بفكر اشتري ميجان ii

**AhMeD EzZ** · 18-08-2015 03:40 AM

سلام عليكم

حالياً انا معايا Speranza 516 بس مطلعة عيني و كل يومين عند صنايعي شكل- مغير 3 جوان وش سلندر- في شهر !!
فكنت بقلب في العربيات في رينج 55 ~ 65000 يعتبر الي لقيته
1/ لانوس 200x و دي انا مستبعدها بسبب تجربتي مع الأسيوي
2/ فيرنا و نفس الكلام
3/ ميجان II و دي الناس كلها بتشكر فيها بس الأغلب بيقول بلاش حاجات أقل من 70000
4/ بروتون Gen2 و دي انا شخصياً بحبها بس مقلق من كام حاجة زي لما قارنت الطابلوه بالميجان حسيت انها فقيرة جداً و استهلاك بنزين عالي بس باقي الاداء في صالحها تقريباً

فالسؤال دلوقتي، هل ممكن الاقي ميجان كويسة في رينج 65,000 ? و تقريباً ايه ممكن يكون عيبوها؟

**fepsceasar** · 18-08-2015 09:25 AM

هو انا مع الناس اللى بتقول أكتر من 70 بس الفيصل انك تكشف كويس ويفضل فى التوكيل أيا كان السعر .. من اللى سمعته ان عربيات 2007 وطالع فيز 2 أفضل من 2005 و2006 والله اعلم

**gym1974** · 18-08-2015 12:12 PM

نصيحة لوجه الله ابعد عن العربية ده بالمرة اقسم بالله ممكن تكره تركب عربيات تانى بسبب العربية ده وسيبك من موديل فوق 2007 والكلام ده انا معايا موديل 2010 كله زى الزفت ولله الحمد

**mif** · 18-08-2015 04:50 PM

2005 و 2006 معيوب
من اول 2007 شغال
عربية جميلة جدا جدا و لكن صيانتها ليها متخصصين
قطع غيارها الاصلية غالية جدا جدا
و القطع المضروبة تركبها تضربلك حاجة تانية
ممكن اعطال بسيطة تلففك حوالين نفسك .... كنت مسافر و العربية فيها كهربا بس مش عايزة تدور قعدت يومين بلف لحد ما كهرباءي فهلوي ربط سلك الارضي كويس بالصدفة فقط دارت
ثقيلة جدا في البيع

افضل اختيار ليك فرنا صيانة الفرنا فى سنة = صيانة ميجان فى شهر

**احمد دودى** · 19-08-2015 03:38 AM

المشاركة الأصلية كتبت بواسطة gym1974

نصيحة لوجه الله ابعد عن العربية ده بالمرة اقسم بالله ممكن تكره تركب عربيات تانى بسبب العربية ده وسيبك من موديل فوق 2007 والكلام ده انا معايا موديل 2010 كله زى الزفت ولله الحمد

الله يطمنك ده انا بخلص فى واحده 2007

**gym1974** · 19-08-2015 12:05 PM

المشاركة الأصلية كتبت بواسطة احمد دودى

الله يطمنك ده انا بخلص فى واحده 2007

استاذ احمد صباح الخير على حضرتك اقسم بالله انا مالى اى غرض غير النصيحة والارشاد بما يرضى الله ابعد تماما تماما عن العربية ده اقسم بالله خسارة فيها الفلوس

**fepsceasar** · 19-08-2015 12:19 PM

اي عربية بما فيها الميجان ما هي الا قطع غيار اصلية وصنايعي اكيد استاذ gym1974 عندك مشكلة في حاجة منهم..قولى بتعمل صيانة فين ونحاول نفيدك
عموما الفيرنا حمادة والميجان حمادة تانى

**تامر.محمد** · 19-08-2015 12:35 PM

نصيحة لوجه الله ابعد عن العربية ده بالمرة اقسم بالله ممكن تكره تركب عربيات تانى بسبب العربية ده وسيبك من موديل فوق 2007 والكلام ده انا معايا موديل 2010 كله زى الزفت ولله الحمد

باتضامن مع الرأي القائل ان حضرتك تفتح موضوع بمشاكلك و قصتك مع العربية من لحظة ما رحت تكشف عليها لحد دلوقت

حضرتك مش الوحيد فينا اللي راكب ميجان و طريقة كلام حضرتك مش اول مرة اشوفها و متوقع شوية حاجات

في الانتظار

بالنسبة لصاحب الموضوع
هاتكشف كويس وهاتصرف في قطع الغيار بما يتناسب مع فئتها هاتبقى زي الفل
هاتستخسر في الكشف او في قطع الغيار بلاش

و بين ده و ده ما تسلمش دماغك لصنايعي ابدا و دايما خليك مع الناس هنا

و بالمناسبة , قطع غيار الميجان نفس اسعار , ان لم يكن بعض القطع ارخص من الجين2 فعلا

**تامر.محمد** · 19-08-2015 02:52 PM

المشاركة الأصلية كتبت بواسطة gym1974

طريقة الكلام ده مش ظريفة وغير لائقة بالمرة انا بنصح وبعمل اللى علي ولا تتوقع منى اكتر يا سيدى متزعلشى نفسك احسن تكون فاكرنى جاسوس ولا حاجة انا معايا ميجان موديل 2010 حضرتك مش داخل اقول اى كلام وخلاص وشكرا والسلام ختام

حضرتك حط خط تحت الجملة (الغير لائقة) في كلامي و اتفضل بذكر الغير لائق فيها و انا ملتزم بتوضيح ما فيها
اما نقطة غير ظريفة فانا ما ادعيتش اني باتكلم كلام (ظريف)

و رغم اني ما ذكرتش خالص حتة (جاسوس) دي , و مش عارف حضرتك جبتها منين , لكني مازلت عند نفس طلبي , عايزين حضرتك تكتب لنا تاريخ حضرتك مع العربية بالظبط من لحظة ما اخدتها تكشف عليها

و بالمناسبة انا عارف و مقدر اللي حضرتك غالبا مريت بيه , لأني سمعت قصص مشابهة قبل كده زي ما اسلفت , حضرتك ما بتقولش كلام و خلاص , لكن ده مش معناه ان كل عربياتنا كده

انا بالمناسبة حايش نفسي من التجاوب مع حضرتك بنفس اسلوبك فأتمنى من حضرتك التعاون و يا رب نقدر نساعدك