 بسعر 45 الف
6. هيونداي فيرنا 2008 بسعر 52 الف

ترشيحاتكم ايه في العربيات دي اولا
استخدامي هاسافر بيها مرة اسبوعيا حوالي 500 كيلو
مشوار يومي حوالي 20-30 كيلو
يعني متوسط الاستهلاك الاسبوعي حوالي 650 كيلو

طبعا انا ماشوفتش حالة العربيات كلها لسه هاكشف عليها
بس النوبيرا الاوتوماتيك اللي بـ 50 الف سعرها مغري فقررت اكشف عليها في التوكيل لما اقابل صاحبها واشوفها في المرور
طبعا الفيرنا معروفة في السوق وبتبيع لوحدها واسرع عربية في البيع
نيسان صني بتتباع بس طبعا بعد ماتتظبط
سيات معروفة بس ما اعرفش اعادة البيع بتاعها عامل ايه
واخيرا فورد فوكس عربية محترمة بس برضه ما اعرفش اعادة البيع عاملة ايه

محتاج ترشيحاتكم ومصاريف الصيانة هتبقى عاملة ايه للموديلات دي خصوصا انا مقيم بين 6 اكتوبر والشرقية

شكراً جزيلا واسف على الإطالة :)

المشاركة الأصلية كتبت بواسطة ibrahiiimooo

الاخ العزيز د سامة
بص يا سيدي
اجابة سؤال حضرتك معتمدة على حاجات كتير لان العربيات اللي حضرتك قلتها مجموعة مش متجانسة من العربيات ما يجمعهاش مع بعض غير السعر و ده مش لازم يبقى السبب او المعيار الاوحد للاختيار الاول حضرتك بتحدد انت عايز ايه من العربية و ايه اللي يهمك و بعدين نشوف مين من العربيات اللي تناسب الاحتياجات دي و نحكمها بالسعر ( يا نهار اسود على الرغي ؟؟؟)
1-العربية اللي حضرتك حاتجيبها حتعقد معاك كتير و لا هي سنة او سنتين و تبيعها لان لو حتعقد معاك فترة فاعادة البيع مش هتبقى مهمة اوي لان السوق مش حيفضل محتفظ باتجاهاته الشرائية الحالية لمدة 5 او 6 سنين جاية فلازم هتركب عربية محترمة مش عربية اهم مميزاتها اعادة بيعها الجيدة
2-بتركب العربية معظم الوقت لوحدك و لا مع العيلة و خصوصا لو منهم اطفال هنا الوسع و الامان و الثبات على السرعات هيبقى من المحددات الاساسية للاختيار بين العربيات المذكورة
3-بتفهم في ميكانيكا العربيات و العربيات بصفة عامة ولا لأ يعنى عندك استعداد تركب عربية ركوبة بحق بس تستحمل شوية اهتمام زيادة بالعربية و لا زي معظم المصريين عايز عربية من غير مصاريف ( النوع ده من العربيات بيبقى من غير حاجات تانية مهمة كتيير) و تفتح الكبوت ماتعرفش تحتيه ايه (مش قولت يا نهار اسود على الرغي؟؟؟؟؟)
العربيات
الفيرنا (اعادة بيع-قطع غيار رخيصة-تسارع كويس-سهولة صيانة-عفشة ناعمة-تكييف مرضي-موديل احدث) قصاد (ضيقة-تقفيل فيه مشاكل-مافيش و لا صاج و لا ثبات و لا امان-اسنهلاك بنزين زيادة شوية-اعطالها متعددة بس رخص قطع الغيار مش بيحسسك بمشكلة في النقطة دي)
الصني (اعادة البيع-تسارع كويس-سهولة صيانة-تكييف مرضي-اوسع من الفيرنا-اعطال قليلة)قصاد(ضيق الجزء الخلفي من العربية-قطع غيار مش رخيصة-عفشة ناشفة شوية-تقفيل فيه مشاكل-و لا صاج و لا ثبات و لا امان في غياب abs و air bags اللي بدؤا ينزلوا في السوبر صالون في اواخر الموديل-بلاعة بنزين محترمة-تابلوه وحش و فقير على العربية و كاسيت اقل ما يقال عنه انه يعر)
النوبيرا (اعادة البيع-قطع غيار معقولة بس في حاجات برده مش رخيصة-تسارع حلو-سهولة صيانة-عفشة ناعمة-تكييف مرضي-وسع محترم-تابلوه شيك) قصاد (تقفيل فيه مشاكل-مشاكل في الاوتوماتيك بس رخص تمن الفتيس بيحل شوية المشكلة دي-اعطالها زيادة حبتين و خصوصا مشاكل دورة التبريد-طبعا تشترك مع العزيزة الفيرنا في عدم وجود الصاج و الثبات و الامان-استلاك بنزين عالي-شكل يختلف علية البعض من الخارج)
الابيزا (شكلها حلو-ممتعة في السواقة و دي حاجة مش موجودة في كل ما سبق-تسارع مميز-قطع غيار في المعظم مش غالية قوي-عفشة ناعمة-شبابية-استهلاك بنزين معقول-ثبات كويس-امان متوسط لو فيها ايرباج و حلو لو كمان فيها abs) قصاد (اعادة البيع-موديل اقدم-ضيقةو ما تنفعش عيلة-صيانة مش سهلة و قطع غيار حتدور عليها شوية-تكييف اداؤه مش قوي)
الفوكس مش حنتكلم عليها هنا لان مافيش موديل 2006 ب 55 الف جنية ده العربية اللي نص نص سعرها بيوصل 75 الف و اذا كان هناك عربية معروضة فعلا على دوبيزل بالسعر ده فمن صور العربية اللي منشورة احب اقول لحضرتك العربية دي اتدغدغت و مغيرة نص امامي على الاقل و اللي مداري ان الايرباج مفتوح (بالمناسبة تغغيير طقم الايرباج في الفوكس بيخش في 10-12 الف جنية بالميت)اللي مداري فتحة الايرباج مداريها بغشامة شديدة و باينه قوي
هذا ما لزم بيانه و تيسر ذكره و اعداده و مبروك العربية مقدما

صباح الخير ...كلامك كله 10 /10 وممتاز وحللت كل عربية ببساطة لكن ما تزعلش مني اول ما جت سيرة الفورد بدأت الانا في الظهور
الفورد وكمان الفوكس عربيات كويسة زي اي عربية تانية لكن برضة بلاعة قطع غيار وبرضة بتتصين كتير والزيادة ان ساعات الاعطال التوكيل سواء رجب او غيرة مبيعرفش يصلحها وبلاخص في الفتيس والكهرباء
وتعتبر من السيارات المعقدة في الصيانة جدا واسعارها نزلت لحدود 50000 جم وفلبريكه برا وجوة وانزل السوق وشوف لانك ممكن مابتنزلش من فترة
السوق المصري له متطلبات وتعتبر مشروعة جدا وهي الانتشار وسهولة الصيانة وتوافرها ودة لعوامل منها الحالة الاقتصادية وسوء خبرة الفنيين المتوافرين وجشعهم ويمكن دول اكتر حاجتين بيؤثروا علي اي عربية متوافرة في السوق والسبب الرئيسي لعزوف نسبة كبيرة عن السيارات المعقدة امثال السيتروين والسوبارو والفولفو وسيارات انجليزية عريقة امثال الروفر والجاجوار ومش هنتكلم عن الامريكي علي الرغم من عمرة الطويل لكن اعطال وقطع غيار سخيفة جدا