فرش تفصيل لعربية جديدة

**haitham06** · 21-08-2015 11:03 AM

تحياتي للزملاء الأعزاء
أنا الحمد لله ربنا أكرمني وإشتريت رينو فلوانس ٢٠١٦ من أيام وعاوز أركب لها فرش كراسي وأرضية وبعد بحث توصلت أن التفصيل هو الأفضل من الفرش الجاهز، سمعت عن واحد إسمه الجعفري في المعادي الجديدة، هل فيه حد هنا إتعامل معاه قبل كده وبرضه محتاج نصائحكم وخبراتكم في الموضوع ده.
وشكراً لكم جميعاً

**hesham fawzy h** · 21-08-2015 12:33 PM

فى اماكن كتير زى go car . و كذا واحد غيرة

بس فى واحد مشهور برضو اسمة spare car .. فى ناس كتير بتشتكى منة و لسة لية مشكلة مولعة الفيس

**ali ashraf** · 21-08-2015 12:54 PM

السلام عليكم انا فى نفس الموضوع تقريبا استلمت بيجو 508 و عايز اجيب فرش جلد و الموضوع له شقين الميزانية المحددة للفرش و شكل الفرش .....
أولا التفصيل : هناك شبه اجماع ان التفصيل هو الافضل من الجاهز بتختار الخامات و لونها و لو التفصيل كويس بيكون رائع بس غالى التكلفة ( نسبيا للجاهز) و بيأخذ وقت اكتر فى التسليم و اهم مكانين بيفصلوا جينز كار فى مدينه نصر و الجعفرى فى المعادى الجديدة فى نهاية شارع الجزائر بالقرب من مبنى رئاسة الحى و الاسعار تبدآ من 1600 ال2800
ثانيا الجهاز : خامات مش بطالة ( ينصح بالجلد الالمانى) لكن اختيار محدود فى الموديلات و الالوان و زمت التركيب يمكن فى ساعة و الاسعار اقل بكتير تبدأ من 290 ج ( لا انصح بالخامات دى) و الالمانى افضل بكتير و يبدأمن 650 ج الى 900 ج .
انا كنت ركبت فرش جلد المانى من سبير امتداد رمسيس من سنتين و ماشى ممتاز الى الان و زى الفل.
بالنسبة لموضوع مشكلة سبير كار اللى على المواقع من امس و اليوم فده يخص فرع التجمع ومذكور بوست صحبه فى المنتدى امس العمال خربوا فى العربية بتاعة احد الاعضاء الزملاء و مدير الفرع عمل افعال مش كويسة (على حد كلام الزميل معانا فى المنتدى) و طبعا انا مقدرش احكم على موضوع من طرف واحد و لكن مبدئيا لن اتعامل مع فرع التجمع لحين وضوح الامر لان سبير كار شركة محترمة و لها فروع فى امتداد رمسيس و السيدة زينب و بالنسبة لفرع التجمع انا اطلب من الادارة تحرى موضوع العضو الزميل و لو اللى ذكره صحيح يوضع هذا الفرع فى اللائحة السوداء

**haitham06** · 21-08-2015 07:59 PM

طبعاً مشكورين علي المعلومات دي وأنا حابب أعرف منكم حاجة كده عرفتها النهاردة لما رحت جينز كار وكنت بشوف خامات الجلد التفصيل اللي بالمناسبة بيبدأ من ٢٠٠٠-٣٠٠٠ للجلد الألماني!
الحاجة اللي قالولي عليها وأنا باتفق علي ميعاد تركيب دواسة جلد للأرضية أن ممكن لمبة الإيرباج تنور لما يرفعوا الكراسي والحكاية دي يا إما تتحل في أقرب ميعاد للصيانة أو ممكن أروح أمير وجوزيف اللي في أبو داود الظاهري عشان يطفوها!! الكلام ده بجد؟؟! وإيه مدي تأثيره علي العربية وضمانها؟؟!
معلش الحكاية دي قلقاني شوية ومحتاج خبراتكم أعزائي
وشكراً

**hesham fawzy h** · 22-08-2015 06:54 AM

المشاركة الأصلية كتبت بواسطة haitham06

طبعاً مشكورين علي المعلومات دي وأنا حابب أعرف منكم حاجة كده عرفتها النهاردة لما رحت جينز كار وكنت بشوف خامات الجلد التفصيل اللي بالمناسبة بيبدأ من ٢٠٠٠-٣٠٠٠ للجلد الألماني!
الحاجة اللي قالولي عليها وأنا باتفق علي ميعاد تركيب دواسة جلد للأرضية أن ممكن لمبة الإيرباج تنور لما يرفعوا الكراسي والحكاية دي يا إما تتحل في أقرب ميعاد للصيانة أو ممكن أروح أمير وجوزيف اللي في أبو داود الظاهري عشان يطفوها!! الكلام ده بجد؟؟! وإيه مدي تأثيره علي العربية وضمانها؟؟!
معلش الحكاية دي قلقاني شوية ومحتاج خبراتكم أعزائي
وشكراً

فييين بالضبط فى ابو داود

**haitham06** · 22-08-2015 10:46 AM

مش عارف فين بالظبط. بس السؤال اللي محدش رد عليه مدي صحة الكلام ده وتأثيره علي ضمان العربية يا جماعة!

**ali ashraf** · 22-08-2015 11:20 AM

المشاركة الأصلية كتبت بواسطة haitham06

مش عارف فين بالظبط. بس السؤال اللي محدش رد عليه مدي صحة الكلام ده وتأثيره علي ضمان العربية يا جماعة!

انا ركبت فرش عربيتى امس بيجو 508 موديل 2016 فى و المشرف المسؤل رفض تركيب جلد فى الارضية على اساس ان فك الكراسى ممكن يعمل مشكلة فى الااير باج و طلب منى سؤال التوكيل قبل فك الكراسى و شكرته و قلت استنى لموعد الصيانة الدورية

**Valiant73** · 31-08-2015 10:27 PM

سؤال لمالكي بيجو 508 ازاى وفين ركب فرش للكراسي وفي ايرباج في الكراسي الأمامية. وموضوع الأرضية الجلد شكلها كويس ولا الواحد يتوكل على الله ويجيب الدواسات اللي بتغطي الأرضية كلها من aliexpress.com
أرجو الرد