الموضوع: تلفيات في عربية زيرو بواسطة سبير كار

أول مرة أشتكي من خدمة. بس الصدمة فعلاً كبيرة. و التعامل كان سيئ للغاية.
اشتريت عربية جديدة استلمتها الصبح و ذهبت مباشرة إلى محل سبير كار في التجمع - شارع مجمع البنوك - قابلني موظف مبيعات شيك و أسلوبه كويس جداً اسمه محمد. اخترت معاه الفرش و الكسوة الجلد للأرضية و جراب لسارة الدركسيون. و نزلت العربية الجراج و قالولي هتاخد ٣ ساعات شغل. لحد هنا مفيش مشكلة.
روحت اتغديت انا ووالدي و رجعت استلم العربية لقيت خرابيش في بلاستيك عتب الباب و البلاستيك اللي بين الكرسيين جنب الفيتيس و فرامل اليد. سألت فين المسئول و ندهولي واحد اسمه تامر. قالي ٥ دقايق بالظبط و كل حاجة هترجع زي ما كانت وطلب مني انتظر فوق في الاستراحة. انتظرت خمس دقايق فوق في الاستراحة ونزلت لقيت الوضع أسوأ بعد استخدام ملمع و البقع انتشرت في العربية كلّها زي ما باين في الصور. قفلت العربية و طلعت فوق أدور على حد اشتكيله قالولي مدير الفرع الاستاذ أمير نازل يبص على العربية. انزل قابله تحت.
نزلت تحت عند العربية والأستاذ أمير لقيته بيشرب سجاير جوا العربية (مع ان التدخين ممنوع في المكان كله وانا اخترت العربية دي عشان صديقة للبيئة ومفيهاش طفاية سجاير ولا ولاعة).
المهم قالي انا هحل المشكلة دي خلاي ١٠ دقايق. قولتله ايه الحل بتاع حضرتك؟؟ قالي هستخدم سنفرة.
قولتله لا شكراً انا عايز ٥٠٠ جنية تعويض و انا هعالج المشكلة دي بنفسي. قالي لا طبعاً مفيش الكلام دة. و الصنايعي ميقصدش.
قولتله انا جاي مكان محترم و كبير وأسعاره أغلى من بره عشان ألاقي عامل محترف. مش عشان اسمع اعذار من النوع ده.
قالي هو الحل اللي عندي استخدام الصنفرة.
وصلت هنا لقمة حرقة الدم و صعبان عليا فلوسي اللي دفعتها في العربية و هي لسا حتى معلقتش نمر. قمت شايط قرطاس مصنوع من الكاوتشوك لقيته قدامي.
طبعا الاستاذ أمير اتلكك على أي غلطة ليا ( وانا فعلاً غلطت اني عملت كدا طبعاً) و قالي انت جاي تكسرلي الورشة و قعد يخبط على كبوت العربية بقوة و جرحة ( مش عارف الساعة اللي جرحته ولا الخاتم اللي في أيده). وقالهم أقفلوا الجراج العربية دي مش هتخرج من هنا. و طبعا بيتحامى في العمال اللي معاه ( حوالي ١٠٠ عامل)
هنا أتدخل بعض الناس اللي واقفه و هدوا الموقف لحد ما عرفت أمشي بعربيتي.
أنا مش عارف أخد حقي ازاي.
#سبير_كار حسبي الله ونعم الوكيل

انا مش عارف آخذ حقي ازاي.
آسف على الاطالة و الأسلوب لان فعلاً أعصابي تعبانة من ساعتها و مش قادر اركز.

المشاركة الأصلية كتبت بواسطة tamer_a7

اعتقد الامانه المهنيه كانت تقتضي من الاستاذ احمد نشر الاتي

عتذار رسمى
بناء على طلب العميل الأستاذ / أحمد نجدى بعد أخر مكالمة تليفونية تمت بينه وبين أحد المسئولين بشركة سبير كار بتاريخ 21 / 8 / 2015 الساعة 3.20 عصراً
تعتذر الشركة رسمياً عن الأضرار التى حدثت وتقرر الأتى بناء على طلب العميل
- دفع مبلغ تعويض وقيمته 500 جنيه مصرى
- رد مبلغ 1125 جنيه قيمة ما تم تركيبه فى السيارة
- إعتذار رسمى على مواقع التواصل الإجتماعى
تعتذر الشركة لجميع عملائها الكرام وبالأخص الأستاذ / أحمد نجدى ونود أن نحيط سيادتكم بأنه تم إتخاذ الإجراءات القانونية تجاة فريق العمل المتسبب فى الأضرار

اعتقد ان الاستاذ احمد انكر السيناريو اللي حصل ده ومحدش كلمه ولا في تعويضات اندفعت ولما طالبنا اداره سبير كار نشر ايصال استلام مبلغ التعويض لاثبات ما يقولونه تم حذف كافه التعليقات وكذلك المدينه لهم من صفحتهم