الموضوع: تجربتى مع الفسبا الصباب وحيره شراء اسكوتر

السلام عليكم جميعا .
بالفعل من فتره اشتريت فسبا صباب زيرو 2015 هى كويسه مش بطاله لكن فعلا زى ما ناس كتير وصفتها بانها ضعيفه بمعنى ادق وانت راكبها لوحدك تمام سحب وسرعه ونعومه مفيش بعد كده لكن اول ما يركب معاك حد او تشيل عليها حاجه تحس كده انها خرعه وتبقى عيزاك تشد عليها شويه .. طعا مقارنه بانى عندى عربيه اساسا وطول عمرى بركب عربيات فالفسبا موفره فى المال والوقت وكل حاجه
عمومما مش معنى كلامى ان الفسبا الصباب وحشه بالكامل لكن احب ااقول راى الشخصى انها لاستخدام فرد واحد ولازم يكون محافظ جدا وبيداوم على تغيير الزيت وفلتر الزيت والاهم من دا كله ان الواحد منكم وهو رايح يشترى لازم يااخد معاه حد بيعرف كويس قوى فى الفسبا ويفضل ميكانيكى امين يختار له فسبا كويسه ويتمم على بويه الفسبا كويس لان فى منهم بيكون اتخبط فى المعرض وبيرشوه ويتمم على صوت الماتور كويس لان كتير من الفسب نازل ماتوره صوته خشن كده وعالى حبتين ( سيبك من الللى يقولك امشى شويه وصوت خشانه وعلو الماتور هايروح مع تغيير الزيت ) الماتور اللى صوته خشن وعالى بيفضل عالى وخشن حتى وان حضرتك حسيت ان صوته حن شويه فالافضل تكون منقى ماتور صوته اخرص لان ميزه الصباب ان صوته ناعم واخرص مش زى الفسبا البستم صوتها بيكون عالى ودوشه
دايما اشترى من معرض معروف وكبير ويكون فيه فسب كتير والوان كتير سيبك من المحلات الصغيره لانه حتى وان كان ارخص فى السعر اكيد فى سبب انه ارخص ( دى نصيحه للاسف انا معملتش بيها و كان جزائى انى خدت مكنه صوتها مش كويس )
على فكره الفيسب زى اى حاجه فى الدنيا فرز اول وتانى وعاشر قلولى ازاى بمعنى ادق التاجر الكبير بياخد المكن النضيف و يعرضه فى معرضه بمعنى اصح المكن اللى متخربش فى عمليه النقل ولا اللى اتخبط ولا اللى ماتوره وهو بيتقفل طلع صوته خشن ( على فكره للى ميعرفش ) الفسب بقالها فتره بتتقفل بالكامل هنا بمعرفه التاجر نفسه مش المصنع حتى
خلاصه الكلام الفسبا الصباب للى عايز يركب فسبا زيرو ومعاه 7000 او 8000 جنيه ولازم يكون واحد بيحافظ قوى على حاجته وميكنش هاينقل حاجه عليها يعنى توديه وتجيبه .
اخيرا انا بعت الفسبا بعد شهريين من شرائها بعد ماكنت رخصتها 3 سنين وركبتلها مارش ودعمات من الاجناب وخلتها تمام وربنا يبارك للى اخدها ويديه خيرها ويكفيه شرها
احب بقى اسال اهل الخبره انتوا ايه رايكم فى موضوع الاسكوتر هو افضل ولا ايه ؟
وايه الاسكوتر اللى يجى جديد ومنين ويكون متوفر له قطع الغيار والصيانه ؟
مع العلم انى عامل ميزانيه من 15 لـ 20 الف جنيه ؟
وايه رايكم فى نوعين شوفتهم على النت sym evoi250 و النوع التانى اسمه benelli zenfreno 250 الشكل دا اكتر شكلين عاجبونى من الخارج لكن مش عارف ايهم افضل من ناحيه القوه والاداء وقطع الغيار ؟
وهل فى حاجه يابانى فى المبلغ اللى دا جديده زيرو ؟
وشكرا

الاسكوترجميله طبعاً ، بس مش عارف ليه بحث ان شكلها عجيب كدا لا هى بايك ولا فسبا :)