الموضوع: الزوجه المصريه والزواج التاني

دا اول مقال ينتشرلي علي موقع
نشوف حيعجبكم ولا لا (:

“انا زي الفريك محبش شريك”

“انا مش زي اي واحده انت عرفتها قبل كده”

“انا اللي حيتجوزني يا سعده يا هناه”

“طيب دا انا لما رقصت في فرح بنت خالتي جالي 20 عريس وبنت خالتي كانت حتتطلق في الفرح علشان جوزها يتجوزني”

“بقي بتبص للمعفنه دي وانت ماشي معايا؟؟”

“دا انا مش حارماك من حاجه ومأكلاك وغسلالك هدومك”

“طيب هي حتعملك محشي زي اللي بعمله؟!”

كل ما سبق ده هي المزايا اللي الست المصرية شايفاها في نفسها وشايفة انها اسباب كافية جدا انها ترتبط براجل مدي الحياة ويكون في غني عن انه يتعامل مع اي انثي تانيه حتي لو كانت ام جدته الراقدة في مقبرة…

في اعتقادها ان الراجل طالما أكل وشرب ونام فهي كده مكفياه من مجاميعه…

والانثي المصريه تغفر الخيانه لزوجها ولكنه حذاري ان يفكر في ما احل الله له من الزواج بمثني وثلاث ورباع وزي ما خلدت السينما والروايات المصريه رد فعل الانثي المصريه في لحظه الخيانه واشهرهم :

“بتخوني مع صاحبتي؟! “

“بتخونني علي سريري ؟!”

“بتخوني مع القذره دي ؟!”

مما يتبين لنا انها مش معترضة علي الخيانة وانما معترضة ان واحدة تانية تلمس حاجة بتاعتها ومش عاوزه طقم السرير يتلوث بانثي تانية علشان مبتحبش حد ينام مكانها، ومش عاوزة واحدة قذرة جوزها يخونها معاها ، وكأنه لو خانها مع واحدة غريبة علي سرير تاني وكانت البنت حلوة كانت ممكن تقولهم “استنوا احضرلكم الحمام واسيبكم تتبسطوا”!!!

وكل ده ممكن يخلص بخاتم دهب او فسحه او ان الراجل ياخد اسبوع اجازه يقعده معاها في البيت وهي في الاسبوع ده حتوريله من الوان الحب مالم يراه منها قط…

طيب فيه ستات جابت اخرها فعليا وقدمت كل ما تستطيع لزوجها ، وفيه ازواج يبحثون عن ما احله الله لهم فبيفكر يتجوز وفي الحاله دي لو فاتح مراته الموضوع بيبعد تمام البعد عن القذره وعن سريرها وعن صاحبتها وبتبدا الفاظ جديده تظهر زي:

“طلقني”

“هو انا مش ماليه عينك؟؟”

“هو انت ناقصك ايه ما انت بتاكل وبتشرب!!” (وكانها مربيه شجره وكل احتياجاتها الماء والسماد)

هو ده تفكير اغلب الستات مش كلهم عن احتياجات الرجال وان الراجل طالما اكل وشرب ونام يبقي مش محتاج حاجه تانيه وكانه طفل رضيع ليس له متطلبات اخري

كل ده واقع وتفكير ستات كتير بس دا مجاش من فراغ ….جه من تربيه البنت انها الاجمل والاحسن والاكثر ادبا و”يا بخته اللي حيتجوزك يا نوسه”

ولو ربنا انعم عليها بجمال او بجزء من الجمال سواء عيون او شعر او مقاسات جسم فدا بيعلي سعرها وبيزود الطلب عليها ودي حاجة بيتعاير بيها الراجل طول حياته انها اتنازلت ووافقت عليه بدل فلان اللي كان حيعيشها عيشة احسن من عيشته ويحبها اكتر منه، وحتي وهو بيطلع الروح وبيموت ممكن تعايره انها لو كانت اتجوزت فلان كان عاش اكتر منه

طبعا ست بالمواصفات الفكرية دي استحاله تقبل بوجود انثي تانية في حياة جوزها حتي ولو كانت بياعة فجل او الست اللي بتمسح السلم فما بالك لو تجرأ وفاتحها انه محتاج لانثي تانية تشاركها فيه؟؟

اكيد مش كل الستات زي بعض ولا كل الرجال زي بعض بس ياريت نفكر شوية … هو الحلال اللي ربنا احله احسن؟؟ ولا انه يمشي مع واحدة في الحرام و يرجعلك اخر الليل؟!!