الموضوع: حادثة العربية,,تقرير مُفصل

بسم الله الرحمن الرحيم وبه نستعين
والصلاة والسلام علي الحبيب محمد صلي الله عليه وسلم
,,
اولا من كُل قلبي والله اتمني ان مفيش اي حد يتعرض لاي حادثة او لاي ضرر
لانها بهدلة ومرمطة وتعب ربنا يبعدكم عنها ياااااارب
,,
نخش في المُهم في التقرير دا هستعرض الحادثة والاضرار وتكاليف الاصلاح عشان تبقي مرجع لاي حد حااابب يبقي مُلم
,,
الحادثة حصلت ليا يوم العيد اللي فات دا الصبح وانا رايح البلد
اللي حصل ان عربية جيب دخلت فيا بالجنب وزقتني ع عربية دبابة واقفة مخالف ع اليمين بتاعي
المهم
الاضرار بقي كانت
1- سمكرة في الجنب الشمال من اول الباب بتاعي والباب اللي ورايا وجزء من الرفرف
DSCN1387.jpg

2-نيجي بقي للمعضلة كانت في وش العربية من قُدااام
DSCN1390.jpg


DSCN1393.jpg

عندك طقم تبريد كامل
راديتير وسربتينة والقرب بتاعتهم وقرب المساحات

مراوح الراديتير بالشاسية البلاستيك بتاعهم

طقم فوانيس امامي

اكصدام امامي ورفرف يمين وكبوت
DSCN1396.jpg



كرسين موتور كانوا مفسوخين وبعدها طلعت كمان القنطرة اتعوجت

الايرباج عايز يتغير طبعا
DSCN1396.jpg

الازاز الامامي بريبرز دكتور جريش
سير دينامو

دي الحاجات اللي هتتغير بالاضافة طبعا للشغل السمكرة والدهان والميكانيكي والكهربا
واللي هتكلم عنهم بالتفصيل كمان شوية

بدات في السمكرة اتكلفت 3500 جنيه
شاملة سمكرة الجمب
استعدال الشاسيه من قدام لان حصل فيه اعوجاج مع تركيب الاكصدام والكبوت والرفرف والفوانيس والعضم الحديد اللي شايلهم
وكان عندي برده الاكصدام من ورا عايز يتظبط فقلت بالمرة بقي

اخد شغل فيهم تقريبا 10 ايام

طبعا حليت المكنة عند الميكانيكي عشان الحوض يبقي فاضي والسمكري يقدر يشتغل حلو
خلصت من عند السمكري

روحت بقي للميكانيكي تكلفة 400 جنيه راجل محترم جدا وراعي ظروفي بصراحة ربنا يباركله

كانت شاملة علي حل وتركيب المكنة مع الكراسية والقنطرة بتاعة الموتور وسير الدينامو
وتغير 4 صدادات للاربع مساعدين بالكامل

بعد كده جيه دور الكهربائي
ظبط توصيلات الراديتري وحط ميه خضرا وشحن التكييف
واستعدل مواسير التكييف لانها كانت اتعوجت من الخبطة الحمد لله

وركب الكلاكس وركب لمبتين تلجي نور خفيف في الفوانيس الامامي

وركب لمبة في الفانوس الخلفي كانت محروقة وركب الطارة الجديدة طبعا وقفل لمبة الايرباج من التابلوه
التكلفة كانت 440
200 شحن تكيف و 200 شغل و25 ازازة مية خضرا
ولمبيتين تلجي ب 10 جنيه
ولمبة خلفية 5 جنيه

بعد كده كانت عندي مشكلة في الكرسي بتاع السواق من الصدمة
روحت للسروجي ظبط المكنتين بتوع الكرسي واتكلف 100 جنيه

كانت عندي مشكلة في السنتر بتاع الباب كان لما اقفله بالريموت يفتح تاني لواحده
صلحته ب 30 جنيه

بعد كده روحت لبتاع الازاز تركيب لوح ازاز امامي دكتور جريش شامل التركيب 420 جنيه

هـــااااه

بعد كده يا أحباب توجهت للبوهيجي

تكلفة مصنعية 1000 جنيه والبوية skins نضيفة وكويسة الكيلو ب 440
وكيلو ورنيش برده كل دا كان في حدود 900
يعني كله 1900 جنيه
رش ايه بقي
رش الجمب والاكصدام من ورا وقدام
ولمع الفوانيس ولمع العربية بالكامل

بعد كده استلمت العربية لسه المغرب وقولت لازم اطلع واقولكم واشارككم التجربة الصعبة دي
[س انا راضي والله الحمد لله يعني فضل ونعمة من ربنا والله

بالنسبة بقي لاسعار قطع الغيار :
1- قطمة نيسان شاملة طقم التبريد كامل مع طقم فوانيس مع الاكصدام الامامي
بالحديد اللي شايلهم او ما يسمي بالعضم 3500 جنيه

2-طارة بالايرباج 1200 جنيه استيراد

3-رفرف جانبي 500 جنيه استيراد
4-كبوت 1500 جنيه استيراد

6-كرسي موتور امامي 110 جنيه تيواني الاصلي كان عامل 300 وفكة باين
7- كرسي الموتور الشمال وانا واقف قدام العربية 120 جنيه تيواني

8- سير الدينامو 80 جنيه

9-قنطرة 300 جنيه بالكرسي الوراني فيها

10-قربية راديتير 150 جنيه

11- قربة مساحات 200 جنيه

12- شاسيه مراوح الراديتري 85 جنيه خامته معقولة

13 مروحة راديتير 300 جنيه استيراد بتبقي 3 سرعات خلوا بالكم
المروحة التانية كانت سليمة

14 طقم صدادات صيني 70 جنيه للاسف ملقتش الا صيني

بس شكلهم سكة لانهم بيزيقوا فغالبا هغيرهم ان شاء الله بس مش دلوقتي

فانا ما انصحش بيهم

15 كنترول ايرباج استيراد بيعمل 250 جنيه بس انا مجبتوش بصراحة لسه
طبعا ضيف ع كده تكاليف جر العربية والكلام دا

طبعا دا كله كوم والتعب والارهاق والبهدلة كوم تاني
ربنا ما يحطكم فيها ابدا يااارب

اتمني اكون افدتكم ولو حد ليه استفسار انا تحت امركم

الحاجات دي كلها من المنصورة ,,
بالمرة الفتيس الاتوماتيك استيراد بيعمل 1500 جنيه

الميزة ف العربية دي حاجاتها منتشرة جدا جدا والله ودا نقذني الحمد لله

انا تحت امركم في استفسار ,,ودعواتكم بقي